مراخير طويلة

دي حدوتة للبنات الحلوين, الولاد الوحشين الكلبين مش يقروا. ولو قروا, مش يعلقوا. ولو علقوا, يقولوا كلام حلو..

كان فيه ملك جميل ووسيم ومعجب بنفسه خالص خالص جداً يعني. كل ما يشوف مراية يقف قدامها يسبسب شعره، ويتملى في جماله.

في يوم كان الملك ماشي في الغابة هو وحراسه, فشاف واحدة ست عجوزة جدا جدا. بص عليها كده وقالها:

- "انتي يا ست يا عجوزة انتي.. كل دي مراخير؟!! مش معقول, ده مراخيرك أطول من دراعك".

الكلام ما كانش فيه حاجة تضحك بس حرس الملك كان لازم يضحكوا لما لقوه بيضحك. الست وقفت ورفعت شعرها الرمادي من على عينيها ورفعت صولجان كان في إيدها في وش الملك, وقالت كلام مش مفهوم, وبعدها قالت له:

- مراخير المحروس هاتبقى أكبر من البرطوش, ومش هايرجع لأصله غير لما يقر ويعترف إنه مراخيره كبيرة, يا ملك الجزيرة.

الملك فهم على طول إنها ساحرة ووشه جاب ألوان.. لكن قبل ما يقول لحراسه يقبضوا عليها كانت الساحرة اختفت. الراجل بقى في ورطة كبيرة, لأن مراته حامل في ولي العهد. كان الوزير جبنه فقاله:

- يا مولاي, ولي العهد لو جه بمراخير كبيرة فعلاً فأول ما هايبص في مراية لما يبقى عنده تلات سنين حايعرف إنها كبيرة والمشكلة كلها هاتنتهي. السحر ده ضعيف قوي ومش هايستمر.

- انت شايف كده يا وزير

- طبعاً يا مولاي.

لما الملكة جابت المحروس كان جميل جداً, عينيه زرق زي مية البحر, وشعره بلون الدهب, لكن مناخيره كانت أكبر من رجله.. حاجة غريبة فعلاً.. كل اللي كان يبص عليه يلاحظ مناخيره أول حاجة, فيكتم الضحكة ويقول "الله.. يا حكمتك يا ربي". الملك لاحظ الحكاية دي, فابتدى يمرض بعد ما حس إنه ضيع مستقبل ابنه لأن الشعب هايتمسخر عليه لما يمسك الحكم.

لما بقى عمر الأمير تلات سنين كان الملك ودع. المرض والضيق هلكوه. الملكة ورجال البلاط خافوا على ولي العهد إنه يموت زي أبوه من الاكتئاب والزعل, فملوا القصر برسومات للملك المتوفي بعد ما طولوا مناخيره, ورسومات لبنات حلوين مناخيرهم كبيرة برضه. كمان رجال البلاط اللي كانوا طمعانين في رضا الملكة كانوا بيقعدوا يشدوا في مناخيرهم ليل نهار عشان تطول. وبكده لما تشوفهم الملكة ترضى عليهم. كان كل اللي حوالين الأمير بيحاولوا يحسسوه إن المناخير الطويلة قمة الجمال.. ويقعدوا يقولوله إنهم نفسهم في مناخير زي مناخيره.

علماء التاريخ قعدوا يدوروا في الكتب على العظماء اللي مناخيرهم كبيرة وابتدوا يعلموا قصص العظماء دول في المناهج للأطفال اللي من سن الأمير وللأمير نفسه, عشان لما الأمير يمسك الحكم يبقى واثق في نفسه والناس تبقى معجبة بيه. رجال الدين قعدوا يوعظوا في الناس ويقولولهم إن ربنا بيدي كل واحد على أد مناخيره. علماء النفس قالوا إن طول المناخير يدل على قوة الشخصية, والثبات الإنفعالي والصحة البدنية كمان.

لما الأمير كبر وكان لازم يختار عروسة ويتولى الحكم, أمه جابتله يجي ميت لوحة لميت عروسة, لكن كلهم كانت مناخيرهم أد التوتة. الأمير قال:

- كلهم وحشين. أنا عايز واحدة مراخيرها زي مراخيري.. مراخير طويلة وكبيرة تدل على العظمة والشموخ وقوة الشخصية.

طبعا وصيفات الملكة كتموا ضحكتهم بالعافية, وبعدين الملكة شاورتله على صورة واحدة غير المية. كانت دي صورة الأميرة بنت ملك البلاد البعيدة. قالت له إن مناخيرها صغيرة, لكن بيقولوا عليها إنها فعلا بنت شخصيتها قوية, وجدعة وبنت بلد كده وحاجات من دي يعني.

الأمير لما شاف الصورة اتوهم, وقال إنه عايز من ده. أمه قالت له إنه لازم يسافر عشان يخطبها. فبدأ رحلة مدتها سنة على ضهر حصان, كان كل يوم يصحى من النوم ويبص في الصورة ويقولها "آه بس لو مراخيرك زي مراخيري.. لكن أقول إيه؟ الحلو ما يكملشي".

الأمير لاحظ حاجة وهو ماشي بين البلاد. لاحظ إنه كل ما يدخل بلد الناس بتضحك لما تشوفه. بقى نفسه يعرف السبب, حراسه قالوله إن الناس مش بتضحك عليه, لكن هما سعدا بس بوصوله.. عشان كده كان بيبتسم ببلاهة ويرفع إيده يسلم والناس تضحك أكتر.

لما وصل لقصر ملك البلاد البعيدة لقى مصيبة كبيرة خالص, خالص. الأميرة اتخطفت, وبيقولوا إن اللي خطفتها الساحرة الشريرة. قعد الأمير سنتين يدور في الغابات والصحاري لحد ما وصلها, فلقاها مسجونة في بيت قزاز. لما قرب منها حس بشعور جارف بالحب. كان فيه فتحة في حيطان البيت تقدر تبص عليه منها بنص وشها أو ممكن تطلع منها إيد من إيديها. سمعت كلامه وحكايته, ويظهر إنها بدأت تحبه. بس كانت عينيها على طول بتبص على أطول مناخير شافتها في حياتها. الأمير لاحظ. بص في صورته المنعكسة على الحيطة القزاز.. وقالها.

- مالك؟ بتبصي على مراخيري ليه جامد كده؟ مش عجباكي يا روح الملكة؟!!! دي أحلى مراخير في التاريخ.

الأميرة كانت مؤدبة, وبنت ناس فمرضيتش ترد عليه. بس مديتله إيدها عشان يبوسها (وده كان سلو بلدهم يعني). الأمير جه يبوس إيدها ما عرفش من مناخيره. فقال:

- تخيلي.. انتي مراخيرك حلوة فعلاً.. وأنا لازم أعترف إن مراخيري طويلة وشكلها مش حلو.. بس أنا نفسي تقبليني. المراخير دي خلقة ربنا.. ما ليش يد فيها.. لكن أنا أقدر أسعدك, لأني باحبك وفضلت سنين أدور عليكي بدون يأس.

الأميرة قالت له:

- إنت نبيل قوي.. وأنا قررت أتجوزك وأستحمل مناخيرك الطويلة دي. بس اوعى تكون بتنف كتير.. عشان مش ناقصة قرف.

الأمير والأميرة ضحكوا, ومع ضحكتهم اتكسر البيت القزاز.. ولأنه اعترف أخيراً بإن مناخيره طويلة فعلى طول السحر ابتدى يتفك ورجع جميل تاني.

وفأجة طلعت الساحرة من الهوا وهي هاتتجنن, قالت إنها عملت كل حاجة عشان تبعدهم عن بعض, وعشان الأمير ما يشوفش حقيقته في عنين الأميرة, ونكدت عليها عشان ماتضحكشي فيتفك السحر, ومع ذلك هما عرفوا يضحكوا ويخرجوا من الأزمة الكبيرة دي. الساحرة قالت كلام كتير مش مفهوم وحطت صولجانها على راسها وحرقت نفسها.

المهم بقى, إن الأمير اتجوز الأميرة, واتعملهم فرح كبير. بس كان فيه مجهودات كبيرة لازم تتعمل عشان يقنعوا الشعب إن "المراخير" لا تدل على أي شيء من صفات الفرد.

توتا توتا

تصبحوا على خييير

:)