أكتوبر 14، 2010

قمرين!

mn

طبقاً لقوانين المدونة, فالحدوتة دي للبنات الحلوين, والولاد الوحشين ما يقروش ولو قروا ما يعلقوش :)

زمان, زمان, زمااان كانت النجوم زي النجوم دلوقتي, والشجر زي الشجر, لكن كان في السما قمرين مش قمر واحد. وكان لونهم دهبي زي لون الشمس.

في يوم من ذات الأيام قمر من القمرين تعب من الوقفة فوق والدوران حوالين الأرض, فنزل يسند شوية على شجرة تفاح تحت منه. أول ما ريح كده على الشجرة, كل الدنيا نورت قوي.

كل الناس بقت مبسوطة بالقمر اللي نزل على الأرض, الفلاحين بقوا بيزرعوا بالليل بعيد عن الحر في النهار, والحبيبة بقوا بيسهروا للفجر وهما بيتكلموا في الشوارع. الأطفال بطلوا يناموا بالليل, وكل الأرض فرحت قوي بالتغيير اللي عمله نزول القمر.

تلاتة بس كان نزول القمر بالنسبة لهم مصيبة. ودول كانوا تلات حرامية, مش بيعملوا حاجة غير أذية الناس. هما بيسرقوا بالليل في الضلمة, فلما القمر يبقى قريب قوي كده وينور كل الدنيا فده مؤكد شيء مؤذي ليهم.

اقترح أول حرامي إنهم يحاولوا يرفعوا القمر فوق تاني, راحوا عنده وفضلوا يزقوا فيه, يزقوا فيه, بس زي ما انتم عارفين القمر تقيل قوي.

التاني اقترح إنهم يغطوا القمر بالليل فالدنيا تضلم وبالتالي يعرفوا يسرقوا. جمعوا كل السجاد والملايات وكل القماش اللي قدروا عليه, بس القمر كان كبير قوي ونوره فضل ساطع وبيطلع من كل حتة.

الحرامية بقوا قلقانين قوي, يعملوا إيه يعملوا إيه, الأيام بتعدي وفلوسهم بتخلص وهما عاوزين ينهبوا حبة كمان. قال تانيهم "يظهر يا جماعة مافيش قدامنا غير إننا نشتغل" فضلوا كلهم يعيطوا بعد الجملة دي لحد ما تالتهم قال إنه عنده فكرة.

واقترح إنهم يكسروا القمر حتت فيعرفوا يخبوه من الناس. خدوا كل الشواكيش والأزاميل وكل حاجة ينفع يكسروا بيها وطلعوا فوق القمر لكن ما قدروش.

عدت الأيام والحرامية بيفكروا, وينفذوا خططهم لكن ما عرفوش يعملوا حاجة, لحد ما أولهم قال إن الحل الوحيد إنهم يطفوا القمر, واحد فيهم قعد ينفخ والتاني جاب خرطوم مية وفضل يرش على القمر, والتالت فضل يرش عليه تراب. الغريبة إن القمر اتطفى. وشوية وطلع منه صوت فرقعة جامدة واتفلق نصين, الشرطة جات تجري على مكان الصوت وقبضت على الحرامية اللي فضلوا سنين يسرقوا في أهل البلد.

من فوق كان فيه قمر شايف كل اللي بيحصل, اتغير لونه الدهبي واتحول للون الأبيض الشاحب من الحزن على أخوه, لكنه فضل منور, وفضل فوق فوق فووووق وأخد وعد على نفسه إنه عمره ما هاينزل تحت.

تمت

ليلة سعيييدة عليكم

:)