أغسطس 06، 2009

الجميل الذي يليق عليه الغرام

love_love_love_by_narabia منذ الكثير من السنوات تغزل أشرف عبد المنعم في مقاله الفني الثابت بالصفحة الثانية من أهرام الجمعة بجملة في أغنية لمحمد فؤاد: "إنت الجميل اللي لايق عليه الغرام".. أغاظتني هذه الجملة تحديداً. فأنا لا أرى أن الغرام مثل الفساتين والقمصان تليق على شخص ولا تليق على آخر. مع هذا فبعد مرور الزمن بدأت أؤمن بهذه الجملة بشدة.

لقد اكتشفت بعد الكثير من السنوات أن هناك الكثير من الأشياء التي لابد من توافرها في الطرف الآخر كي "يليق عليه الغرام". فكل منا لديه صورة عقلية عن أوصاف هذا الطرف سواء وعينا ذلك أم لم نعيه. لكن مما تتشكل هذه الصورة؟ إنها تتشكل من الجمال والمال والنسب والذكاء/البناء الفكري, والبناء الجسدي, والسلوكيات, والقبول الروحي, والسلطة/النفوذ, والطبقة الاجتماعية والقائمة تطووووول.

بعد الكثير من السنين, وبعد تجارب تعلمت فيها بالطريقة الصعبة (طريقة المحاولة والخطأ) اكتشفت أن "الجميل اللي لايق عليه الغرام" بالنسبة لي هي فتاة تمتلك قدراً بسيطاً من الجمال, والبناء الجسدي, ولا يشترط أبداً أن يكون لديها أي قدر من المال, أو النفوذ, أو المستوى الاجتماعي المتميز, بينما يشترط أن تكون على قدر كبير من الذكاء والعلم والقبول الروحي. عرفت بعد الكثير من العذاب أن الفتاة المناسبة لي والتي سيليق عيها الغرام هي فتاة تضحك في الأزمات, وتتحدى الأيام, وتحب قراءة الأدب, وتحب الحواديت.. وفوق كل ذلك تتمتع بقبول عندي.

فكرت في بقية المتغيرات, وأنا أعتقد أن لدي أسباب منطقية تجعلني لا أبحث عنها. فإن تحدثنا عن النسب أو المال أوالمستوى الاجتماعي المتميز أو النفوذ, فأنا حين سأغلق الباب أنا وزوجتي المستقبلية, سوف نترك كل هذا خارج البيت وسأظل أنا وهي فقط. بالطبع لابد من توافر قدر معين من هذه الصفات.. قدر لا يجعل حياتنا تتكدر.

أما بالنسبة للجمال والبناء الجسدي, فأنا أعرف أن الحب يأتي بدونهما, بينما الجنس هو أمر إجرائي قد تأتي فيه المتعة بلا حب على الإطلاق. والمتعة الجنسية هي متعة قصيرة الزمن من وجهة نظري على محوريها الطولي والرأسي. فلا ينبغي أن نعطيها الكثير من الاهتمام.

هذه هي حسبتي للأمور, ولكل منا حسبته الخاصة به. أنا أبحث عن زوجة تصلح صديقة عمر قبل أن تصلح كحبيبة. فالحب عاطفة ملتهبة تسير على متصل سيني فتعطي شكلاً منحنياً قصيراً يصعد بقوة ويهبط بقوة أيضاً.

الاختيار يصبح أكثر تعقيداً حين نعلم أن الكثير من الناس يظهرون ما لا يبطنون, وتضعهم بيئاتهم الاجتماعية في مواضع زائفة لا ينبغي أن يشغلوها. فلا تعلم إن كان هذا الذي ترى هو من تنطبق عليه الصورة, أم أنه زيف وانطلت عليك الخدعة.

هناك مشكلة أخرى هي أن البشر يتفننون في التمييز بين أنفسهم, فإن وجدت الطرف الذي تبحث عنه فقد يقف بينكما حائل المنصب أو الطبقة أو النسب. تخيلوا معي أن يجد فردان بعضهما البعض فتنطبق الصورة الذهنية التي في عقل كل منهما على الآخر. هل يحدث هذا حقاً؟ نعم, يحدث.. وتزداد احتمالية حدوثه كلما قلت ثقافة الفرد, حيث تصبح توقعاته أقل, وصورة هذا الذي يليق عليه الغرام المتكونة في عقله أكثر بساطة. وتقل هذه الاحتمالية أكثر فأكثر, كلما على شأن الفرد, وازداد في المعرفة, حيث تتعقد ملامح الصورة, وتزداد المتطلبات والتوقعات.

الأكثر من ذلك, أن المرء إن استطاع أن يجد نصفه الآخر, وكان هذا النصف يناسبه على جميع المحاور, فقد لا يرضى الأهل لأسباب قد تكون ميتافيزيقية ما ورائية ليس لها علاقة بالواقع. أو قد يجد أن هذا الطرف غير مستعد للارتباط, أو يجده مرتبط بالفعل. يواتيني هنا بيت شعري كتبه أحد أصدقائي حيث قال: "بالدبلة قالت لي أنا مخطوبة.. وكلامها خبط زي الطوبة".

قد يؤدي ذلك كله إلى زواج والسلام, وهو أمر أخذت على نفسي عهداً ألا أقع فيه. "فالزواج والسلام" هو عقد واتفاق ضمني على العيش بطريقة سلمية بين طرفين, وتبادل المتعة الإجرائية والمسئوليات والواجبات. لا تتعجبون, فقد يصبح الزواج اتفاقاً مثل اتفاقات النفط مقابل الغذاء. وكما ترون, فالحب احتمال موجود, لكنه صعب التحقيق.. هو احتمال ضعيف.

كتبت هذه المقالة رداً على تعليق لزهرة الربيعية.. وأنا أهديها لها.

هناك 25 تعليقًا:

غير معرف يقول...

مع اني أول واحده اعلق
مش عارفه اقول اية خالص
حاسه اني لو اتكلمت هتقوقز خالص
وحسيت ان البوست كله قوقزه
كنت داخله المدونه مبتسمه بعد اما قريت مش عارفه ملامح وشي اتغيرت
هو البوست جميل و واقعي بس الواحد خلاص مبقاش عاوز يعيش في الواقع
الواقع دايما بيصدم بس مهم برضه نعيش فيه
ربنا يوفقك يا عمرو وتلاقي صديقه عمرك
عشان نحضر الفرح قريب بقي
شفت ادي حته بهججه :))
اه نسيت اقول
حمد الله علي السلامه
angel

زهره ربيعيه يقول...

استاذى العزيز..قد يقف قلمى حائرا وحيدا اول السطر..يعجز عن التحرك يمينا او يسارا..ان كان هذا المقال قد كتب خصيصا لاجل الاف الاسئله التى وقف عقلى عاجزا عن الرد عليها فلى اذن حق الحديث بحريه..نعم ياسيدى تربيت منذ الصغر على الحواديت ونعم ارضعتنى امى حواديتها وانا بعد طفلة فى المهد..كانت تخبرنى انى ست الحسن والجمال التى ليست جميله فى الملامح بقدر كونى جميله من الداخل..والف نعم ان الحياه لاتؤمن الا بجمال الشكل..وكم انتظرت ايام طوال فوق سطورى ان ياتى فارسى البعيد على صهوة جواده ليختطفنى الى دنياه التى اعرف كل تفاصيلها قبل ان القاه..لا اعرف من هو..ولا اى ملمح عنه..انما اعرف ان لى قلب يملكه ومشاعر لا تخص سواه
احببته ولست ادرى عن حسابات الواقع شيئا ولا يهمنى البته اى شكل يتشكل منه الواقع..اريده ان ياتى بلا هويه ليصبح قلبى هويته..لا اطلب الكثير ولا اريد الكثير..واثق تماما بوجود الحب
الحب يا سيدى هو الشىء الذى يجعلنا نحيا فى احلك الظروف ونبتسم حتى لو اغلق الحزن ابوابه علينا..الحب بذاته وليس شرطا ان يوجد الحبيب لكى نحب..ماذا ان احببت طيفا تعلم يقينا مسبقا بانه سياتى
انا اعلم ان الشاطر حسن موجود وسياتى ..انه المعجزه التى اعلم مسبقابحدوثها
لست ادرى كيف اشكرك على كلماتك التى منحتنى املا كبيرا فى الحياه..فانت اذن توافقنى ان الحب موجود...؟
انا مثلك اخذت على نفسى عهدا الايكون زواجى صفقه..يمد فيها اخى يده ليقبل زواجى ممن يدفع اكثر..ووضعت اول شروطى ان يكون حبيبى هو زوجى الذى سيكون سطرا من حدوتة تليق بى..حدوتة انا اكتبها باتقان..
اشياء كثيره جرحتنى..وفاة ابى ودراستى والاف الاشياء الاخرى..لكننى تعلمت منها ان اكون اقوى منها..
فى كوكبى البعيد هناك معان اخرى لا تشبه الواقع باى شكل
كلماتك جعلتنى اتطلع للمستقبل اكثر..نعم ساكتب للشاطر حسن كما افعل كل ليله..سانتظره خلف النافذة الزجاجيه.سياتى يوماليقرايومياتى..ويشاركنى قطعة شكولاته..وحبى للمطر ..سياتى ليملك مشاعر اكون فقيرة بدونها...فانا لا املك سواها
اعلم انه سياتى..وسيكذب ادعاؤتهم..حتى امى التى تحاول ان تخبرنى ان حدوتة الشاطر حسن كانت مجرد حدوته..ستعلم يوما ما ان جنونى هو بعض تعقل..
اخجلت كلماتى بما كتبته..لكننى اسعد ما يكون اليوم..يكفى ان هناك من يتفق معى ان الحب ليس بالمظاهر او الشكليات
اليوم انا اعلم اننى على حق..واننى يوما ما لن اكون علامة استفهام تقف مستوحده فى نهاية السطر

اذكر ما كتبه فاروق جويده
وعشنا العمر ساعات
فلم نقبض لها ثمنا
ولم ندفع لها دينا
ولم نحسب مشاعرنا
ككل الناس فى الميزان


الف مليون شكر.
كلامك احلى من مليون حدوته ومليون شكولاته..فرحتنى..وادتنى امل فى ان كوكبى لسه بخير..ربنا يسعد ايامك ويحققلك كل اللى نفسك فيه

زهره ربيعيه يقول...

نسيت ان اقول ان كلماتك دوما تاتينى مثل نغمات السيمفونيه تعلو لتنخفض فى انحدار لذيذ..فيستمتع القارىء وعيناه تلتهم السطور والفضول يلهبه لكى يصل لاخر كلمه يقف عندها قلمك..وحينما يصل يقطب ما بين حاجبيه حزينا لانك انتهيت..فكلماتك لا تجعلنا نشعر بمرور الوقت..
نسيت ان الفت نظرك الى التنويه الذى القيته بالامس الى انك ستكتب هذه التدوينه فى حوالى الخامسه عصرا فقد انتظرتها طويلا حتى غلبنى النوم..لكننا نسامحك فقد يكون لديك عذر..
بالنسبه لما كتبه اشرف عبد المنعم فلن تصدقنى ان اخبرتك اننى قد قرات هذا المقال وقد استفزتنى نفس الجمله حينها..واننى بالفعل اقتنعت بمرور الوقت بان الحب كما اقول دوما..له ناسه..هههههههههه وان الذين مثلى لا يصلحون للحب المشوه الموجود فى واقعنا..فهو مجرد عبارات مستهلكه لاتاتى بنتيجتها المرجوه معى..
الحياه كما اعرفها بضعة خيالات ممزوجه بابتسامات صافيه وضحكات عاليه..ومعها كام سطر اكتبه لحبيب مجهول وكام قطعة شكولاته وحدوته
لا تعتقد ان الحياه تحتمل اكثر من ذلك..اخرها الموت على راى ماما

معلش ع الرغى..
:)

Isolde يقول...

يعني هو انا عايزة اتخانق معاك بسبب كام حاجة كدة ف البوست ده، بس هاقرا مرة كمان و ارجعللك، عشان ابقي بريئة من ذنبك لما اكسر لك المحل، قصدي المدونة (وش مدخّن)

enjy يقول...

اشطاااااااااااااط

كدة يا باشا تفضيلى نفسك بتاع جمعتين لانى فعلا هلوك لوك كتير وانت اللى جبته لنفسك

اصلى رومانسيكية اوى اوى لا مؤاخذة ولازمن وحتمن ولابد اقول وجهة نظرى..هناك سبب اخر وهو انى قررت انى لازم منامش طول الوقت او مفكرش فى النوم طول الوقت فلازم اشغل نفسى بحاجات لذيذة وانت مدونتك لذيذة وانت شخصيا لذيذ وعلى رأى عادل امام مع مرق الكوسة العجيب..الذذذذذذ الذذذذذذ...يللا ما علينا نبتدى فى الكلام حيث انى مش برغى على قلبك خالص وهرغى النهاردة..فشر فشر يعنى نيااااااهاهاهااااااا


اولا:جملة انت الجميل اللى لايق عليه الغرام..اول ما سمعتها حبيتها..ملحوظة..كنت من متابعى اشرف عبد المنعم بشدة قبل متوقف عن شراء الاهرام حفاظا على المرارة..المهم..الجملة دى كانت عجبانى اوى..ليييييييييييه بقى عشان الالبوم دة كله كان عاجبنى لييييييييييه بقى؟؟ عشان كنت ايامها فى ثانوية عامة وكنت بحب مدرس علم النفس بتاعى اوى والالبوم دة كنت بسمعه وانا بكوى هدومى ونازلة الدرس..ما علينا بلاش حكاوى المراهقة دى..المهم انى كنت مقتنعة فعلا بالموضوع وان فى ناس لايق عليهم الغرام وناس لا يعععععع وحشين..

طبعا دة الجزء الهلس من المناقشة..نناقش بقى الموضوع الاصلى

احيانا بنقابل حد لا تنطبق عليه الصورة العقلية ظاهريا لكن ممكن نحبه عشان سبب موجود جوانا احنا وبس..فى الغالب بيكون نوع من انواع الهشاشة النفسية والاحتياج لاى شريك فى الحياة وخلاص..حد نشترك معاه فى الاحلام بالعافية..حد نتخانق معاه عشان سبب اهبل..حد نتغاظ منه عشان سبب منطقى جدا من وجهة نظرك..بس بنفوق بعد شوية الشوية دول بيحددهم كم انت منطقى فى العادة..ومدى اقتناعك بوجهات نظرك المسبقة

اما عن الصورة العقلية اللى بنتمسك بيها بعد عدة محاولات..اعتقد اننا بنتمسك بيها هروبا من مزنق - ايوة مزنق- عيشة والسلام..انا شخصيا عيشة والسلام دى بالنسبة لى جملة عقيمة حتى مش بتوفر لنا العيشة..

مبحبش جملة فتى احلام لكن كل حد فينا له خطوط عريضة بيدور فى اتجاهها..يعنى الجميل اللى لايق عليه الغرام بالنسبة لى هو شخص يمتلك قدرا قليلا من الوسامة وكما هائلا من القبول النفسى ..لا يمتلك نفوذ من الاصل حيث انى اكره كل ما يتعلق بالسيطرة والمسيطرين..احواله المادية تكون احواله هو مش احوال بابا اللى خرج عالمعاش..يشترط ان يكون على مستوى عالى من الثقافة..قارىء نهم..يفوقنى علما فى كل شىء..احسن متى فى كل حاجة..شخص اتعلم منه واكون واثقة ان عنده معظم الاجابات عن معظم اسألتى..

من سيليق عليه الغرام هو شخص عنيه طيبة..مدخن..طيب..صايع جدا بس ابن ناس..الوصف دة معقد شوية بس ضرورى..

من سيليق عليه الغرام لازم يبقى فاهم كل حاجة وبيستهبل كتير..

من سيليق عليه الغرام لازم يبقى شخص بيقدر اصحابه و علاقاته الاجتماعية متشعبة وليه اصحاب بنات كتير..

من سيليق عليه الغرام لازم يكون بيفهم كويس فى الناس وعنده فراسة وبيحس مين اللى بيقدره ومين لا..

من سيليق عليه الغرام لازم يعرف ايه انسب الهدايا ويعب اوى عشان يجيبلى هدية تليق على ذوقى ويدور كتييييييييييييير عشان يجيبلى اللون الازرق..لازم يكون عارف نوع الهدايا اللى بتعجبنى ويكون عارف الحاجات اللى محتاجاها..من سيليق عليه الغرام يجب الا يرهقنى فى ابداء سعادة بهدية لا تسعدنى ولكن اسعد مجاملة مقابل تعبه والمال المدفوع..

اما بالنسبة للشكل والبناء الجسدى..ممكن جدا الحب ييجى من غيرهم خاصة وان الحب حاجة والجنس فى مفهومه المجرد حاجة تانية..يعنى العلاقات الجسدية المجردة بنتهتى بسرعة بس العلاقات الجسدية المسبوقة بعلاقات روحية اعتقد بتزداد عمق مع الوقت..

كلمة زوج كلمة كبيرة اوى على فهمى المتواضع للامور..شريك كلمة اخف بتخفف حدة الهلع..وبعدين كلمة شريك هى اللى تبين اننا لازم نكون اصحاب انتيم..

احيان كتيييييييير الشخص المناسب بييجى فى الوقت الغير مناسب..يعنى تحب حد وانت عارف انك مش واقع على شبكيته اصلا..عنيه مش جايباك مع انكوا تعرفوا بعض كويس..او فى الوقت المناسب ييجى شخص غير مناسب وتحس انك معمول لك عمل بقى ولازم يتفك الصراحة مش كدة يعنى..


موضوع تانى بقى يتعلق بالمحور الاساسى لكلامك بشكل او باخر..توقعاتنا تجاه ومن الشريك ساعات بتخرب الدنيا

مهما كنتوا على نفس الموجة لازم مترفعش سقف توقعاتك اوى منه عشان ممكن مياخدش باله ويخذلك..دة فى كل العلاقات مش الحب بس..التوقعات هى اسوأ مرض ممكن يصيب علاقة كويسة ويبوظها بنجاح ساحق..

enjy يقول...

علاقة الزواج علاقة اتفاق ضمنى فعلا..بس اتفاق ضمنى انها متكونش اتفاق بشروط..لازم كل حاجة تبقى ماشية بنعومة وسلاسة..لازم ميكونش فى اتفاق على المتع الاجرائية من اى اتجاه..

اعتقد ان الجواز هيبقى اظرف لو سبناها هايصة كدة وربنا هو اللى يدبرها..وكمان هتبقى تجربة ممتعة يعنى

حلو البوست على فكرة بس حخلانى اقول كلام كتير غير مترابط وغير منطقى..اللى يشوف كدة يقول قال يعنى عاقلة طول عمرى..بلا نيلة

عمرو محمود السيد..اكلت البط بالفريك؟؟؟؟؟؟؟؟؟؟

يللا يااااااااااااااااا عم عيش شوية غلبان ومتغرب..

معلش اضطريت احط التعليق على مرتين عشان عمو بلوجر قالى يا رخمة يا بايخة يا ساقعة التعليق طويل مينفعش يتحط مرة واحدة

قليل الادب اوى بلوجر دة على فكرة عايز يضحك عليك ويفهمك انى رغاية

على فكرة بجد والله انا مش رغاية انت اللى عندك هنا حاجة غريبة بقى انا مالى يا عم

ملحوظة:انا صحيح مش رغاية بس انا شريرة بطبعى..يعنى تلاقينى بكتب تعليق طويل لمجرد انى اقرفك بس..نياااااااااهاهاهااااااا قال لايق عليه الغرام قال..انا اتكلم فى الغرام ليه انا؟؟؟مش لايق عليا اصلا

بقولك ايه..اشترى نفسك وتعالى زور مدونتى..عايزينك هناك

غير معرف يقول...

اسمحيلي أقولك يا انجي
انتي عسل والله عسل جدا
وبحب تعليقاتك موت
وتحليلك للبوست ده تحفه
المفروض عمرو يديكي فعلا جائزه احسن معلقه ( في كسره تحت اللام )‏
angel :))

عمرو يقول...

أهلا إينجيل
أنا مش عارف أقولك إيه. هو أنا كل ما أكتب حاجة أخبط في حد من القراء. أنا آسف لو كنت تسببت في ضيقك. بس الموضوع مش كئيب يعني, ولا متقوقز. على الأقل فيه أمل وإن كان ضعيف. أنا متشكر خالص على الدعوة. عايزك تعرفي حاجة يا إينجيل. أنا أكتر واحد اتلسع في موضوع الحب والجواز ده. محمد عارف (صاحبي وحبيبي وكفاءة) بيقولي إني جبل. بس على فكرة الجبل مش بيعرف إنه جبل. إن شاء الله تحضري الفرح قريب. ما أنا لازم أعزم كل زوار المدونة.
متشكر قوي على الدعوة, وإن شاء الله ربنا يطمن قلبك في القرييييب
الله يسلمك يا رب
:)




زهرة
مش عارف أقولك إيه. أنا بقيت باقرا مقالات مش تعليقات. ههههه. بس حقك طبعا ما هو الموضوع مهدى ليكي. حقك تتكلمي زي ما انتي عايزة.
أنا اتأخرت في قنا ورجعت الساعة ستة, وفيه حاجة ضايقتني أول ما دخلت على النت فقررت أكتب وأنا هادي, وده أخد ساعة ونص. المهم, زي ما انتي شايفة التدوينة دي كانت تعليق مفصل على سؤالك. الشاطر حسن موجود.. بس هل ستتوافر الظروف الممكنة للخروج بالزواج إلى أرض الواقع. وهل الطرفين هايستمروا بعد كده محافظين على بعض؟
تعليقك خلاني أحس إنك رومانسية دون الاعتماد على التفكير العقلاني. أنا باقول اللي باحسه فمش تزعلي مني. حتى الحب لازم يستند إلى تفكير سليم وعقلاني يا زهرة. أنا شايف إن توقعاتك من الحبيب توقعات محلقة, والحياة فيها الكثير من العملية والخطوات النفعية البراجماتية التي لا تتفق والرومانسية. خايف يصدمك الواقع. أنا مستني منك رد بقى تقوليلي هل انتي فعلاً مش بتدخلي عقلك في الموضوع ده ولا لأ؟
كلامك عن كتابتي هايخليني أصدق نفسي, وأعيش الدور ومش هاتعرفوا تكلموني بعد كده
:)



إيزولد
طيب مش ملاحظة إن تعليقك أصغر تعليق في المدونة؟ مستني الخناقة.. بس بالراحة عليا عشان عيان
:(




إنجي
مازالت تعليقاتك تذهلني يا إنجي
أنا شايف إنك انتي اللي بتتوقعي حاجات كتيرة جداً وبعضها غريب جداً من الشريك. مين على وجه الأرض ممكن يجاوبك على نص أسئلتك حتى؟ ليه يكون مدخن؟ ليه يكون ليه علاقات ببنات؟
أنا اللي ما أرفعش سقف طموحي؟
LOOK WHO'S TALKING?
لكن لو سبنا الدنيا هايصة تفتكري إيه فرصتنا في علاقة مشبعة وسعيدة؟
أنا أكلت البط بالفريك, وحالياً ماما جابت لي مانجاية ولأني باقرا تعليقك الطويل فماما كل شوية تعدي عليا وتقولي كل المانجاية أقولها حاضر, ولما زودتهم علي قلت لها تجيب ورقة أكتب لها تعهد إني هاكلها قبل ما أنام
هههههههههههه
أنا نفسي أكتب تعليق طويييل زي تعليقك بس المانجاية تناديني
سلام
:)

enjy يقول...

عارفة ان سقف طموحى عااااااااالى جدا ودة عامل لى ازمة شديدة جدا مع كل اللى اعرفهم..بغض النظر عن الحب انا قلت ان التوقعات بتبوظ اى علاقة

بالنسبة للاجابة على الاسألة انا قلت احس انه يقدر يجاوب بس هو ممكن ميكونش عارف

علاقاته بالبنات..لازم يكون ليه صديقات بنات عشان ميبقاش جاى من صحرا وعشان ميخنقنيش بقى يا عم

مدخن..دى حاجة شرحها يطول مش هينفع اقول هنا خالص

انا نفسى فى المانجة على فكرة ماليش دعوة يعنى بط ومانجة..كدة انا مضطرة احقد..

enjy يقول...

angel

والله يا بنتى انتى اللى عسل ورقيقة يعنى وذوق وبت ناس وانا مش عارفة ارد عليكى اقولك ايه الصراحة..يعنى انا مونشكحة ومكسوفة منك والله

معلش يا عمرو اضطريت ارد هنا عندك معلش انت مننا وعلينا مفيهاش حاجة يعنى اختك انجل كان لازمن ارد عليها..

متتفضلوا والله اعملكوا عشا وشاى..مش عايزين؟؟

طيب سلام

Isolde يقول...

عيان؟ انت بتقول عيان؟ طيب و ايه اللي مسهرك لدلوقتي؟ و احمد بيعمل ايه، هو مش دكتور؟ ايه ده، هو انا اغيب شوية ارجع الاقي الدنيا بايظة، حاجة غريبة و الله؟! انت عيان بجد؟

اممممم، طيب الف سلامة دي قديمة، اقوللك ايه؟ اقوللك ايه؟ اوففففففففففف، مش لاقية غيرها، الف سلامة يا عمرو :)

اما بقي عن قصر تعليقي، ف انا اصلا مش عارفة اعلق علي اي حاجة انت بتكتبها، و ما اعرفش ليه، بس يمكن عشان الحلة اللي انا فيها اليومين دول، دماغي زحمت اوي اوي، ف قول الحمد لله اني بارغي عشان بس اقول لكوا اني لسة عايشة و علي قيد الحياة

اما عن الخناقة، ف انا بانسحب لاني اعتقد اني آخر حد ممكن يحكي ف الموضوع ده، لما اتعالج الاول.

و بالهنا و الشفا المانجة و البط اللي بالفريك، علي فكرة انا نفسي فيه اوي و الله، ابقي كل ليا و ليك لحد ما آجي من امريكا و ماما تعملهولي تاني

سلامتك مرة كمان، عشان ما تقولش حرماك من حاجة :)

غير معرف يقول...

آمين يا عمرو
و يطمن قلب الجميع
انا خلاص مش مضايقه
ده كفاية المجامله بس حلوة كفاءه :)
angel

غير معرف يقول...

ربنا يخليكي يا انجي
متحرميناش بس من تعليقاتك اللذيذه دية
بس والله عسل :)
angel

عمرو يقول...

أنا مش فاهم والله
دي حاجة غريبة فعلاً
يعني أنا عامل المدونة عشان الناس تقول علي أنا إني عسل تقوم إنجي إبراهيم هي اللي تاخد اللقب "حكمتك يا رب".
:)

عمرو يقول...

إيزولد..
أنا مش عيان قوي يعني. عندي شواية حساسية بس
لكن أنا قلت لك إني عيان عشان ما أخدش علقة. أصل حسيت إن التعليق بتاعك هايبقى نااار. وفي الآخر طلع تحذير كاذب.
تعليقاتك انكمشت يا إيزولد وأنا كنت على وشك تكريمك كأقدم قارئة للمدونة. حلوة أقدم دي محسساني إنك من اأسرة التلاتين هههههه.
يعني مثلاً شايفة تعليقات أختك إنجي ولا زهرة الربيعية.. مقالات يا بنتي. مش الجملتين اللي بتسيبيهم. تصدقي إنر رجعت أتغاظ تاني وده مش كويس على صحتي خالص. النهاردة دعيتلك وأنا مسافر.. على الله ترديها بقى وانتي في الطيارة.
أسيبك أنا عشان ما تقوليش علي إني لوك لوك ورغاي
:)

زهره ربيعيه يقول...

لابد ان اعترف اولا ان انجى ابراهيم اكبر حتة سكر عرفتها فحياتى..دمها شربات..
ثانيا..قد يكون تعليقى لايشبه باقى التعليقات..قد يشبه المقال..اعذرنى فقد عملت صحفيه لبضعة اشهر..حتى استغنيت عن خدمات الجريده لاسباب مبادئيه بحته..
ثالثا بالنسبه لكونى رومانسيه فانا لا اخجل من ذلك..فان كان بامكانى ان اضع ذلك فى بطاقتى الشخصيه فسافعل..حسابات العقل دوما تاتى بنتائج عكسيه..ماذا يهمك ان كان شريك الحياه وسيما اولا .؟.الم يكن طه حسين باعاقته وفقدان بصره حبيبا جيدا..؟الم يكن سبب فراق ماجدولين لحبيها فى رواية تحت اشجار الزيزفون هو سبب تعاستها لانها ارادته فى مستوى جمالى ومظهرى ومادى يليق بها..فخسرت فى النهايه كل شىء..؟
ان اردت ان يكون زوجى غنى..فماذا سيفيدنى ماله ان كان جاف المشاعر,,او خشنا فى معاملته.؟.ماذا ستفيدنى وسامته ان كان متغطرسا..ماذا سيفيدنى مركزه الاجتماعى ان كان خاويا من الداخل وفارغ العقل..انا ساحيا مع قلبه وليس معه
يا استاذى حسابات العقل عندى هى ما تمنحه لنا الحياه ليكفى للزواج..وطنا اسميه مملكتى كاصغر ما يكون..وخاتما ذهبيا يزين اصبعى فيبهر لونه من يراه فيحسدنى على تلك السعاده التى تطل فى عينى منعكسة مع لونه فى يدى..واخلاق يشرفنى ان تنسب اليه..واهل ولمه تحيط بنا فى ليلة العمر
تلك هى حسابات عقلى..قل مجنونه..قل مريضه..قل حمقاء..قل ما تشاء فلست احفل بالالقاب كثيرا..هى ابعد ماتكون عن تفكيرى..وكثيرون من اتهمونى بالجنون..اليس قمة الجنون ان تكتب طيلة اعوام خطابات الى شخص لا تعرفه ولم تراه..تدعوه فى كل صفحه حبيبى وانت ليس لديك حبيب من البدايه..انما قد صنعته فى خيالك لانك تعرفه..وتعرف انه يوما ماسيكون لك حبيب ..وانه كما تقول الاساطير اليونانيه ..انه نصفك الاخر الذى ياتى الى العالم ليبحث عنك..كتفاحة قسمت على نصفين..نصف هو انت..والاخر هو..وحينما تجتمعا يعود اللون الاحمر القانى الى التفاحة ويزكم عطرها اللذيذ انفك..
قل ما تشاء..لقد تركت عقلى لدى الواقع واستبدلته بقلب لايعرف للواقع سبيل..انا لست ابحث عن زوج..ومثلى الكثيرات..نحن نبحث عن حياة تمر بجوار حبيب يكبر معنا..ونتبادل الضحكات امام موقد مشتعل فى شتاء شديد البروده..حبيب يمسك بيدى حينما يدق المرض ابواب صحتى..
هذا انا ولا املك ان اكون مثلكم..ولا اريد..
يوما ما ساخبرك اذا التقيناان حساباتى قد اتت ثمارها..واننى قد كوفئت بهذا الفارس الذى لم يعد يؤمن به سوايا
لكننى اعدك ان اخبرك..
ومن يدرى فقد تكون حسابات العقل هى الاصدق..حينها فلاادرى ما الذى سيحدث لى..
لكن انا ابتهل الى الله دوما الايردنى خائبه

زهره ربيعيه يقول...

هو صح الوقت بدرى وكده بس من كتر تمقيق عنيا ف قراية حواديتك طبعا النوم زارنى..اسيبك بقا تقرا تعليقى..واكيد هنختلف ف الرأى..انا دوما شريك مخالف..لكن والله ما يخالف ههههههه
علق بقا براحتك واسيبك انا ..اروح مع باسم وبسمه..تصبحوا على خير

enjy يقول...

معلش يا عمرو شوية كدة بس عشان زى متقول جمهورى عندك كتير اوى اوى..احم احم والله ما عارفة بس اعمل فى نفسى ايه منين مروح الاقى معجبين كدة..معلش يا عمرو هقطع عليك نا
نياااااااهاهاهاااااااا

زهرة ربيعية

لابد ان اعترف انك رقيقة اوى وحساسة اوى ومجاملة جدا..دة غير انك بترسمى ودى تخلينى اجلك واحترمك زيادة جداااااا

لابد ايضا ان اعترف انى بحب اجى هنا اوى جدا خالص..بحس ان هنا بالذات عند عمرو الموضوع شخصى وحميم جدا..وسبحان الله كلكوا زى الفل وناس بجد حلوين..معرفش بس انا بحس انى باجى هنا اشوف ناس اصحابى اعرفهم كويس واحيانا مواضيع عمرو بتطلع منى كلام واعترافات معتقدش كان ممكن يبقالى فرصة اقولها فى مكان تانى

شكرا يا عمرو محمود السيد..انت مازلت رائع وانا مازلت برخم عليك

سلام

غير معرف يقول...

هو مفيش بوست النهارده ولا اية !
انا كل شوية ادخل مش الاقي
لا هزعل لو نمت من غير ما اقرأ بوست جديد
angel

عمرو يقول...

أهلا إينجيل
أنا كتبت حاجة النهاردة بس مش ناوي أنشرها بصراحة. لذا تعويضاً لك هانشر حاجة من مجموعة كوابيس الفتى الطائر.. يا رب تعجبك
:)

عمرو يقول...

إنجي
أنا سايبك تاكلي عيش في منطقتشي هاه.. عشان بعد كده تبقي تفتكري الجمايل
D:

عمرو يقول...

أهلا زهرة
كل ده تعليق.. يا ربي.. هههه
أناطبعا قريت أكتر من مرة لكن لسة خايف عليكي من الرومانسية الزيادة دي. يا بنتي الحياة بتبقى مليانة حث عن ماديات وأشياء مش ظريفة.. ربنا يا زهرة يهنيكي ويخليكي توصلي للأمير ده عشان إحنا كمان نفرح
:)

زهره ربيعيه يقول...

متقلقش يا استاذى زى ماماما بتقول دايما:النصيب مطرح ما بيخطى يصيب..واللى مكتوبلى هشوفه يعنى سيبها على الله..اذا كان انا نفسى مش قلقانه
وخلاص حضرتك انا هعلق بايجاز من هنا ورايح ههههههههههه

جمال عمارة يقول...

بصراحة.. أنا باضحك و "باكركع" على أي إنسان يتصور.. مجرد تصور.. إن له أي قدر من الإسهام.. حتى ولو ضئيل للغاية.. في اختيار شريك/شريكة حياته..

يا ولدي.. لقد اختصرتها سيدات العهد القديم حين قلن "لن تتزوج سوى امرأتك"..

فحين يحمى الوطيس.. لن تجد أياً من كل الكلام الذي قلته في رأسك.. سيتبخر تماماً.. وستجد نفسك منساقاً تحت أثر التنويم المغناطيسي الذي يسمونه "القسمة والنصيب".. وستجد نفسك تجلس وتتكلم وتتفق وكأنك تختار..

هل أنا أرسم صورة قدرية خالصة للزواج، نعم، فهذا حقيقي :) فكل إنسان له لحظة معينة "يتخبط فيها في دماغه" ويتخذ القرار..

استمتع بإجازتك.. :)

عمرو يقول...

أستاذ جمال
طيب أنا أهون عليك؟ لا بقى يبق لازم لما تلاقي دماغي سحبت شمال تقولي عشان آخد بالي
:)
بس أنا مش شايف الجواز قدري أوي للدرجة دي..
عموما ربنا يستر