يناير 11، 2010

الترجمة من الصعيدية إلى العربية

177690521_c5d4fea40e

للأستاذ جمال عمارة الكثير من التدوينات عن فن الترجمة. أنا أيضاً أريد أن أكتب في هذا المجال. لذا قررت أن أعارض ما يكتبه الأستاذ جمال, وأن اكتب في الترجمة من الصعيدية إلى العربية والعكس. من المعروف أن العامية الصعيدية تعطش الجيم وتقرب القاف من الجيم المعطشة لكن هناك معلومات أخرى قد لا تعرفها عنها.

التراكيب المدمجة:

توجد في الصعيدية بعض التراكيب التي تم دمجها فتسمعها ككلمة واحدة. من هذه التراكيب السؤال الشائع "هوّيه" مع ضم الهاء وتشديد الواو. حسناَ خذ بعض الوقت كي تتأمل الكلمة. حاول أن تترجمها بنفسك قبل أن تغش الإجابة.. هذه الكلمة مدمجة من ضمير الغائب "هو" وأداة الاستفهام "ايه" لكنها تنطق مرة واحدة كما لو كان الكلمتان كلمة واحدة. جرب أن تنطقها مرة أخرى قبل أن تنتقل للنقطة التالية.

الاختزالات

تأمل السؤال التالي: "كديه سكن؟" هذا السؤال بسيط التكوين صعب الفهم. ستتفاجأ حين تعرف معناه. إنه يساوي السؤال التالي في العربية الفصيحة "في أي طابق تسكن؟" أو الجملة التالية من العامية البيضاء "انت ساكن في الدور الكام؟ كلمة "كديه" هي في الأساس كلمتان تم دمجهما. وكما ترى فالعامية لا تدمج فقط الكلمات لكنها أحيانا تحذف بعض الكلمات التي لا ترى لها قيمة, وهذا الإيجاز أحد مقومات بلاغتها, وأحد أسباب عدم فهم القاهريين لبعض تكويناتها.

كلمات مفردة

"شعلة": ضاقت الكلمات على الصعايدة أو هكذا يبدو الأمر. ستجد أنهم يطلقون هذه اللفظة للإشارة إلى كلمة "بتاع" في اللهجة العامية أو "الشيء" في العربية الفصحى. والجمع شُعَل.

"تور" وتنطق كما ننطق كلمة tour بالإنجليزية وتعني قم.

"اندلى" أي نزل

"فلينة" أي فلنة (تي شيرت)

"حاياجة" وقد أشرنا إليها في تدوينة سابقة وتعني الحلبة.

نبذة تاريخية

لكن للكلمة "حياجة" تاريخ طويل. فعلى ما يبدو أن فرقة من مدينة حلب كانت تجوب القرى فيما مضى لتقديم عروض راقصة. ويبدو أن الراقصات كن نساء سيئات السمعة, وكان الرجال الصعايدة يعشقونهن لجمالهن الأخاذ, لكن عرف وتقاليد القرية كانت تمنع الرجال من الاختلاط بالحلبيات. وكان من يقترب منهن يجرس في القرية كلها, ومن هنا أصبحت كلمة "حلبية" سبة تعني امرأة غير حسنة السير. وبهذا كان على الذهن الصعيدي أن يتفتق عن اسم آخر للمشروب غير هذا الاسم المشين. هذه معلومة تاريخية أخرى أكثر طرافة, في الثلاثينيات من القرن العشرين لم يكن الصعيد يعرف الباذنجان, لذا فعندما ورد إليه وزرع هناك للمرة الأولى كان يشار إليه على أنه "ضادنجان".

قد يخيل إليك عزيزي القارئ أنك لن تفهم الصعيدي حين يتكلم, لكن الحقيقة أن وسائل الإعلام ساوت اللهجات في جميع البلدان. القليل من اللهجات مازالت حية في القليل من الأماكن وغالباً ما تنطق على ألسنة كبار السن أو أبناء الطبقات الفقيرة. هذا هو الحال في دمياط وبورسعيد وفي الصعيد أيضاً. ربما احتفظ البدو قليلاً بلهجتهم لكن لا تقلق فهم في طريقهم للتغيير. لكن كيف يمكنك أن تكشف الصعيدي إذا كان الجميع يتحدثون لهجة بيضاء محايدة. حسنأً أكتب له الجملة التالية وطلب منه أن يقرأها.

- "عاوز قزازة حاجة ساقعة".

ركز جيداً في نطقه لكلمة "قزازة" من المفترض أن ينطقها بكسر القاف, لكنني أعدك أنه سيفتح القاف فتحة واضحة وجلية.

في النهاية إليك هذا التدريب. ترجم الجملة التالية إلى العربية:

توري يا بت توري.. اعملي لولد عمك حاياجة”.

يتم وضع الترجمة في رسالة على العنوان التالي: نجع الفحيرة بجوار ساجية أبو الغيط.

ملحوظة: إن لم يقتلني الأستاذ جمال عمارة, فسأحاول أن أكتب جزءاً ثانياً لهذه التدوينة :)

هناك 26 تعليقًا:

Isolde يقول...

" جومي يا بت جومي اعملي لواد عمك حلبة" هع هع هع

ترجم انت دي : " من بعد ما جلّيته علي ( بكسر العين) عيّطت عليه، فنس ما اندلااااااش" هع هع هع

:)

أنسانة-شوية وشوية يقول...

هههههههههههههههه

تحفة يا عمرو ، فكرة البوست نفسه وصياغه فطستنى من الضحك

انا كمان ترجمت الجملة يا عمرو بس مقولتش الجايزة ايه:)

عمرو يقول...

إيزولد
صح وعشرة من عشرة

استني كده يا يومك اللي مش فايت.. انتي بتمتحنيني؟ عموما عشان أنا بس مدرس قلبي أبيض هاترجمهالك احتمال تكوني مش عارفاها: "من بعد ما ركبته فوقيا ندهت عليه فراح تمطى وما نزلش".. أي خدمة :)

عمرو يقول...

إنسانة
ببساطة انتم اللي المفروض تجيبولي جايزة :) على المجهود الكبير اللي أنا عملته والكورس المجاني في الترجمة ده
:)

Isolde يقول...

انت يا عمنا، انت مش عندك امتحان بكرة، ها؟ سايب المذاكرة و قاعد تدون و تمتحن في الناس كمان؟ اعمل كليك علي نشر التعليق الاقيك قفلت الجهاز و مسكت الكتاب، بلاش دلع، قال يمتحنا قال... بكرة ان شاء الله بعد ما ترجع من الامتحان سالم غانم يا سي عمرو يا بيه ابقي اكتبلنا حاجة فرايحي علي ذوقك كدة، انهاردة نو مور بلوجينج
:)

ربنا معاك انت و كل الناس اللي بتمتحن، و يرزقتي بكام امتحان عشان اتلم و اذاكر... قول آمين و النبي يا اخويا، بس بعد ما تمتحن
:)

جمال عمارة يقول...

عمورة..

يعني يوم ما تجيب سيرتي في مدونتك.. "تعارضني".. :) :)

بس فعلاً تدوينة تحفة.. خصوصاً حكاية "كديه".. كديه سكن؟ يعني ساكن في الدور الكام؟ سبحان الله.. :)

عمرو يقول...

إيزولد
أهلا بيكي للمرة التانية على التوازي

بصي يا ستي. أنا عندي بكرة شفوي في مادتين. أنا ذاكرتهم طبعاً بس المشكلة مش في كده خالص. المشكلة إن الأسئلة بتيجي فيما وراء المادة. يعني لو انتي فضلتي تذاكري طول السنة عن إجراءات حاجة زي والعياذ بالله "الذكاءات المتعددة" يبقى مين عمل أبحاث في الموضوع ده في مصر ووصلوا لإيه وانت إيه رأيك وتفتكر إيه تاني موضوعات بحثية ممكن نبحثها بنفس الخلفية النظرية دي.. وانتي عارفاني طبعا أحب التربية زي عينيا وأحب قوي أطلع على الأبحاث :(
ادعيلي بقى ربنا يسترها ويجعل كلامنا خفيف عليهم
:)

عمرو يقول...

أستاذ جمال
هي دي الطريقة الوحيدة اللي تفتق بيها ذهني عشان أخليك تعلق. أصلك غايب ليك فترة :)

ponpona يقول...

BUZZ !!!

عارف اللي بتعمله الـ BUZZ دي في الشاشه بتاعة الماسينجر .. أهو هو دا اللي عمله البوست ده في دماغي .... :)

D:

جارة القمر يقول...

جاااااااااااااامدة اوووووووى يا عمر بجد انا اذبهليت لما عرفت ان "كديه سكن ؟" بقت انت ساكن فى الدور الكام هههههههههههههههههههلا جديدة جديدة يعنى

ميرسى جدا على الكورس الجامد دا

بالنوسبة انه انهارده يوم الثلاثاء تصدق صح فعلا وانا رايحة المدرسة على اساس ان انهارده الاربعاء ههههههههه

Isolde يقول...

معلش يا عمرو علي جنب شوية كدة لو سمحت... جارة القمر يا حبيبتي... سؤال بس، هو انتي في سنة كااااام؟ انتي لسة في المدرسة؟ لو كدة تبقي حاجة حلوة خالص، اي و الله :)

عمرو... اولا في غلط في ترجمتك لنصي و ان كنت جبت المعني الاجمالي ليه... يعن "فنس" دي مش معناها تمطّي خاااالص... Please, check your dictionary
هع هع هع
ربنا معاك في الاجراءات الإيه؟! و النبي يا اخويا ما عارفة انطقها... ربنا معاك يا رب، انا دعيالك علي طول يا ولدي، قلب الام بقي
:)

جارة القمر يقول...

ايزولد يا قمراية انا مش لسه بدرس انا مدرسة بطلع عقدى على العيال ههههههههههههههههههههه

Heba Gamal Emara يقول...

انا كده مش محتاجه كورسات فى اللغه الصعيديه :)

حضرتك طبعا عارف ان الواحد ميسواش حاجه اليومين دول من غير عده لغات وانا الحمد لله اجتزت اول لغه بفضل حضرتك والكورس المكثف اللى يخلص فى نص ساعه
:):):)

انا كده معايا لغه عربيه ولغه صعيديه وناقص لى التويفل ويبقى معايا الانجليزيه :):)
يلا وعقبال اليابانى والفرنساوى :):):)

enjy يقول...

بقالى فترة مضحكتش والنبى يا عموووور

بس حلوة الجولة اللى بينك وبين ايزولد دى..هع هع هع عجبتنى راجع قاموسك اللى افحمتك بيها فى الاخر دى..نياااااااااهاهاهااااا

عندك امتحان بكرة يا ابنى..قوووووووووووم من هنا بقى

انا بسمع السيدة ام كالثوم بعيد عنك حياتى عذاب..ايون هى اسمها ام كالثوم عندك اعتراض؟؟؟

عمرو كمان الصعايدة بيدمجوا الكلام كدة مش عارفة اوصفلك بس تحس باضغام فى كلامهم..

عموما انت ماشاء الله معاك لغات كاتير يا ولدى

اكرمك الله

Wanda يقول...

الا و النبى سؤال الكلام ده يمشى على الصعيد كله من بنى سويف لاسوان يعنى؟؟
اصلى كده حشك فى الاصل الصعيدى الى مربينى عليه :-)))
و الله لامتحن السيد الوالد و العمات و الاعمام و اتاكد من شجرة العيلة الى شكله بيتنقل :-))

اخبار الامتحان ايه صحيح ؟

Isolde يقول...

Good Luck with today's exam... go n show them who's the master
:)

ربنا معاك
صباحك حليييييب
:)

جارة القمر يقول...

ربنا معاك يا عمرو فى امتحاناتك و ان شاء الله يكون بتاع انهارده عدى على خير

عمرو يقول...

أهلا بيكم كلكم كلكم
:)


أنا رجعت من الامتحان أخيرا
بس الحمد لله الأوفر أول تمام
بكرة عندي امتحان تاني هالحق بقى آكل لقمة وأنام.. أصل البحث العلمي ده بيحتاج نوم كتير :)
هع هع

جارة القمر يقول...

ربنا معااااك يا سيدى و يعدى هو كمان على خير :):):)

عطش الصبار يقول...

يارب تفضل فى المود ده على طول بوست جميل كدا اتعلمت لغتين صعيدى وشرقاوى عاى فكره انا صعيديه اصلا من المنيا وعشان خاطر طلعنا قرايب كمل بقى باقى الكورس لان كل اللى طلعت بيه من الصعيد الدماغ الناشفه
تحياتى

عطش الصبار يقول...

يارب تفضل فى المود ده على طول بوست جميل كدا اتعلمت لغتين صعيدى وشرقاوى عاى فكره انا صعيديه اصلا من المنيا وعشان خاطر طلعنا قرايب كمل بقى باقى الكورس لان كل اللى طلعت بيه من الصعيد الدماغ الناشفه
تحياتى

غير معرف يقول...

الله يوفجك يا وليدي يا عمرو ....وتعاود النجع مجبور الخاطر !!!.
ديدي

عمرو يقول...

أهلا جارة القمر انتي وعطش الصبار وديدي
وأهلا طبعا بكل حد يزور صفحة التعليقات

امبارح يا اخوانا اتحمقت على واحد من الدكاترة اللي بيمتحنوني لأنه بيقولي إن كلامي غلط, وأنا إجابتي مالية الكتب أساسا, يعني مش حاجة مستخبية ولا معقدة عشان نختلف عليها ويبقى فيها رأيين, النهاردة نفس السخص امتحني لوحده, عشان طبعا أنا محظوظ جدا, مع إن اللجنة المفروض ما تقلش عن أربعة لكن أنا طبعا مصاب بحظ غريب جدا. المهم إنه سألني سؤالين تلاتة ورديت إجابة أعتقد إنها نموذجية وهو وضميره بقى.

أنا هأروح آكل وأنام, ادعولي أعرف أنام عشان أنا مكتئب جداً

احتمال أكتب تدوينة الليلة دي شكلها مش ليلة مذاكرة خالص

جارة القمر يقول...

يااااه بتحصل كتير اوووى الحكاية دى يا عمرو الاجابة تبقى بديهية وبرضو يعترضوا عليها ... ان شاء الله خير و تعدى منها على خير

ونوم العافية يارب وان شاء الله تقوم من غير اكتئاب خالص :):)

Isolde يقول...

هو الراجل جالك هو هو تااااني؟!!! لأ، انا لازم ابخرك، مش هيصرفه عنك غير كدة....

خمسة جد... ما تقلقلش، انا شاء الله يطلع هو ده اللي هيديك اعلي الدرجات، صدقني هو شكله من المدرسة القديمة لاساتذة الجامعة، بيشد عليك عشان انت نبيه و عاجبه....

سيبك من المذاكرة و وجع القلب و خد بريك انهاردة و نام و اتبسط و سيبها علي الله، هو اولي بالحكاية كلها
:)

عمرو يقول...

إيزولد
أنا كلت ونمت وصحيت وخدت دش وشربت بيبسي وروحت زرت تلاتة من خلاني كل ده في تلات ساعات.. مع إني مش نايم كويس ليا يومين بس مش جايني نوم. نفسي أكتب بوست عن التعليم في مصر بيعتمد على الأرقام والإحصائيات والدلائل, حاجة كده ما فيهاش تلت التلاتة كام, بس أنا دلوقتي متهيألي من الأفضل أراجع المادة كمان مرة للتنشيط كده وبكرة أعمل قراءات حرة عشان انتي عارفة نظام الأسئلة, من خلال قراءاتك, من خلال الواقع الملموس, من خلال أي حاجة تاني.. تعرفي؟ أنا مش عايز أروح امتحانات تاني عاااااااا, والله بس المادة الجاية بتاعة دكتور صلاح الخراشي, والراجل ده أنا باحترمه وفعلا اتعلمت على إيديه وعشان كده خايف يغير رأيه عني.. من أجل ذلك قررنا نحن عمرو السيد إلقاء مشاكلي مع السخص الزريف ده خلف ظهري والبدء في مراجعة مادة صلاح الخراشي..
:)

بس مش كنتي نزلتي بوست جديد عشان أبناءنا في الامتحانات وكده يعني :)