أغسطس 08، 2009

إيزولد

أقمت هذه المدونة قبل أكثر من عامين, ولم أعط عنوانها لأحد, وكانت المفاجأة في أحد الأيام أن زارتني فتاة تدعو نفسها واندرر. من اللحظة الأولى أدركت أنني أمام شخصية واعية. كانت تتحدث عن الاستشراق وأشياء فوق مستوى فهمي, انبهرت عندما دخلت مدونتها بقدرتها على التعبير عن نفسها بالإنجليزية. واندرر والتي غيرت اسمها بعد ذلك إلى هالو ثم إيزولد لم تكن مجرد قارئة للمدونة, فتعليقاتها أعطتني الكثير من الثقة في أن ما أكتبه يستحق القراءة. هي أقدم زوار هذه المدونة من الذين التقيت بهم على الإنترنت, ولا أذكر أنها تركت تدوينة إلا وعلقت عليها وأعطت رأيها بلا مجاملة.

تعلمت من إيزولد أن الفرحة لا تأتي للإنسان وإنما هو يخلقها. فأنا لاحظت من خلال تعليقاتها وتدويناتها أن لديها الكثير من الأشياء التي تدعوها للحزن, لكنها مع هذا كانت تكتب تعليقات مليئة بالسعادة والسرور.

بقي عشرة أيام على سفر إيزولد إلى الولايات المتحدة, طبقاً لما هو مكتوب في مدونتها. أرى أن تعليقاتها أصبحت مليئة بالقلق والتوتر وربما الحزن أيضاً. اليوم أريد أن أرد لها جزءاً من تشجيعها ودعمها لي.لذا فأنا أدعوكم إلى زيارتها, والدعاء لها معي بأن يحفظها الله في سفرها عن يمينها وعن يسارها ومن خلفها ومن أمامها ومن تحتها ومن فوقها, وأن يحميها الله من نفسها. كما أدعوكم إلى الدخول إلى مدونتها كي تقتربوا منها أكثر. صلوا لإيزولد بظهر الغيب بما شئتم من الدعاء, ولا تنسوني أنا أيضاً.

اليوم أنا أهديها هذه الحدوتة, لربما أستطيع أن أرسم ابتسامة على شفتيها, وأرجو ألا يعلق أحد على هذه التدوينة قبلها, فاليوم يومها, والحفل هنا منعقد من أجلها.

ملك قلوب القطط

 

king

في يوم من ذات الأيام نزلت أميرة القطط للشارع ومعاها وصيفاتها والحراس.. من بعيد شافت قط مشمشي وسيم قوي. هي كانت قطة بيضة وحلوة كمان. العين جات في العين, والقلب سلم على القلب. القط وهو في عز سعادته ما بصش قدامه وهو بيعدي الطريق فجات عربية من بعيد قوي وداست على رجله.

أميرة القطط قلقت عليه قوي, لكن حراسها قالولها إن الاختلاط بعامة القطط يخالف تعاليم أبوها الملك, ووصيفاتها استعجبوا قوي من إنها حست بكل الألم ده عشان حتة قط في الشارع لا راح ولا جه.

في اليوم اللي بعده كان قط حكايتنا واللي اسمه طقطق عند دكتور القطاقيط اللي قاله:

- أنا هاعالجك بس عشان انت صعبت عليا.. لكن الجبس ده المفروض يتدفع عليه أكتر من خمس فيران ميتين أو تلاتة حيين.

طقطق ما كانش قط عادي, هو كان من عيلة كبيرة, من بلاد بعيدة قوي, وكان من تقاليد عيلته إنهم ما ياكلوش من الزبالة في الشارع. هما كانوا بيعتمدوا على صيد القطط. لكن طقطق ما كانش بيحب يصطاد الفيران عشان هو كان على عكس بقية القطط بيحب الفيران, والكلاب وكل حاجة حواليه. بعد ما رجله اتجبست طقطق صمم إنه ما يخالفش مبادئ العيلة وإنه لو هايموت مش هاياكل من الزبالة. يوم ورا يوم الأكل اللي كان شايله في القط فريزر (أصلهم ما كانش عندهم ديب فريزر هههه) قرب يخلص.

طقطق قرر يطلع لشارع المدينة. هو بيحب الناس كلها, وبيحب كل شيء حواليه. من زمان وهو نفسه يعرف طريق الرجوع لبلده لكن ما باليد حيلة. المهم هو قرر إنه يحاول يتصاحب على أي أسرة تستضيفه عندها, عشان يحبهم ويحبوه, ويفرح بيهم ويفرحوا بيه, لكن حظه كان وحش قوي قوي, لأنه قابل شوية عيال أشقيا خالص كانوا بيحبوا يلعبوا بالحونات.. فمسكوه من ديله وفضلوا يلفوه في الهوا ويسيبوه فيخبط في الحيطة, ويلفوه ويسيبوه ويخبط في الحيطة.

طقطق ما ردش الإساءة بالإساءة وما رضيش يخربشهم.. هو بس أخد بعضه ومشي بعيد بعيد.

الأيام عدت, حلوة ووحشة وطقطق رجله خفت بس كانت بتعرج حبة نونو كده. هو كان مثقف قوي, كل يوم كان بيقعد يقرا في تراث أجداده القطاقيط, وبعد ما يقرا يفتكر أميرته, ويسأل نفسه يا ترى هي فاكراه ولا لأ.

الأميرة من قصرها كانت بتبص في بلورتها السحرية وتشوف طقطق وهو كل يوم بتحصل معاه حاجات تقطع القلب.. لكن كانت بتحاول تراعي تقاليد القصر, وما تجيبش لنفسها مشاكل كتيير.

مرت الأيام وعنين طقطق ضعفت من كتر القراية, راح لدكتور العيون المقطقطة فقاله إنه محتاج نضارة قططي, وإنها هاتكلفه عشرين فار. لكن إزاي يعني يصطاد وهو بيحب الفيران؟ طقطق وحيد في المدينة ومعهوش اللي يساعده, فقرر إنه عشان يعيش لازم يكون قاسي. وقال إنه هايعتمد على نفسه وهايصطاد الفيران عشان يشتري النضارة. من بعيد شاف حاجتين سود كده افتكرهم فيران, ولما قرب منهم طلعوا كلاب سودا كبيرة طلعت تجري وراه وما سابوهوش غير لما إدوله علقة نضيفة.

الأميرة كانت شايفة الكلام ده من بعيد وصعب عليها طقطق قوي فقررت تستحمل كل اللي هايحصلها وأمرت الحراس إنهم يروحوا يخلصوه من الكلاب ويجيبوه.

لما وصل طقطق القصر كان مليان جروح كتيرة والدكاترة الملكيين قالوا إنه مش هايعيش كتير. الأميرة كانت عارفة إنها بتحبه قوي فقررت تخلي آخر أيامه حلوة قوي. قعدت هي وعلماء القصر يفكروا في طريقة يخلوا طقطق بيها يشوف أهله قبل ما يموت. هو عاش طول حياته وحيد, ولو شافهم هايبقى ده حاجة هاتفرحه أكيد.

العلما قالوا إنهم عندهم الحال, فعملوا نضارة لطقطق وركبوا في حيطان القصر مرايات ضخمة مقعرة ومحدبة عشان لما يعدي وسطها يشوف قطط شبهه كتير. الأميرة وقفت في الناحية التانية من السفرة وطقطق قعد في وشها, والشاش حواليه داير ما يدور.. قالت له إنها بتحبه, وقال إنه بيحبها.. مشوا مع بعض في القصر فشاف أجداده القطاقيط.. وفجأة وهو ماسك إيدها, حس إن اللحظة جت, وإنه بيموت. بص عليها وقالها إنه ما كانش خايف يموت, وإنما كان خايف يموت من غير ما حد يقوله "باحبك".. الأميرة فضلت تقوله إنها بتحبه لغاية ما فستك (يعني مات هههه)

هي كانت هاتموت عليه من الزعل, وقررت تخلد ذكراه فأمرت النحاتين يعملوله تمثال. كان التمثال لقط ملفوف بالشاش وخارج من صدره قلب كبير. في كل عيد حب, كانوا القطاقيط والقطقوطات اللي بيدوروا على حد يحبهم بييجوا ويقفوا عند التمثال ويقولوا أمنيتهم. اتقال في مدينة القطط إن التمثال ده كان له مفعول سحري, وإن كل اللي بيدور على الحب ممكن يلاقيه حوالين التمثال.

هناك 29 تعليقًا:

أسما يقول...

انا مش عارف اقول ايه...انا لما شفت مفيش تعليقات فرحت و قلت انا انهاردة هاعلق الاول، لكن لما قريت... بجد انا ممنون ممنون ممنون :)

انت طبعا عارف اني متوتر و قلقان و مش باعرف اتكلم اوي اليومين دول، مع اني لماضة، ده غير انك عارف طبعا اني باتكلم بصيغة المذكر لما اكون زعلان اوي او فرحان اوي، و انا دلوقتي الاتنين ف بعض، حاجة تلخبط و الله... هو مفيش علاج للحالة دي يا احمد، انا عايز اتكلم زي البنات الحلوين و اضيف تاء التأنيث ف آخر كل فعل استخدمه... هيييه، يللا، اكتر من كدة و بيزيح ربنا

عمرو، انا بجد مش عارفة اقوللك ايه، الف شكر يا كبير(حلوة دي، تحسني قاعدة علي قهوة) هههههههه

الا قل لي صحيح، انت جبت "فستك" دي منين؟ جامدة الصراحة، أي و الله :)

طبعا انت مش لاقيتلي صورة تحطها ف البوست، بس يا جماعة احب اقول لكوا اني زي القمر... قمر ايه بس، انا احلي منه بكتيييييييييير و اكيد صورتي كانت هتنور المدونة D:

اممممممممممم... بس خلاص!

Unknown يقول...

طب كويس ايزولد علقت يعنى ممكن التعليقات تتفتح للجمنهور العادى..اصلى عمالة امسك صوابعينى من ساعة ما قريت ومستنياها تعلق عشان مكسرش كلامك يا كبير..طبعا كبير دى انا جبتها من تعليق ايزولد..واحب اقولك يا ايزو ان فى بلاد العم سام مش هيفهموكى لو قلتلهم يا كبير..

اعلق بقى؟؟؟

بص انا لما قريت كلام ايزولد الاخير..اللى هو اخر بوست مقدرتش اعلق عليه معرفش ليه..مقدرتش اقولها اى حاجة لانه هيبقى كلام محفوظ ورتيب وممل واتقالها خمستلاف مرة دة غير انها اكيد مش محتاجة تسمعه منى يعنى اذ اننى لا امثل لها اى شىء..بس قلبى وجعنى اوى انها هتسافر معرفش ليه مع اننا مش اصحاب بس حسيت انى اعرفها اى نعم علاقتنا لا تتعدى كام بوست كدة وتعليقاتها عندك هنا بس حسيت انى اعرفها ويعز عليا تسافر..

حاجة كمان..مكنتش عارفة ازاى انتوا متقبلين الموضوع كدة..انت واحمد الشمسى..انتوا بتدعموها بشدة ومباركين السفر على عكسى انا واحنا مش اصحاب ولا حاجة..معرفش بس حسيت ان عندكوا قوة نفسية انكوا تدوها الدعم دة..

تالت حاجة..جسمى قشعر لما قريت عنوان تدوينتك لانى عارفة خلفيات الموضوع بس لما قريت الكلام اللى جوة البوست لقيت عنيا بتحرقنى قلت يمكن اللنسز عملت عمايلها بس اكتشفت بعدها انى ببكى..معرفش ليه بس لقيتنى ببكى من الكلام..

على فكرة رقيقة اوى اللفتة دى وحقيقية جدا و قوية للغاية..

معنديش كلام اقوله بس يارب تستمتعى بالتجربة يا ايزو ويجعلك فى كل خطوة ناس ولاد حلال..

عمرو السيد..انت بتبهرنى..........


سلام بقى

noon kiko يقول...

سبقتينى يا انجى ابراهيم..بس معلش انا بحبك وهعديها..وايه يا ايزولدى كده تعلقينا م الصبح مستنيين تعليقك..
هتوحشينا اوى طبعا..انا كان نفسى اشوفك قبل ما تمشى بس معلش ربنا يرجعك لينا بالسلامه يا احلى ايزولد
والله يا جميل البلد هتضلم شويه من بعدك..ههههههههههههه
لا يا حبيبتى هتضلم كتير
مش عايزه ارغى عشان استاذ عمرو وعدته انى انجز ف تعليقاتى
الحدوته جميله جميله جميله كالعاده
بس زعلت جدا انه مات طقطق..وليه موته..مش كان احلى لو اتجوزو وجابو قطاقيط صغنانين:(:(
نهايه مش لطيفه
:(

أحمد الشمسي يقول...

حلوة قوي حكاية التعليق اتفتح للجمهور العادي دي... عارف يا عمرو حاسس اني هاجي اعلق في يوم تطلعلي رسالة: "اختر نظام الدفع: فيزا، باي بال، ماستر كارد"...هههههه

المهم، احنا بنبارك السفر طبعا يا إنجي، بصي الحياة عايزة شوية تمرد على المألوف، عايزة مخاطرة، عايزة جرأة وحركات جريئة، أنا شايف السفر حركة جريئة.

وبعدين أنا لي واحد صاحبي (عبد الرحمن حسن) يقول: الناس ليه شايفة السفر نهاية العالم؟ السفر ممكن يكون بداية، ايزولد هتسافر سنة؟ اتنين؟ ثلاثة؟ هتبني نفسها وترجع بتجربة جديدة وعلم جديد وشخصية اقوى وتستكمل حياتها هنا.. مافيش مشكلة!

كلنا عايزين مصلحتها بشكل مختلف، بس من الظلم اننا نثنيها عن فكرة السفر، حتى لو ده لاننا عايزينها تفضل تكتب كلام جميل في مدونتها لأن بقاءها في الحالة دي هيبقى في مصلحتنا احنا مش في مصلحتها هي، سافري يا ايزولد و "افتحي النوافذ لنسمات الشمال" على رأي طه حسين.

تعبتوني بالتعليق ده والله :)

أحمد الشمسي يقول...

وبعدين يعني أكيد أمريكا فيها شبكة برضه ومش هتغلب في نظام ويندوز عربي ولا انجليزي تكتبلنا منه وتطمنا عليها.. لازم كل شوية نفكركم ان العالم قرية صغيرة ونتكلم عن العولمة الكونية والسموات المفتوحة؟! حاجة غريبة والله :)

noon kiko يقول...

بص هو انا لازم ارغى..انا اكتشفت انى اتنصب عليا ف التعليق الاولانى..بصراحه التعليق هنا النهارده عشان ايزولد وبس..
احنا نعملها ايام
يعنىاللى هيسافر نعلق له..واللى هيتجوز بردوا..ههههههههه
واللى يتخطب ما احنا خلاص متهيالى بقينا عيله كبيره..ولا ايه..
انا طبعا مش جايه استخف دمى...بس بحاول ارطب الاجواء الحزينه دى
انا مش بحب فكرة ان حد يسافر وانا قلت ده لايزولد ف تعليقى عندها..انا معرفهاش بس من اول مابدأت ازور مدونة حضرتك وانا حبيت تعليقاتها..وكمان خفة دمها..وصعب عليا انى اتقبل انها فجأه ممكن تغيب..احساس غريب بيجينى وانا ف مدونتك ..بحس انى ف بيتى فعلا..وان ايزولد اختى وانجى واينجيل وديدى وكانى اعرفهم..عشان كده احنا ممكن نعلق على بعض عندك..وكأن حضرتك فعلا كبير عيلتنا
مش سهل ابدا ان فرع من شجرة العيله دى يتغرب..يمكن لاننا كبنات رومانسيين فمش متقبلين الفكره بصدر رحب زيكم كده

بس انا مبسوطه اوى لانها هتشوف عالم تانى..وتقابل ناس تانيه بافكار تانيه وهى وعدتنى انها هتتعلم موسيقى وترجع بهوايات جديده..لكن مش هويه جديده لانها هتفضل ايزولد البنوته الرقيقه ام دم خفيف اللى كلنا حبيناها
معلش يا استاذ عمرو..كان لازم ارغى..
معلش خليك انت الكبير
:)

غير معرف يقول...

أولا أحب اقول لأيزولد
ربنا يوفقك يا رب
و تحققي كل الي نفسك فيه
وتروحي وترجعي بالسلامه ان شاء الله
وخلي بالك من نفسك هناك
ثانيا
البوست بقي
اول ما قريت العنوان عرفت ان الحدوته هتبقي روعه
لأني اصلا بموت في القطط بطريقه رهيبه فوق تصور اي حد بحبها موت
فأي حاجه طبعا متعلقه بيها هحبها
انت خيالك واسع قوي ازاي جبت حته يدفع خمس فيران ميتين او تلاته صحيين والقط فريزر ضحكتني قوي هههههههه
بس زعلت قوي اما طقطق اضرب ياعيني :(
وزعلت اكتر اما فستك في الآخر
بس القطه الأميره دي قطه عسل خلدت ذكراه بطريقه جميله
بس مش قادره اقولك مدي سعادتي بالحدوته دية
يا ريت كل الحواديت الي بتكتبها علي القطط كده :))
معلش طمع بقي
اصل بحب القطط موت
angel

Unknown يقول...

انا تااااااااااانى

عارف يا احمد يا شمسى...انا مقتنعة بالكلام اللى انت قلته اوى بس انا بخاف عالناس اللى بحبهم..يعنى انا عارفة انى فى يوم من الايام هسافر بلد ماليش فيها حد عشان اعيش التجربة واكمل حياتى وهرجع فى يوم من الايام..لكن مقدرش اسيب حد يعيش التجربة دى لوحده غيرى انا..

بخاف عليهم يتوجعوا..اخاف يبقوا بعيد كدة وانا مقدرش اعملهم حاجة..افتكر ان فى يوم من الايام عملت كدة مع واحد صاحبى لانى كنت خايفة عليه..قعدت ادور له على خمستلاف طريقة يقعد بيهم هنا وميضطرش يسافر..دة ايام ما كنا اصحاب يعنى..هييييييييييه يللا فى داهية صحوبيته..ما علينا مش موضوعنا

المهم يعنى نى مبحبش الناس اللى بحبهم يتالموا واى تجربة فيها وجع ممكن مباركهاش..مش اقول لا متسافريش لكن مش هكون سعيدة زيكوا كدة..

دى انانية صح؟؟؟؟

على فكرة دعمكوا لها شىء فعلا عبقرى..بجد انتوا ناس زى الفل والله..

عمرو انا نسيت اقولك ان الحدوتة حلوة اوى جدا خالص..همسة فى ودنك ومتقولش لحد انى قلت

انا حاسة ان كلامك غير جوايا حاجة..دة بجد مش هزار..خاصة تدويناتك العاطفية..مش هشرح بس انا عارفة بالظبط ايه اللى اتغير جوايا..هحاول احافظ على التغيير دة على قد ما اقدر..

تانى وتالت وطول ما الفرح شغال..ايزو استمتعى بالتجربة ورب يجعلك فى كل خطوة ناس ولاد حلال يا بنتى امين يارب

هامش..زهرة ربيعية بجد انتى بتخجلينى فعلا بذوقك اللامحدود..

سلام كلاكيت تانى مرة

أسما يقول...

استاذ عمرو السيد، اسمحلي ارد علي التعليقات دي قبللك، انهاردة اوكازيون بقي و البيت بيتي كدة و انا هاقعد و اتربع و احكي، اصلهم فتحوا نفسي :)

انجي

مين قال انك لا تمثلي ليا اي شئ، ها؟ بصي يا ست الكل احا صحيح ما نعرفش بعض، بس نتعرف و لحد ما ده يحصل احب اقوللك انك بالنسبة لي فرحة، ايون... انا باستني، زيهم كلهم، تعليقاتك اللي فعلا بتفرحني حتي لو كان الموضوع متقوقز، يعني كلامك بيطرّي عالقلب كدة زي بطيخة ساقعة و مرملة ف يوم حر حر حر :)

ثانيا، بالنسبة لدعم احمد و عمرو لفكرة سفري ف ده شئ انا كنت محتاجاه و مستنياه منهم، لانهم بيقروا مدونتي من اول ما عملتها ف عارفين كلاكيع كتييييييير انا بسببها محتاجة السفرية دي، ده غير انها فعلا نقلة ف حياتي الشخصية و المهنية و ف دراستي الاكاديمية كمان، و كمان لان ده المتوقع من اتنين مثقفين و متفتحين زيهم، ف اوقات ما ينفعش العاطفة تغلب فيها علي العقل، و كل العواطف بتقول اني ما اسافرش، و العقل بيقول لازم اسافر و انا لاول مرة ف حياتي امشي ورا عقلي و بس ف حاجة، و هما سندوني ف اختياري ده لانهم ناس بيعرفوا يحكموا عقلهم كويس و يوزنوا الامور صح، بس ده ما يمنعش انهم قلقانين علي برده، مش كدة و لا ايه، ها؟، و الا ما كانوش يهتموا بانهم يدعولي، لان حتي لو الخطوة دي صح مية مية بمقاييس العقل، هما برده عارفين انها مش سهلة.

و بعدين احساس الغربة ف مكان جديد انا جربته اكتر من مرة و ده مش لان المكان جديد، لكن لانك ما بتكنش تعرف حد هناك، و لا هما يعرفوك، فالواحد بيحس انه لوحده و انه نكرة كدة لفترة(مش سهلة) بس بتعدي اول ما بتعمل صداقات و معارف بعد كدة كله بيبقي تمام... انا قلقانة من حاجات تاني حذرونا منها ف التدريبات اللي اتعملت لنا و قالو لي عليها اساتذتي اللي سافرو، هما ف العدي مش بيقولوا الحاجات دي غير للي مسافر، زي مثلا ان ممكن اللي هتقعد معايا ف السكن تكون lesbian ده وارد و بيحصل، او يكون ليها بوي فريند و ممكن تجيبوا يبات معاها، و لازم اقعد اعقد اتفاقات ف الاول عشان ده ما يحصلش، او تكون لا ده و لا ده، بس ف بلاوي تاني كتيير، و هآخد وقت علي ما اطمن و اقدر اقفل عيني و انام. كمان ممكن تلاجة بيتي يكون فيها بيرة و حاجات كتير ممكن اقابلها جوة و برة الاربع حيطان اللي هانام فيهم... يوووو بلاش قوقزة انهاردة.

يعني يا انجي يا اوختشي، سؤال علي جنب كدة... موضوع ايه و خلفيات ايه اللي تعرفيها عنه، و ليه جسمك قشعر من العنوان و ليه دمعتي، اصل انا ما عنديش خلفية الصراحة، نوريني يا بنتي ربنا ينور طريقك :)

زهرة

انا كمان نفسي اشوفك و الله، و علي فكرة،ما اعرفش انت تعرفي و لا لأ، بس انا عايشة ف سوهاج برده و ممكن نكون جيران، بس انا ممكن انزللك صورتي علي بلوجر، ما هو حرام احرمكم من الجمال ده هههههههه

انت انسانة رقيقة و ده بيفسرلي كل المشاعر اللي انت حاسة بيها و قلتيها
اشوفك علي خير ان شاء الله :)

احمد

بيه و باشا و كفاءة كالعادة... انت قلت ان سفري ده "نقلة" و دي كلمة انا فعلا باشكرك عليها... و انهاردة بتقول انه بداية و خروج عن المألوف، و انا لساني عاجز عن الشكر لان الكلام ده تحديدا اللي بيصبرني و يخليني اثق اني باعمل حاجة صح، حتي لو كانت بدأت بالصدفة البحتة، بس فرص التراجع كانت كتير قدامي و انا اتمسكت بيها و كلامك بيقولي اني اتمسكت بحاجة تستاهل، و حلو اوي اوي كلام طه حسين ، و ده شكر تالت، او عاشر... بس تم جميلم و قل لي انت قريته فين، معلش داخلة علي طمع :)


و انا طبعا لازمن و حتمن اجيب كمبيوتر اول ما اوصل بنسلفانيا، انا عندي وصلة نت ف الشقة، انا مش هاعرف اعيش هناك من غير ما اكلمكوا :)

اينجل

متشكرة علي الدعاء و آمييييين، و لكي بمثل ما دعوت :)

و ليكوا كلكوا بقي، انا هابقي كويس خالص و هاخد بالي من نفسي و هي بس ف اولها هتبقي صعبة، زي كل حاجة ف الدنيا، بس بعد كدة هتبقي عال العال و هتسمعوا صوت ضحكتي من هناك :)

عمرو

ربنا يخليك، انا فعلا مش لاقية كلام اقولهولك... ربنا يسعدك، روح يا شيخ قلبي و ربي راضيين عليك ليوم الدين D:

noon kiko يقول...

طاب خليكى جدعه وفضيلنا نفسك كده ربع ساعه قبل سفرك اشوفك فيها قبل ماتمشى..انا بجد وربنا عايزه اشوفك..هعلقلك وردهحمرا ف زرار البلوزه تعرفينى بيها..هههههههههه
مانا زهره بقا..ولو ان ده صفة اسمى مش اسمى ..حركات يعنى
ها فكرى..فكرتى؟
طاب فكرى تانى
انتى هتشوفى بنوته قمر بردوا ولو انى حاجه بتتشاف بالعافيه ..نص متر ماشى ع الارض..
:(

عمرو باشا,,,كبير والله كبير يا كبير..خدنا المكان لحسابنا احنا
على فكره
يا جماعه احنا بقينا احتلال..وبدأنا نزحف على مدونة كبيرنا..ولازم نتراجع شويه ..عيب كده يا بنات سيبو كبيرنا ياخد حقه ف بيته
:)

عمرو يقول...

أهلا بكم
هو أنا فرحان من مظاهرة الحب والتأييد دي, بس أنا لما عملت التدوينة دي كنت عايزكم تدعولها فعلاً, مش بس نقعد نرغي كده ولوك لوك لوك لوك. إدعولها ترجع لأهلها آمنة مطمئنة. أنا عارف إن التجربة صعبة ومخيفة بعض لشيء, لكن أنا واثق إن ربنا هايعملها اللي فيه الخير.
بصراحة مش هارد على أي تعليق لأن التعليقات النهاردة مش مكتوبة ليا. دي تعليقاتها هي, وهي ردت.
أنا فعلاً بقيت باحس إن المدونة بيت تاني ليا.. أشكركم جميعاً.

أسما يقول...

عمرو
انا بس مش فاهمة جملة انجي عن "خلفيات الموضوع" بجد الجملة دي لخبطتني، انت ما رديتش عليها ليه لا انت و لا هي ؟ :(

عمرو يقول...

والله ولا أنا فاهم الجملة دي يا إيزولد. حتى الشمسي سألني هي تقصد إيه.

إلى إنجي إبراهيم
لو سمحتي يعني إيه خلفيات الموضوع
أي موضوع تقصدين؟

أسما يقول...

عمرو

مش مشكلة، ما دام مش انا لوحي اللي متلخبط هههههههه

عمرو تاني

شكرا :)

Nighty Nighty
:)

عمرو يقول...

العفو يا فندم
تصبحي على خير

غير معرف يقول...

طيب والتعليق بتاعي عن القطط المقطقطه مين هيرد علية :(
angel

غير معرف يقول...

أولا : أعتذر عن غيابي الخارج عن إرادتي الحرة!!!!.
ثانيا : 4 بوستات أجمل من بعض ؛وسأبدا ببوست " الجميل الذي يليق عليه الغرام".عنوان جميل لموضوع أضاف لعقلي ووجداني وأكد وعزز آرائي في الحياة ؛ خاصة مع تعليقات فطاحل أمثال :إنجي و زهرة وختامهم مسك د/ جمال عبارة لخبرته التي تفوقنا ..
" إحتفال ": أصفق وأقف فرحا مع أ/ محمد عبد المطلب ؛ فزفاف و الشمس تزور أبي من أجمل ما كتبت ؛ يكفي إختيارك للعناوين والصور ولأو أنك لم تضع صورة كما ذكر د/ الشمسي ؛ إلا أنني تخيلت الصورة وأنت تقف منحني الرأس لتصفيق أستاذك الذي تدربت علي يديه ؛ فتحية مني لإستاذك العزيز الذي لم تنكر جميله وفضله عليك لا أنت ولا زهرة الجميلة.
" أسمعه يضحك ": لماذا حينما قرأتها تذكرت أغنية لعبد الحليم حافظ ( حبيبها).... إنها سخرية الخيانة !!!
"ملك قلوب القطط ":
أولا أنت ملك ملوك الحواديت ؛ أنت بارع حقا في حكاوي الصغار التي نحبها نحن الكبار : تذكرني بأحمد حلمي قبل أن يصبح ممثلا ؛ حينما كان يقدم برنامج الأطفال إسمه ( لعب عيال ) ؛ كنت أعشق هذا البرنامج .لإن التعامل مع الأطفال ليس بالسهولة التي يعتقدها أي شخص ؛ولو حتي عملنلهم قرد !!!!.
أما أيزولد العزيزة : فعلي الرغم من أننا مش من نفس جيل السبعينات إلا أنني من قراءاتي لتعليقاتك أنت وكل زوار المدونة التي أضفت الكثير من السعادة لروحي التي تحمل مثلك بعض المرار؛ فلقد عرفت من تعليقاتك أننا نتشابه في عدة أشياء ؛ إلا أنني لم أشعر بفرق السن . بل بالعكس كلكم بلا إستثناء أضفتم لي البسمة والمعرفة . أتمني لكي كل السعادة والتوفيق وربنا يحفظك في غربتك وتنامي مغمضة العينين .
أما أنت يا د/ عمرو ؛ فلقد سعدني زماني بمعرفتك ؛ فيا رب أسعد زمانه وأوقاته وأن يديم عليك السعادة الحقيقة الغير ملفقة ؛ وإن كانت أحيانا تكون كمسكن مؤقت للحزن والمرار الذي يطعم أيامنا من دون أن ندري .شكرا لك عليك ؛
ديدي

noon kiko يقول...

ربنا وحده اللى يعلم يا ايزو انا بدعيلك اد ايه..وكل اللى يعرفوكى اكيد
ولو انى كل ما افتكرك احس انى اكتئبت لانك مسافره والله ف كل صلاه بدعيلك واقول يارب تحميها وتوقفلها ولاد الحلال اللى ياخدوا بالهم منها عشان هى مش تعرف تاخد بالها من نفسها

وعلى فكره يا استاذ عمرو..دعاء المؤمن لاخيه بظهر الغيب مستجاب
يعنى مش لازم نقولها ف وشها..
:)

Unknown يقول...

نياااااااااااهاهاهاااااااااااا

كلكوا اتلغبطتوا فى جملة خلفيات الموضوع..عارف لو فى ظروف اخرى كان زمانى رخمت وعملتها مسابقة واللى يعرف الخلفيات يشترى جورنال متزوقينى يا ماما بتلاتة لالالالى من اى بتاع جرايد ويفتح صفحة مليون وتلتميت الف..راجع مسرحية كدة اوكيه..

يا جدعان انا قلت انى معلقتش عند ايزولد مع انى عارفة خلفيات البوست من بوستات كتير..ايه هى بقى الخلفيات؟؟ انها يعنى هتسافر ومقدمة فى منحة وانها بتمشى فى الموضوع دة من فترة..فى ايه يا جودعان مالكوا هو سفر البونية اثر عليكوا وللا اييييييه؟؟؟

لا على فكرة انا عارفة ان العيب عندى وانى مبعرفش اوصل كلامى ولا وجهات نظرى بسهولة دة حتى مصطلحاتى ساعات ما تقابل بالتتنيح التام من قبل المتلقى..

ايزو..ربنا يوفقك ويرجعك لاهلك باحلى تجربة وينورلك طريقك وبجد يوقفلك ولاد الحلال دى اهم حاجة..

بجد انتوا ناس زى الفل انا بجد فخورة بيكوا حقا والله وربنا يشهد..

اممممممممممممم ممكن الواحد يقول ايه تانى؟؟؟ ولا حاجة بس ربنا يكرمكوا كلكوا وكل واحد يعمل اللى نفسه فيه..ربنا معاكم يارب

سلام بقى

غير معرف يقول...

نسيت أقول حاجة لأيزولد :
يا ريت لو إخترتي تتعلمي اللغة الأسبانية ؛ تبقي في البلوج بتاعك لما تسافري وترستأي أمورك إن شاء الله ؛ تبقي تدينا شوية دروس في مباديء اللغة الأسباني ؛ علشان أعرف أتفاهم مع زوجة أخويا ؛ إحنا بنتفاهم بالإيطالي علي خفيف لإني كنت درساه في الجامعة من يجي 10سنين وفي حاجات وقعت مني في السكة ؛ وحاولت آخد كورسات في المركز الثقافي بالدقي ؛ بس للآسف مواعيده مش مناسبة مع مواعيد شغلي ؛
ولو هتدرسي تركي مايضرش برده ‘ أنا في الحقيقة بحب اللغات جدا؛
ربنا يكرمك ويفتحلك كل الأبواب ؛ أنا دخلت عندك وقريتلك آخر بوست " كرنفال " والله مبسوطالك ؛ وإن شاء الله تكون الرحلة دي دوا للمطبات اللي مريتي بيها في حياتك ؛ وترجعي وترفعي راسنافي بلاد الفرنجة ؛؛
ديدي

عطش الصبار يقول...

سلام عليكم ازيك يا استاذ عمرو السيد
حسيت بالبوست ده قوى وخوف ايزولد ده انا عشته بكل معنى الخوف لدرجه قبل السفر وزنى انخفض 5كيلو من غير رجيم وكانت تجربه صعبه جداوفضلت بعد وصولى الولايات المتحده فى حاله اكتئاب فتره ويمكن لسه بدأه افك لكن واللى الناس هنا ودودين على عكس ما كنا متخيلين صحيح الناس عايشين فى جزر معزوله لكن كل واحد بيحترم خصوصيه الاخرين هتنبهر بالنظام والنضافه الشديده(لسه لحد دلوقت ما استخدمتش الورنيش هى بلد بتوفر الورنيش ههههههههههههههه)ربنا معاها وعلى راى الاستاذ احمد الشمسى السفر تجره تستحق المغامره وتستحق ان نعايشها وان نقبل عليها
كل البوستات اللى كتبتها يا استاذ عمرو رائعه وكنت متابعاها لكن ما عرفتش ارد لان كانت هناك اشياء شغلتنى بعد وصولى وبرضه فى السر كدا حروف اللاب توب اللى هنا كلها انجليزى ومكنتش عارفه اكتب
المهم ان فعلا كل كتابتك رائعه ومعها حق ايزوالدانها تشجعك
تقبل تحياتى

غير معرف يقول...

شكلك كده مشغول ؛ يا تري إيه أخبار الورشة بتاعة إمبارح ؟
لعل المانع خير ؛
ديدي

عمرو يقول...

أهلا بكم جميعا
أهلا ديدي
:)
أنا بخير الحمد لله, لكن كان علي أن أستقل القطار بعد الورشة
سأرد على تعليقاتكم كلها بعد أن أنتهي من العمل اليوم إن شاء الله
:)

عمرو يقول...

إينجيل
أنا عمري ما ربيت قطة. طول عمري كان نفسي أربي واحدة لكن ماما كانت بتسربهم. فرحان إن الحدوتة عجبتك, أنا مش طنشت تعليقك بس قلت أنسحب من التعليقات وأسيب لإيزولد مساحة للرد
:)

عمرو يقول...

تعرفي يا ديدي
جملة شكراً لك عليك دي خلتني سعيييد بقية اليوم. آه والله. أصل أنا باحب نفسي قوي ونرجسي على الآخر ومغرور وكل العبر الوحشة فيا, فلم قلتي الجملة دي حسيت بنفسي قوي. أوعي تمشي على الرتم ده عشان بعد كده ما حدش هايعرف يكلمني
:)

عمرو يقول...

أهلاااااااااااااااااااا يا عطش الصبار
والله وحشتيني. أخبارك إيه وأخبار أمريكا؟ يا رب تكوني سعيدة. أنا فرحان قوي إنك بتقري البوستات هناك. والله وبقالك قارئة في أمريكا يا واد يا عمرو
:)
إلا صحيح هو أخبار الجو عندكم إيه عشان أنا ناوي آجي أحضر رمضان في أمريكا وأتبرك بالأماكن اللي فيها ههههه
شكرا خالص قوي يعني على التعليق ده أسعدني فعلاً

أسما يقول...

يا اخي الظاهر مفيش فايدة، مفيش غير دي:

:)

أسما يقول...

بجد... ممنوووون صحيح عدّي سنة تقريبا عالتدوينة دي، بس انا فعلا لسة ممنوووووون و فرحان بيها اوييييييي... يللا، نايتي نايتي
:)

عمرو يقول...

أسماء
تصدقي إن التدوينة دي حلوة فعلا
:)