إيزولد

أقمت هذه المدونة قبل أكثر من عامين, ولم أعط عنوانها لأحد, وكانت المفاجأة في أحد الأيام أن زارتني فتاة تدعو نفسها واندرر. من اللحظة الأولى أدركت أنني أمام شخصية واعية. كانت تتحدث عن الاستشراق وأشياء فوق مستوى فهمي, انبهرت عندما دخلت مدونتها بقدرتها على التعبير عن نفسها بالإنجليزية. واندرر والتي غيرت اسمها بعد ذلك إلى هالو ثم إيزولد لم تكن مجرد قارئة للمدونة, فتعليقاتها أعطتني الكثير من الثقة في أن ما أكتبه يستحق القراءة. هي أقدم زوار هذه المدونة من الذين التقيت بهم على الإنترنت, ولا أذكر أنها تركت تدوينة إلا وعلقت عليها وأعطت رأيها بلا مجاملة.

تعلمت من إيزولد أن الفرحة لا تأتي للإنسان وإنما هو يخلقها. فأنا لاحظت من خلال تعليقاتها وتدويناتها أن لديها الكثير من الأشياء التي تدعوها للحزن, لكنها مع هذا كانت تكتب تعليقات مليئة بالسعادة والسرور.

بقي عشرة أيام على سفر إيزولد إلى الولايات المتحدة, طبقاً لما هو مكتوب في مدونتها. أرى أن تعليقاتها أصبحت مليئة بالقلق والتوتر وربما الحزن أيضاً. اليوم أريد أن أرد لها جزءاً من تشجيعها ودعمها لي.لذا فأنا أدعوكم إلى زيارتها, والدعاء لها معي بأن يحفظها الله في سفرها عن يمينها وعن يسارها ومن خلفها ومن أمامها ومن تحتها ومن فوقها, وأن يحميها الله من نفسها. كما أدعوكم إلى الدخول إلى مدونتها كي تقتربوا منها أكثر. صلوا لإيزولد بظهر الغيب بما شئتم من الدعاء, ولا تنسوني أنا أيضاً.

اليوم أنا أهديها هذه الحدوتة, لربما أستطيع أن أرسم ابتسامة على شفتيها, وأرجو ألا يعلق أحد على هذه التدوينة قبلها, فاليوم يومها, والحفل هنا منعقد من أجلها.

ملك قلوب القطط

 

في يوم من ذات الأيام نزلت أميرة القطط للشارع ومعاها وصيفاتها والحراس.. من بعيد شافت قط مشمشي وسيم قوي. هي كانت قطة بيضة وحلوة كمان. العين جات في العين, والقلب سلم على القلب. القط وهو في عز سعادته ما بصش قدامه وهو بيعدي الطريق فجات عربية من بعيد قوي وداست على رجله.

أميرة القطط قلقت عليه قوي, لكن حراسها قالولها إن الاختلاط بعامة القطط يخالف تعاليم أبوها الملك, ووصيفاتها استعجبوا قوي من إنها حست بكل الألم ده عشان حتة قط في الشارع لا راح ولا جه.

في اليوم اللي بعده كان قط حكايتنا واللي اسمه طقطق عند دكتور القطاقيط اللي قاله:

- أنا هاعالجك بس عشان انت صعبت عليا.. لكن الجبس ده المفروض يتدفع عليه أكتر من خمس فيران ميتين أو تلاتة حيين.

طقطق ما كانش قط عادي, هو كان من عيلة كبيرة, من بلاد بعيدة قوي, وكان من تقاليد عيلته إنهم ما ياكلوش من الزبالة في الشارع. هما كانوا بيعتمدوا على صيد القطط. لكن طقطق ما كانش بيحب يصطاد الفيران عشان هو كان على عكس بقية القطط بيحب الفيران, والكلاب وكل حاجة حواليه. بعد ما رجله اتجبست طقطق صمم إنه ما يخالفش مبادئ العيلة وإنه لو هايموت مش هاياكل من الزبالة. يوم ورا يوم الأكل اللي كان شايله في القط فريزر (أصلهم ما كانش عندهم ديب فريزر هههه) قرب يخلص.

طقطق قرر يطلع لشارع المدينة. هو بيحب الناس كلها, وبيحب كل شيء حواليه. من زمان وهو نفسه يعرف طريق الرجوع لبلده لكن ما باليد حيلة. المهم هو قرر إنه يحاول يتصاحب على أي أسرة تستضيفه عندها, عشان يحبهم ويحبوه, ويفرح بيهم ويفرحوا بيه, لكن حظه كان وحش قوي قوي, لأنه قابل شوية عيال أشقيا خالص كانوا بيحبوا يلعبوا بالحونات.. فمسكوه من ديله وفضلوا يلفوه في الهوا ويسيبوه فيخبط في الحيطة, ويلفوه ويسيبوه ويخبط في الحيطة.

طقطق ما ردش الإساءة بالإساءة وما رضيش يخربشهم.. هو بس أخد بعضه ومشي بعيد بعيد.

الأيام عدت, حلوة ووحشة وطقطق رجله خفت بس كانت بتعرج حبة نونو كده. هو كان مثقف قوي, كل يوم كان بيقعد يقرا في تراث أجداده القطاقيط, وبعد ما يقرا يفتكر أميرته, ويسأل نفسه يا ترى هي فاكراه ولا لأ.

الأميرة من قصرها كانت بتبص في بلورتها السحرية وتشوف طقطق وهو كل يوم بتحصل معاه حاجات تقطع القلب.. لكن كانت بتحاول تراعي تقاليد القصر, وما تجيبش لنفسها مشاكل كتيير.

مرت الأيام وعنين طقطق ضعفت من كتر القراية, راح لدكتور العيون المقطقطة فقاله إنه محتاج نضارة قططي, وإنها هاتكلفه عشرين فار. لكن إزاي يعني يصطاد وهو بيحب الفيران؟ طقطق وحيد في المدينة ومعهوش اللي يساعده, فقرر إنه عشان يعيش لازم يكون قاسي. وقال إنه هايعتمد على نفسه وهايصطاد الفيران عشان يشتري النضارة. من بعيد شاف حاجتين سود كده افتكرهم فيران, ولما قرب منهم طلعوا كلاب سودا كبيرة طلعت تجري وراه وما سابوهوش غير لما إدوله علقة نضيفة.

الأميرة كانت شايفة الكلام ده من بعيد وصعب عليها طقطق قوي فقررت تستحمل كل اللي هايحصلها وأمرت الحراس إنهم يروحوا يخلصوه من الكلاب ويجيبوه.

لما وصل طقطق القصر كان مليان جروح كتيرة والدكاترة الملكيين قالوا إنه مش هايعيش كتير. الأميرة كانت عارفة إنها بتحبه قوي فقررت تخلي آخر أيامه حلوة قوي. قعدت هي وعلماء القصر يفكروا في طريقة يخلوا طقطق بيها يشوف أهله قبل ما يموت. هو عاش طول حياته وحيد, ولو شافهم هايبقى ده حاجة هاتفرحه أكيد.

العلما قالوا إنهم عندهم الحال, فعملوا نضارة لطقطق وركبوا في حيطان القصر مرايات ضخمة مقعرة ومحدبة عشان لما يعدي وسطها يشوف قطط شبهه كتير. الأميرة وقفت في الناحية التانية من السفرة وطقطق قعد في وشها, والشاش حواليه داير ما يدور.. قالت له إنها بتحبه, وقال إنه بيحبها.. مشوا مع بعض في القصر فشاف أجداده القطاقيط.. وفجأة وهو ماسك إيدها, حس إن اللحظة جت, وإنه بيموت. بص عليها وقالها إنه ما كانش خايف يموت, وإنما كان خايف يموت من غير ما حد يقوله "باحبك".. الأميرة فضلت تقوله إنها بتحبه لغاية ما فستك (يعني مات هههه)

هي كانت هاتموت عليه من الزعل, وقررت تخلد ذكراه فأمرت النحاتين يعملوله تمثال. كان التمثال لقط ملفوف بالشاش وخارج من صدره قلب كبير. في كل عيد حب, كانوا القطاقيط والقطقوطات اللي بيدوروا على حد يحبهم بييجوا ويقفوا عند التمثال ويقولوا أمنيتهم. اتقال في مدينة القطط إن التمثال ده كان له مفعول سحري, وإن كل اللي بيدور على الحب ممكن يلاقيه حوالين التمثال.