يناير 22، 2010

مايكل جاكسون

أحب أغاني جاكسون, وأحب الأقدم منها أكثر لأنها ترتبط بذكريات المراهقة الخالية من الأعباء. كنت وأصدقائي نتغنى بأغناي جاكسون في الثانوية, وأنا تعرفت عليه منهم وبهرت به. كانت إحدى أغنياتنا المفضلة هي They don’t care about us وهي إحدى أجرأ الأغاني في تاريخ البشرية غير أنها لم تخش مس طرف اليهود في أحد جملها. الأغنية الثانية في الترتيب كانت أغنية Man in the Mirror والتي أعتقد أنه من الصعب أن نجد لها مثيلاً في أغاني اليوم. أما ثالث أغنية في الترتيب فربما تستغربونها لأنها لم تكن تتجه نفس التوجه الأخلاقي والمراعي للحقوق الإنسانية كالأغنيتين السابقتين وهي أغنية Dirty Diana. حين مات جاكسون لم أحزن على أنه مات مسيحياً أو مسلماً كما فعل البعض, أنا فقط حزنت على أن العالم الذي أعرفه يتغير, وأنه سيأتي قريباً يوماً (إن أعطاني الله العمر) أشغل فيه أغاني جاكسون التي ستصبح وقتها قديمة جداً كي أعيش لحظات في العالم الذي ألفته, وكي أبتعد عن عالم لم أعد أستطيع التكيف معه, فأنا لا أسمع ريانا ولا إيمينم ولا حمزة نمرة وهذه أسماء يبدو أنها ستسيطر على ساحة الغناء وستكون لها سيادة في الأيام القادمة. إلى جميع محبي أغاني جاكسون اسمعوا معي هذه الأغنية كي يبدأ يومكم بالكثير من العزم والحماس :)

هناك 8 تعليقات:

Unknown يقول...

يبدأ يومكم ازاى؟؟؟ اه انت مصر على الدقة الجغرافية يعنى؟؟؟

ماشى

مايكل جاكسون...جاكو...حبيب هارتى

احكيلك حكاية مايكل جاكسون؟؟ اوكاى طالما لسة مفيش حد من الاخوات هنا احكى لحد ما ييجوا بقى..

انا مكنتش اعرف مايكل جاكسون قبل ما يموت..كل علاقتى بيه هو الكلام اللى بسمعه عنه..مطرب امريكى بيكره العرب ومسخ..فبالتالى مسمعتوش ومحاولتش..

بعدين مات..والدنيا قامت مقعدتش..قلت اشوف مين دة يعنى..اول اغنية شفتها كانت dangerous انبهرت بالاداء على المسرح..وانبهرت بالحياة اللى بتتولد على المسرح والشغف الفظيع..شفته وقريت عنه شوية وبعدين خلاص..اشطة ميضرش يعنى ونسيت الموضوع خالص..

من فترة كنت زهقانة بغباوة..حياتى مفيهاش جديد نهائى فافتكرت المعجزة اللى شفتها على المسرح..روحت مملكة اليوتيوب وقلت اتفرج..

شفت smooth criminal وعجبنى اوى المزيكا والرقص..عجبتنى الاغنية ذات نفسها وان الفكرة عجيبة كدة ومالهاش اى لازمة فى الحياة..بعدها بقى سمعت will u b there وتماشت مع افكارى فى تلك المرحلة جدا..وعرفت ان هو اللى كاتبها وشفت الاداء على المسرح وبهرت انفاسى..

بعدها سمعت heal the world, man in the mirror, u have to starting something ومن ساعتها لا حول ولا قوة الا بالله حبييييييييييته موت موت موت

بجد موهبة جبارة..اداء عبقرى..مرونة غريبة..تصديق وايمان بنفسه مش طبيعى

الحياة اللى بتتخلق اول ما الشو يبدأ ويخلص اول ما الشو يخلص حاجة مبهرة..حاجة تاخد العقل فعلا

على راى كل الفانز بتوعه عاليوتيوب
rest in peace M.J

سلام بقى انا لوكلوكت كتير

Unknown يقول...

نسيت اقولك..اخرك معايا التعليق دة..قدامك اقل من اربعة وعشرين ساعة لو ملقتش تعليق عندى من جلالتك

انسى يا عمرو

Unknown يقول...

يا فتاااااااااح يا عليم يا رزاق يا كريم....

مفيش زباين ليه؟؟؟

ايزولد...فينك؟؟؟ تعالى يا اوختشى والنبى قولى رايك فى المواطن اللى جاى من البلد اللى انتى عايشة فيها..وقوليلنا هما انطباعهم عنه ايه

بونبونة تعالى قولى كلمتين رقيقتان من كلماتك الحلوة واتفسحى شوية وضيعى وقت ومتذاكريش يا هاااااااانم انا عرفاكى بتحبى تهربى من المذاكرة وتيجى هنا تشمى هوا...

يللا يا شوباب تعالوا بقى عشان عمرو يرد على التعليقات لانه ممتنع باين وللا ايه...انا مش جايلى نووووووم وعايزة حركة

مستنياكوا

عمرو يقول...

أهلا يا إنجي
ما فهمتش أول سطر في التعليق الأول
بس عموما إيزولد مش بلدياتي ولا حاجة, أنا من قرية كبيرة اسمها تونس وفيها سلام وطني خاص بيها (إحنا التونسية توينا اندلينا) لكن هي حياللا من مركز صغير جدا جدا اسمه المنشاة ههههههههه
بالنسبة لسموث كريمينال فدي أحد الأغنيات اللي باعشقها للكنج جاكسون
كل كلامك في الجول يا إنجي, روحي استريحي حبتين وتعالي تاني احتمال الواحد يكتب حاجة :)

أحمد الشمسي يقول...

ايه يا عم الحاج النوستالجيا دي كلها؟ جاكسون هيفضل يتسمع عادي بس يمكن على انه من الكلاسيكيات.

وبعدين انت عملت حاجة في المقال ده ما حدش يجرؤ يعملها، انت كتبت ريهانا وإيمنم وحمزة نمرة في سطر واحد!!!! يا قلبك يا اخي!

العلاقة العجيبة دي لا تستقيم شكلا ولا موضوعا، حمزة نمرة شعبيته متواضعة، وشغله موجه لفئة واحدة بس هي اللي هتحبه، وما بيعملش هيب هوب زي ريهانا وإيمنم. على الطرف التاني ريهانا وإيمنم بيعملوا شغل فيه الكثير من البذاءة، حاجة كده زي الأغاني الشعبية عندنا، وبالتالي هم فعلا مختلفين عن جاكسون، بينما نمرة مش كده، بيعمل بوب برضه تقريبا، يعني ما يفرقش كتير عن جاكسون وبالتالي فيه أمل انك تسمعه وتحبه.

بس تعرف، أنا كمان زعلت لما جاكسون مات، بس ما تقولش لحد :)

أسما يقول...

انا كتبت تعليق طويييييييل اوي، نمت له يومين مخصوص عشان اقدر اقعد علي الجهاز و اكتبه، و بعدين بلوجر قال لي " تعذر معالجة طلبك"
:(
اعيط يعني يا عمرو؟ انا مقهووووور... ده كان كومنت كفاءة، اي و الله... انا دلوقتي محبط و دايخ ولازمن اقوم انام، بكرة ان شاء الله هاحاول تاني
نايتي نايتي
:)

غير معرف يقول...

"وبعدين انت عملت حاجة في المقال ده ما حدش يجرؤ يعملها، انت كتبت ريهانا وإيمنم وحمزة نمرة في سطر واحد!!!! يا قلبك يا اخي!"

loooooooooooool :D:D
that really made me laugh
bas fe3ln 7amza namera has nothing to do with Eminem and Rihanna

bas 3ady ba2a aked 7adretak shayef en fe sela

 

عمرو يقول...

فيه عدم فهم متعمد في التعليقات دي. أنا ما قصدتش إن فيه رابط يجمع بين التلاتة غير رابط واحد بس هو إني ما باسمعهومش, وباسمع إنهم عاملين ضجة, الأكتر من كده إني حاولت أسمع وما استسغتش التجربة

غير معرف أرجو أن تترك اسما ولو مستعارا في المرة القادمة
طبتم جميعا