نجاح

حلو قوي النجاح, فعلا والله. النهاردة أنا فعلا كنت متضايق ومكشر ومتعصب. يظهر إن الواحد مش بس بيتأثر باللي بيعيشه ويقراه, لكن كمان بنفسه.. بتفكيره غير الواعي, وقبل ما أدخل في كلام مقوقز عاوز أتكلم في الماتش, وده ممكن يزعل الرفيقة إنجي اللي في مدونتها هات م الآخر قالت كلام جامد جداً عن إن اللي بيحصل هو اختصار لمصر في حداشر لاعب وأنا معاها جداً, لكن أنا النهاردة شفت تأثير نجاح شحاتة وعصام وعبد الشافي وجدو وأحمد حسن ومتعب وسيد معوض.. دول أكتر ناس حسيت إنهم هايموتوا ويكسبوا وكنت بادعي مش لمصر بس لكن للناس دي اللي حسيت إنهم فعلا عايزين ينجحوا. وحسيت فعلا بفرحة لما طلعت بعد الماتش.

الشارع بقى هنا كان زي أي شارع في أي محافظة تانية. الناس كلها بأعلام وفرحانة والعربيات على اختلاف أنواعها وشكلها مليان بشر من فوق وتحت كلهم بيقولوا “مصر”. الفرحة دي على الرغم من كل السمات السلبية ليها لكن ممكن تزود إنتاجية الناس دي وتدفعهم للنجاح. أنا بعد ما شفت الماتش بصراحة الدم غلي في عروقي وراجع عاوز أشتغل لغاية الصبح. طيب تخيلوا تأثير ماتش النهاردة لو انهزمنا على الطلبة اللي بيمتحنوا؟ جون عماد متعب في الجزاير في ماتش القاهرة تسبب في موت خمسة بالسكتة القلبية هناك. تخيلوا لو الحال كده في مصر. أنا عارف إن دي كورة بس أنا مش مركز على الماتش أنا عاجبني المجهود والإصرار والحماس. كنت متضايق جدا النهاردة بس حاسس دلوقتي إن الاستمرار في الضيق خيانة للبلد, مش معقولة مصر كلها تبقى فرحانة وأنا الوحيد اللي أكشر, ده حتى الناس في الشارع كان ممكن يفتكروني جزايري.. إسكتوا بقى مش أنا وشي كان هايضيع خالص. ولد صغير ماسك علبة بيرسول ووجهها ناحة وشي وقعد يولع في الولاعة وأنا باصص له ببلاهة ومش فاهم هو بيعمل إيه, ولولا ستر ربنا وإن الولاعة ما ولعتش كان زمان وشي اتحرق. المهم إني فهمت من هنا وبعدت راحت الولاعة مولعة. هع هع هع... حاجة حلوة قوي عجبتني النهاردة. التواجد الأمني لحماية الجماهير من بعضها بعد الماتش فعلا الله ينور.

أنا هامشي بقى.. ليلة سعيدة للناس اللي هاتنام :)