أغسطس 11، 2009

حاجة غريبة والله (2)

radiohead أحياناً كثيرة تشعر أنك الوحيد في العالم الذي لا يعلم أي شيء على الإطلاق. أنا مثلاً استيقظت في صبيحة أحد الأيام لأجد كل الناس يتكلمون عن الفيس بوك والذي لم أكن قد شرفت بزيارته قبل عامين. في هذا اليوم شعرت أنني لو فتحت الحلة التي تطبخ فيها أمي لوجدت معلومة عن هذا الموقع. كان الجميع يتحدثون عنه, وكأني أنا الوحيد الذي وقعت من فوهة الزمن. وعندما سجلت في الفيس بوك اكتشفت أن جميع أصدقائي هناك.. حتى الجهلة منهم بالحاسب الآلي والإنترنت (من وجهة نظري على الأقل). ساعتها شعرت بأن محمد سعد (الشهير باللمبي) والذي لا أطيق مشاهدته يوجه لي جملته الشهيرة في هذا الإعلان الرمضاني قائلاً "انت قاعد هنا والناس كلها راحت الأوبرا".

بالأمس استمعت إلى فرقة راديوهيد Radiohead. لم تعجبني موسيقاهم بطيئة الإيقاع ولم أجد تميزاً في أصواتهم, لكنني وجدت العالم كله يتحدث عنهم. تساءلت على الفور عن الجديد الذي أتوا به. ثم اكتشفت أنهم يختارون كلماتهم بعناية. أعجبتني لهم أغنية بعنوان Down is the new up. وجدت بها الكثير من الأمل والتفاؤل. بالإضافة إلى ذلك فهم ينتهجون نهجاً مغايراً في تصوير أغانيهم.. فهم يستخدمون الأشكال المجردة ثلاثية الأبعاد وجرافيك غريب الشكل في حين مازلنا نحن نجذب المشاهد باستخدام تقنية "المزز" عالية الكفاءة!!

الأكثر من ذلك, وربما هذا هو سبب الانتشار المريع لهم في الآونة الأخيرة, هو أنهم يبيعون ألبوماتهم الغنائية بشكل غريب جداً. فهم يتيحون الألبوم على موقعهم بسعر يتراوح من صفر دولار إلى 100 دولار تقريباً. أي أن على المشتري أن يحدد قيمة المنتج. العجيب أنه بالرغم من أن 3 من بين كل خمسة أشخاص نزلوا الألبوم لم يدفعوا, فمن دفعوا وحدهم جعلوا الفريق يكسب 6 مليون دولار في أسبوع واحد من إصدار ألبومهم In Rainbows ويقدر ما يدفعه الفرد في المتوسط مقابل الألبوم 1.11 دولاراً وهو ما يزيد على القيمة التي كانوا سيتقاضونها في حال نشر المنتج بالطريقة العادية في السوق.

جملة واحدة تتردد الآن في عقلي.. مؤكد أنكم تعرفونها.. أيوة

حاجة غريبة والله

هناك 16 تعليقًا:

جمال عمارة يقول...

فعلاً حاجة غريبة.. :)

الواحد علشان يلم بكل اللي بيحصل حواليه يبقى مش ها يشتغل.. العالم بيتحرك بسرعة محمومة.. ولازم الإنسان يكون متفرغ تماماً فقط لكي يتابع ما يحدث ناهيك عن البراعة فيه..

يعني مثلاً.. تلم بالفيس بوك تلاقي طلع لك تويتر.. تلم بتويتر تلاقي لينكد إن.. وهكذا..

بس لطيفة فكرة إن المستخدم يحدد سعر الألبوم دي..

تخيل لو فيه حد طبقها عندنا في العالم العربي.. :)

أحمد الشمسي يقول...

عمرو انت حيرتني، ما بقتش عارف ايه هو بالزبط اللي انت شايفه عالي الكفاءة؟ التقنية ولا المزز؟ ههههه

بالمناسبة مالها تقنية المزز؟! ها؟ ماله اللعب في المضمون؟ انت عايز الغنا عندنا يرتاد مناطق التجريب لا سمح الله، ويستخدم تقنيات تانية وفي الآخر يخسر؟ ما سألتش نفسك ليه عمرو دياب مثلا من ساعة ما ظهر ما فيش ولا ألبوم عنده فيه أغنية واحدة إنسانية أو قيمية بره اللون الواحد العاطفي اللي شغال فيه حتى لما بقى عنده ستين سنة؟ ما فكرتش ليه ممكن يعمل سينجلز كتيرة عن فلسطين أو أغاني دينية بس مش في البوم؟ عشان دي بيقبض فلوسها الأول! عشان التنميط عندناهو اللي بيكسب! ولا انت عايز عمرو دياب يغني كلمات زي بتاعت وجيه عزيز او بلاك تيما وفي الآخر يحط شريطه ع النت ما حدش يشتريه؟

نتكلم جد شوية... انت اكتر واحد عارف ان الفاشلين بس هم اللي لسه بيستخدموا تقنية المزز عالية الكفاءة، عارف ان فيه ناس بطلت حتى تغني الكلام التقليد، المطلوب بس دلوقت ان الناس تحسم اختيارها، للأسف الناس عندنا برضه زي المطربين بيلعبوا في المضمون، وبيسمعوا اللي اتعودوا ان هم يسمعوه، الناس بره مؤهلة تسمع الفريق الجديد بتاعك، لكن الناس عندنا ممكن تسمع شرايط مقرفة لكن لناس تعرفها وما تغامرش انها تسمع كلام محترم لناس ما تعرفهاش

غير معرف يقول...

حقا؛ العالم أصبح قرية صغيرة .....
لكن ؛ أحيانا لا نستطيع أن نكتشف هذا العالم خوفا من المغامرة أو الخطأ أحيانا ؛ وأحيانا كثيرةللدقة.فالتكنولجيا لمن عرفها وهو كبير وكأنها مجاهل أفريقيا !!!!
قال لي أحدهم ذلك ، حين دار الحوار حول السواقة " السيارات " ؛ وأنه كلما كان السن صغيرا ؛ كان الخوف أقل ، فالأطفال يضعون إيديهم في النار "شبه عمرو وهو صغير " ؛ مفيش رهبة ؛ ؛

عموما الواحد خايف لا بعد كده ، بل ما نوس ع الزرار نسمع مزيكا ؛ المطرب بذات نفسيته ينزل من الزرار ؛ ويقول شبيك لبيك .....أما هتبقي حاجة غريبة والله ؛؛؛
ديدي

غير معرف يقول...

عندك حق
حاجه غريبه والله
للدرجه دية فرقه راديوهيد عندها ثقه في نفسها و في جمهورها عشان تسيب الجمهور يحدد سعر الالبوم.
بيتهيألي لو حصلت في مصر مش هيدفعوا مليم أصلا حتي لو كانت اغنية تستحق.
انت عارف فكرتني بالفيس بوك
عارف مين قالي عليه !
ماما قالتلي عليه مع ان مش ليها علاقه خالص بالنت والكمبيوتر
جت تقولي ما تشتركي في الفيس بوك :))
انا بحاول استغل الاجازه في اني اتابع التطور ( انا أصلا مقضياها نوم علطول عشان مش لاقية حاجه اعملها )
اية رأيك يا عمرو تكتب بوست عن الحاجات المفيده والمسلية الي الواحد ممكن يعملها في الصيف !
يلا افكار ببلاش أهي :))
aNgEL

enjy يقول...

لالالالا

تؤ تؤ تؤ تؤ

نو نو نو

غلطانييييييييييييييين الفرقة دى اوى جدا خالص...ييجوا يتعلموا من ايهاب توفيق اللى قال فى المؤتمر الصوحفى اللى اتعمل عشان البومة الجديد ..هنشوف مين هيضحك فى الاخر..وقد اعتمد الفنان الكبير ايهاب توفيق على مزز غاية فى الجمودية ومايوهات غاية فى السخونية وكلمات غاية فى السطحية وقد وافتنا بعض المصادر الغير مسؤولة ان الهبل-بكسر الهاء- بيضحكوا برضو...

نياااااااااااااهاهاهاهااااااااا

بص يا عمرو يا ضنايا..انا لازلت اجهل من دابة فى موضوع الفيس بوك دة ويا سبحان الله نص البشر ميقدروش يعيشوا حياتهم من غيره وانا عادى انى اتنفس تحت الماااااااااااء بدون هذا المدعو فيس بوك ومش ناقصنى اى حاجة..

مش لازم فيس بوك كفاية الستر والصحة واهم شىء راحة البال وعلى راى محمود المليجى مادام دة ابيض - مشيرا الى قلبه- ودعا الوالدين متخافش من حاجة..

نتكلم جد شوية؟؟؟؟؟

انا فعلا لا افقه اى شىء فى الفيس بوك وحتى حسابى صاحبتى الانتيخ هى اللى عاملاه مش انا ومبعرفش اتحرك ولا اتصرف جوة منه...وبجد فعلا ناس كتير اوى شايفين ان فايتنى نص عمرى وفايتنى حاجات كتير المفروض اشارك فيها منها حاجات حقا مهمة بس انا فعلا غير مهتمة بتنمية قدراتى الفيس بوكية..

اما عن الفرق الاجنبية فانا اخرى باك ستريت بويز..عارفة انى من زمن الحلبة بس اعمل ايه يعنى انا مش متابعة الحركة الفنية فى بلاد الافرنج..بحب اسمع سيلين ديون وبسمع اغانى متفرقة لمجرد انى انمى اللغة..بس بحب فرانك سيناترا وكينى روجرز ...

الا صحيح بما انك مترجم..انا اصلى اتخانقت مع الانستراكتور بتاع الكورس عشان بقوله ان تنمية اللغة بالاستماع ممكن تعتمد بشكل كبير على الاغانى عشان عنصر الجذب...لكن هو مش موافق وراسه والف جزمة قديمة ان السى ان ان هى الحل الامثل..

بينى وبينك كابتن ايمن دة خنيق اصلا..ايون كابتن مش مستر اصلى عقبال املتك باخد فى معهد اللغات التابع للقوات المسلحة..وايمن دة على راى اللمبى عقيد من وهو فى اولى ثانوى..

هو انا بعلق على ايه بالظبط معلش نسيت....اه حاجة غريبة..لا على فكرة مش غريبة خالص..

على فكرة هشام عباس عنده اغنية اسمها حاجة غريبة فى الالبوم الجديد..الاغنية لطيفة وهو شخصيا صوته لطيف اوى يعنى..

امممممممممم كفاية عليك كدة لوك لوك..اصلى مصدعة..نياااااااااااااهاهاهاهااا اومال لو مكنتش مصدعة كنت اتكلمت كام سنة

اقعد بالعافية

سلام

Isolde يقول...

هو ايه النظام، ها؟! انت ناوي تعمل سلسلة " حاجة غريبة و الله" و لا اييييه... حاجة غريبة و الله.

شوف يا سيدي، انا مش في دماغ اوي اتكلم جد او ادور عالفريق الجديد ده، بس فكرة ان المستمع يحدد سعر الشريط دي عبقرية... بس اول ما اروق كدة هادور عليه و اسمعه و اقوللك رأيي، و اديني رايحالهم اهو

اما عن الفيس بوك، ف انا عملته من باب العلم بالشئ، فضوا الهرة يعني مش اكتر، و ماعنديش اي مشكلة ف اني الغي الaccount بتاعي... بس انا سمعت، و الله اعلم، انه اللي عاملينه يهود و عايزين يعرفوا اكبر قدر من المعلومات عن شباب الامة دي، بس طيب ما الفيس بوك ف العالم كله، يعني كل الناس ف العالم بتستخدم الفيس بوك، هما اليهود فاضيين اوي كدة! حاجة غريبة و الله :)

عمرو يقول...

أهلا أستاذ جمال
والله معاك حق.. بس تعرف عندي مشكلة إضافية لما دخلت على تويتر مثلاً اللعبة نفسها ما عجبتنيش. ما حسيتش إنها مهمة أو حلوة أو جذابة, وقعدت أسأل إيه الحاجة لموقع الناس تقول فيه هي بتعمل إيه دلوقتي؟ حاجة غريبة والله

لو طبقنا حكاية تحديد سعر المنتج بواسطة العميل في العالم العربي هاتبقى النتيجة معروفة طبعاً ههههه
:)

عمرو يقول...

أحمد
انت عمرك شفت تقنية تبقى عالية الكفاءة.. أنا كلامي واضح جداً, ركز يا بوحميد
:)
انت لمست نقطة مهمة خالص يا أحمد. فعلاً حتى الزبون مش عايز يخاطر, يبقى المنمتج يخاطر ليه.. تعرف الحكاية دي محتاجة كوباية شاي ويتكتب فيها بوست تاني
:)

عمرو يقول...

ديدي
طيب ما أنا عرفت التكنولوجيا وأنا صغير. ده حتى بابا كان دايماً يقولي "ياعمرو سيب الروبوت يعملك الشاي عشان تتعود على استخدامه" وماما كانت دايماً بتستخدم معايا الجزمة الإليكترونية كوسيلة عقاب ومع ذلك لما كبرت لقيت التقنية بتتطور بشكل مش قادر ألاحقه
تعرفي أنا سمعت مرة عن التفكير في عمل داونلوود للهاردوير مش بس للسوفت وير
تخيلي؟!!
دي حاجة فعلاً غريبة

عمرو يقول...

أهلا فاطمة
:)
الأجازة.. امم
طيب أنا كده ممكن أحقد عليكي عشان انتي عارفة إني منفسن. أقولك إيه؟
آه
ممكن تروحي البحر
أو تقري مرارة روح عشر مرات كل يوم
أو تقري أي حاجة من الكتب التالية لو انتي بتحبي الأدب
عشاء برفقة عائشة لمحمد المنسي قنديل (القصة الأولى بس من المجموعة)
البستان لمحمد المخزنجي
واحة الغروب لبهاء طاهر
ثلاثية غرناطة لرضوى عاشور
أو تقضي الأجازة كلها تدوري على رواية جسر على نهر درينا ومش هاتلاقيها (إيفو أندريتش)
تحفظي قرآن
تاخدي درس في الموسيقى أو الخط العربي
تسافري

دي كلها حاجات مش بنقدر نعملها بشكل مكثف في غير الأجازات
:)

عمرو يقول...

أهلا إنجي
ناس كتير قوي اتعلمت اللغة من خلال الغنا.. منهم مثلاً يوسف شاهين الذي كان يتكلم الفرنسية كأحد أبناءها. الغنا أحد الطرق المهمة جدا لتعلم اللغة وإن كان لابد من دعمه بمصادر أخرى. زي البي بي سي كده
:)
الإنستراكتور بتاعك لو قرا في حياته حاجة عن تعليم اللغة ما كانش قال الكلام ده
تصدقي؟ أنا متغاظ دلوقتي. طيب أعمل إيه؟ ليه الناس بتفتي في اللي ما لهاش فيه بس
أوووووووووووف
أنا هاجيله أيمن ده مش عشان أناقشه, لا عشان أضربه
بس

بالنسبة لأغنية هشام عباس فأنا عارفها جميلة فعلا.. فيه أغنية تاني ليه اللي هي "عرفت إيه تاني ممكن أعمل إيه" ولا دي بتاعة حماقي
يظهر إني بدأت أخرف
:)

عمرو يقول...

أهلا إيزولد
جاء في وصف النبي عليه السلام أنه كان شديد الاندهاش. يعني لما كان يسمع أي حاجة تلاقيه يندهش بشكل كبير. أنا اكتشفت إن كل الناس الأذكيا كده. العالم فعلا مليان حاجات عادية للناس غريبة عند الأذكيا فقط وبالتالي الغرابات دي تستحق سلسلة
:)

عيب عليكي يا إيزولد وانتي مثقفة إنك تسيئي استخدام عقلك بالتفكير ولو لثانية في كلام زي يهود فيس بوك ده. يا بنتي قدراتك العقلية لابد من توجيهها في اتجاه يخدم الأمة. انتي ثروة
:)

طبعا واضح جدا في الكلام نظرية المؤامرة. مؤسس فيس بوك هو الأمريكي مارك زوكربيرج واسمه ده صعب خالص قوي يعني والله.. وعشان كده أنا باجرح إنه يهودي وسمى نفسه كده عشان يتعب شباب المسلمين في قرايته
هههههههههه
D:

(حطي خط تحت كل التعليق.. باهزر)
سلام

غير معرف يقول...

تحقد عليا لية بس
بصراحه الواحد يستحق الأجازه بعد اول سنه في كليتي دية حاجه صعبه موت
لو تحب تبدل انا موافقه انت تيجي كليتي وتاخد الاجازه ( بس هترجع تاني الدراسه )
وانا هاجي أترجم واخد مرتبك انا شاطره في الانجلش وبحبه :)
بس أشكرك علي كل الافكار الجميله دية
بس اصلا مفيش بحر هنا في قناه السويس ومش حلوة
ومراره روح قرتها من اول 2007 كتيييير
وبالنسبه للأدب في هنا مكتبه سوزي مبارك بدأت افكر أروحها بس رمضان قرب
والدروس بقي انا شبعت منها في الثانوية العامه
عندك افكار تانية ؟!
AngEL

عمرو يقول...

إينجيل
فيه حاجات تاني كتير.. زي مثلاً زيارة أهلك اللي مش بتزوريهم. زي إنك تروحي جيم. أو تعملي مشروع قراية أو إبداع من نوع تكوني بتحبيه
:)

Wild at Heart يقول...

You have to listen to "Creep.

Cheers.

عمرو يقول...

Hi Wild at Heart
I listened to it. u know wht? it seems tht I am a creep too. It seems tht i don't belong here. oh, How didn't I notice it before.
thx for recommending this marvelous piece
:)
ramadan kareem