يناير 28، 2010

نجاح

1_596597_1_34 حلو قوي النجاح, فعلا والله. النهاردة أنا فعلا كنت متضايق ومكشر ومتعصب. يظهر إن الواحد مش بس بيتأثر باللي بيعيشه ويقراه, لكن كمان بنفسه.. بتفكيره غير الواعي, وقبل ما أدخل في كلام مقوقز عاوز أتكلم في الماتش, وده ممكن يزعل الرفيقة إنجي اللي في مدونتها هات م الآخر قالت كلام جامد جداً عن إن اللي بيحصل هو اختصار لمصر في حداشر لاعب وأنا معاها جداً, لكن أنا النهاردة شفت تأثير نجاح شحاتة وعصام وعبد الشافي وجدو وأحمد حسن ومتعب وسيد معوض.. دول أكتر ناس حسيت إنهم هايموتوا ويكسبوا وكنت بادعي مش لمصر بس لكن للناس دي اللي حسيت إنهم فعلا عايزين ينجحوا. وحسيت فعلا بفرحة لما طلعت بعد الماتش.

الشارع بقى هنا كان زي أي شارع في أي محافظة تانية. الناس كلها بأعلام وفرحانة والعربيات على اختلاف أنواعها وشكلها مليان بشر من فوق وتحت كلهم بيقولوا “مصر”. الفرحة دي على الرغم من كل السمات السلبية ليها لكن ممكن تزود إنتاجية الناس دي وتدفعهم للنجاح. أنا بعد ما شفت الماتش بصراحة الدم غلي في عروقي وراجع عاوز أشتغل لغاية الصبح. طيب تخيلوا تأثير ماتش النهاردة لو انهزمنا على الطلبة اللي بيمتحنوا؟ جون عماد متعب في الجزاير في ماتش القاهرة تسبب في موت خمسة بالسكتة القلبية هناك. تخيلوا لو الحال كده في مصر. أنا عارف إن دي كورة بس أنا مش مركز على الماتش أنا عاجبني المجهود والإصرار والحماس. كنت متضايق جدا النهاردة بس حاسس دلوقتي إن الاستمرار في الضيق خيانة للبلد, مش معقولة مصر كلها تبقى فرحانة وأنا الوحيد اللي أكشر, ده حتى الناس في الشارع كان ممكن يفتكروني جزايري.. إسكتوا بقى مش أنا وشي كان هايضيع خالص. ولد صغير ماسك علبة بيرسول ووجهها ناحة وشي وقعد يولع في الولاعة وأنا باصص له ببلاهة ومش فاهم هو بيعمل إيه, ولولا ستر ربنا وإن الولاعة ما ولعتش كان زمان وشي اتحرق. المهم إني فهمت من هنا وبعدت راحت الولاعة مولعة. هع هع هع... حاجة حلوة قوي عجبتني النهاردة. التواجد الأمني لحماية الجماهير من بعضها بعد الماتش فعلا الله ينور.

أنا هامشي بقى.. ليلة سعيدة للناس اللي هاتنام :)

هناك 13 تعليقًا:

Unknown يقول...

انا اول تعليق وللا ايه يا ولاد؟؟؟

طب حلو خالص

Unknown يقول...

طيب نتقوقز شوية آباوت الماتش - يعنى عن الماتش انا عارفة ان لغتك مش قد كدة - نياااااااااهاهاهااااا

على فكرة انا شفت الماتش..الشوط التانى لان الاولان كنت مش موجودة..المهم

انا مقصدتش بكلامى اننا ننفض للماتش بس برضو مكنتش هأجل معاد الدكتور عشان الماتش اكيد يعنى..دة اللى كنت اقصده ..نعيش حياتنا ومنركزش وى كدة مع نصر كروى عادى..

تعرف..بعد الماتش حسيت ان احنا عندنا قابلية للايمان بقضية..تخيل كدة لو كل الناس اللى كانت مستنية الماتش وبتدعى نكسب ركزت فى حاجة ايجابية..هتقولى التركيز فى الماتش لا يتطلب مجهود هقولك لا يتطلب..فى ناس اشترت بيروسول وولاعات واعلام ونزلت الشارع..فى ناس نزلت ترقص وتهيص..فى ناس عملوا مجهود عضلى كتير..دة طبعا غير المجهود النفسى والتوتر..تخيل بقى معايا لو كلنا عملنا كدة بس فى حاجة مفيدة

تخيل

انا نفسى بلدنا تبقى حلوة..نفسى اوى عشان بحبها اوى اوى..نفسى نبقى مش مغيبين ومركزين مع حاجة واحدة وكمان مش مهمة

كل اللعيبة يستاهلوا النجاح ويستاهلوا المبالغ اللى هيتقاضوها طب عشان تعبوا وكانوا عايزين يكسبوا..بالمناسبة احمد حسن وهو بيخبط على الارض بايديه تحفففففففة موتنى من الضحك ..وجدو كمان عسول وصغنطط كدة..وعبد الشافى اول ما نزل بصت له كدة وقلت ايه دة دة هيلعب بجد وللا هزار بس جاب جون جامد يعنى..

ليه بقى منبقاش كلنا زيهم يعنى ليه كل واحد فينا ميتعبش فى المكان بتاعه عشان ننجح بجد مش نكسب ماتش كورة

بزعل لما الاقينا بنعمل كدة..زى بالظبط ما يكون واحد خايب اوى وبليد عشان مبيذاكرش قاعد عمال يقول للشاطر زاكر عشان تنجح ويدعى له ويبقى متوتر عشانه..طب متذاكر انت كمان وللا انت مستسهلها

ممكن اوى كلامى يبان انه فلسفة فارغة بس انا مقتنعة بيه جداااااااا

اشتغل يا عمرو..مش عشان كسبنا الماتش بس عشان بلدنا يستاهل يبقى فيها مترجم لايشق له غبار

سلام

Unknown يقول...

اه صحيح

سلامة وشك ..جت سليمة

جمال عمارة يقول...

عمرو..

"كنت متضايق جدا النهاردة بس حاسس دلوقتي إن الاستمرار في الضيق خيانة للبلد"..

فعلاً عبارة مضحكة وفيها اختصار للموقف كله..

أنا حاولت أهرب من الماتش علشان قلبي ما بقاش يستحمل التوتر ده، بس ما قدرتش أول ما قالوا "بنتالتي"..

أرجو أن تكون بخير..

mano يقول...

الف مبروك لينا كلنا ويا رب تبقى كل حياتنا نجاح مش بس فى الملاعب ولكن اولا فى القرب من الله ثانيا فى العمل ثالثا يا ريت يكون ده درس لكل انسان مش بس للجزائريين لا لكل انسان يتخيل ان الغرور والايذاء هما مفتاح النجاح فى الحياه او فى اى شىء يقوم بيه الانسان

تحياتى ليك يا عمرو والف لا بأس على حضرتك والمره اللى جايه take care يلا سلام عشان ما اطولش عليك وتشوف شغلك

سواحة يقول...

سلامة وشك من ماتشات الكورة :-)
ابقى خذ بالك بدرى عن كده المرة الجاية

و مبروك الفرحة لينا كلنا
ياريت تطول شوية كمان

عمرو يقول...

أستاذ جمال
سلامة قلبك. فعلا كانت حاجة تخض, بس الواد سيد عمل حتة دين خدعة رهييييبة
:)

عمرو يقول...

إنجي
يا رب على طول أول تعليق, لا مؤاخذة أنا افتكرت نفسي رديت عليكي وأنا كنت ما رديتش
:)

انتي رحتي ليه للدكتور؟ تعبانة؟ يا جمااااااااااعة إنجي تعبانة, عايزين نجمع فلوس عشان نشتري اتنين كيلو بتنجان واتنين كيلو فلفل ونعملها زيارة
:)

عمرو يقول...

مانو
الجامع في الشارع اللي جنبنا.. انتي جاية تخطبي في التعليقات :)
ربنا يكرمك يا مانو :)

عمرو يقول...

مبروك لينا كلنا يا واندا مؤكد الفرحة عندك أكبر دايما الغريب بيفرح أكتر في المناسبات اللي زي دي
:)

سواحة يقول...

ازعل انا غريب ايه
انا من الكون ده برضه :-((
على ما اعتقد يعنى و لا انتم نقلتم لمجرة ثانية ؟؟

و بعدين العربى بتاعى ملعبك
علشان مابراجعش الكلام
بكتب و خلاص الى بيهب فى الجمجمة

و تاثير تعلم عدة لغات فى مرحلة الطفولة

انت بقى العربى بتاعك ماله ؟؟ ساعات برضه بيشبه بتاعى :-)))

عمرو يقول...

ههههههه
لا بقى يا واندا
أنا العربي بتاعي لا يقبل المزايدات :)

الأسامه alosama يقول...

عجبتني مدونتك اتكمني انك ايضا تزور مدونتي وخلي روحك حلوه مش مرررررررررررره