يوليو 18، 2009

إنفلونزا المشايخ

mosque_by_abdullahcoskun

الشيخ في أحد أكبر مساجد القاهرة أراد أن يخطب في الناس كي ينهاهم عن الزنا, فجاءت كلماته كالتالي:

الزنا يا اخوانا, حفظنا الله وإياكم أصبح منتشر أكثر من المصافحة باليد. كل واحد يخلي باله من مراته, كل واحد يخلي باله من بناته, من اخواته, ومش عايز أقول من امه. خلي بالك من امك. (هنا تحديداً انفجرت في الضحك, رغم أن الكلام ينطوي على سبة لأمهات جميع المصلين, لكن شر البلية ما يضحك) كان الناس فيما مضى لا يقربون الزنا إلا أهل الطبقات الدنيا من المجتمع, لكن دلوقتي أديكوا شايفين وسامعين (هذه الجملة ينقصها مصمصة بالشفتين). كان فيما مضى صعب أن ترى عنق امرأة.. دلوقتي سهل جداً أن ترى رقبة أي واحدة بعد الإيشارب الجديد اللي بيربطوه للخلف (عارف كل حاجة الشيخ ده), تبقى الواحدة ماشية وجزء من شعرها مكشوف ورقبتها باينة وتلبس لبس ضيق وقصير ولما توطي في الميكروباص ضهرها يبان.. أصبحت المؤدبة يا اخوانا هي اللي تشد الهدوم على ضهرها وهي نازلة في المواصلات عشان ضهرها ما يبانش. أصبح من السهل أن ترى ضهر امرأة أو بطن امرأة أو صدر امرأة (مش عارف ليه افتكرت البياعين اللي في العتبة مع رتم الجملة الأخيرة). والكلام ده كله حرام.. والله العظيم حرام, والمصحف الشريف حرام (لاحظوا معي أن هذا شرك أصغر لأن "من كان حالفاً فليحلف بالله أو ليصمت" (ص))

جالي واحد وقالي يا مولانا أنا هاهجر زوجتي سنتين عشان تتلم. سنتين يا مفتري. ده ربنا بيقول "ولا تزروها كالمعلقة" زميلها بيعاكسها في الشغل.. تفتح التليفزيون تلاقي شاب بيقبل فتاة.. تفتح البلكونة تلاقي الجيران متهنيين. دي عايزة راجل.. عايزة راجل (دي بقى جملة تهلك من الضحك رغم إنها فيها إشارة إلى إن المرأة منحرفة بطبيعتها.) يهنيها وتعاشره (وكأن العلاقة بين الراجل والمرأة علاقة متعة جنسية فقط.. كنت مستني يقول "تتكلم معاه") وانت تقولي سنتين. واحدة زي دي نعملها فتوى لوحدها في حرمانية الزنا من حليته!!

يا اخوانا اتقوا الله في نفسكم.. اتقوا الله أديكوا شايفين انفلونزا الطيور وبعدها انفلونزا الخنازير, ما بقاش غير انفلونزا المشايخ. (لم أستطع أن أكتم ضحكتي هنا أيضاً)

هكذا هو الخطاب الديني في بلادنا إذاً. أغلب المشايخ يلجئون إلى كلام فصيح لا يفهمه العامة أو كلام مبتذل يدنو بعظم ومكانة الشيخ وخطبته. عندي مشكلة منذ أكثر من عشر سنوات, وهي أني بدأت أدرك أن ليس كل ما يقوله الشيخ مسلماً به وصحيحاً, وأن دماغي لا ينبغي أن تسلم إلا لمن يفهم. وهؤلاء الذين يفهمون يروجون في أغلب الأحيان لتيارات تأخذني بعيداً عما أراه قلب العقيدة. يبدو أنني سألجأ في النهاية إلى قراءة النصوص المقدسة وحدي وأحضر خطب الجمعة حتى لا يكتبني الله عنده من الجالسين في بيوتهم.

ما لا يعرفه هذا الشيخ هو أن انفلونزا المشايخ متفشية جداً وتحتاج إلى علاج سريع.

هناك 18 تعليقًا:

جارة القمر يقول...

و الله كلامك صح ... انا عن نفسى بتعب نفسيا لما بسمع خطبة الجمعة كل مرة بيتكلموا عن الصلاة و الصوم و الحج و الزكاة و بس و كأن الدين كله هو دا و حتى لو حصل واتكلموا عن فساد فى المجتمع او حاجه من دى بتلاقى الخطبة اكل تلت تربعها مقص الرقابة ... و الشيخ لو مش سمع كلامهم يتاخد امن دولة

بتعتب ليه على المشايخ كل واحد خايف على بيته و عياله خايف انه يروح ورا الشمس لو قال دا غلط بعلو صوته فبقوا بيدوروا على اى حاجه يتكلموا فيها و باى اسلوب ما هى بايظة بايظة

تعالى شوف مشايخ عندنا ربنا بجد يبارك لهم كانوا عايزين يغيروا مجتمع بجد و ايه النهاية امن دولة و اتمنعوا من الخطبة اصلا .

يمكن الاسلوب اللى انت قلته دا مضحك فعلا بس صدقنى يمكن ناس كتيييييير اوى لو كان قاله بطريقة تانية ماكنتش فهمته

حاجات كتير اتغيرت حتى الدين وضعوه فى قالب التغير بس للاسف التغير للاسوء

أسما يقول...

و عجبي!!!

يعني هي جات عالمشايخ يا عمرو؟ يعني اشمعني دول اللي هيفضلوا بخير، ما هي كلها خربانة... دكاترة، و مهندسين، و اساتذة جامعة... كله ف البطاطس... ما تتعبش نفسك و صهين ;)

noon kiko يقول...

ودى ياعمرو نشربلها ايه..التامي فلو بتاعها خلصان...بس على فكره العيب مش ف البنات بس ما الرجاله غلطانين..شايفين البت ضهرها باين يغمضوا عنيهم لحد ماتنزل زلا ايه..؟ههههههههههههه
على راى شيخ فى مسجد قريب عندنا..اول ماتبدأالخطبه يبدأبوعظ للبنات..ويعلى صوته زى صوت شيخ معين فى قناة الناس بيرعبنى ويقومنى م النوم مفزوعه..يقولك ..مش بتصلى؟هتدخل النار..وكانه واقف على بابها
الشيخ بتاعنا كمان ندخل المسجد..يقول..الفتيات..ثم الفتيات..عافاهم الله..تقولشى عندنا الطاعون..ويكمل..هداهم الله..واحنا نأمن اللهم آمين..فين من ربهم..لاحول ولا قوة الا بالله..تقولشى كل البنات كفرت..
والله انت معاك حق..بقت انفلونزا المشايخ..بس ياريت تشوفلنا ليها لقاح

عمرو يقول...

جارة القمر
المشكلة يا جارة القمر مش بس في الكلام عن الصلاة والصوم والحج بس. المشكلة إن الحاجات دي فيها كلام كتير ماحدش يعرفه خالص. والشيوخ مش بيتعبوا نفسهم
ربنا يهدينا ويهديهم
سيبك انتي.. انتي عاملة إيه؟
:)

عمرو يقول...

لا ما جاتش على المشايخ يا إيزو والله. برضه على نفسهم
:)

عمرو يقول...

أهلا يا زهرة يا بنتي
ههه
عاملة إيه
لا طبعا المشايخ بتوعنا زي الفل والبنات فعلا هما اللي وحشين.. وبعدين يعني إيه الرجالة يبعدوا عينيهم لما يشوفوا ضهر بنت..ده اسمه كلام برضه
غلطانة طبعا
:)

جارة القمر يقول...

ازيييييك عامل ايه يا عمرو ؟؟

نسيت اقولك ان الصورة اللى انت مختارها للبوست بجد بتتكلم لوحدها
جامدة جدا

عمرو يقول...

أنا الحمد لله
تمام
شكراً على حكاية الصورة دي مع إني عارف إن كل الصور اللي باختارها حلوة
(مغرورون مغرورون يا ولدي على رأي إيزولد ههه)
:)

noon kiko يقول...

ايه ياعم عمرو..داخل سخن عليا..والله كده هبطل ازورك..ثم انا مالى ضهرها يبان وسطها يبان ..انا الحمد لله مبخرجش من بيتنا قبل ما اعدى على الجمارك..ماما واخويا..ويتعملى فحص شامل,..حاجه كده حاجه كده..تتسحب منى الرخص
والله يقطع البنات وخلفتها اللى هتوقع بينا كده..
وخد خصامك
بس.هه

عمرو يقول...

زهرة
:)

noon kiko يقول...

لا والله زعلانه بجد..هاتلى شيكولاته..وانا افكر اصالحك..بس عموما شكلك بتطفشنى بالذوق..ههههههههههه
مع انى عامله حس للبلوج

noon kiko يقول...

ثم ايه مفيش حتى تيجى تطيب خاطرى بكلمتين..كل اللى ربنا قدرك عليه..وش ومقلوب كمان..سبحان الله
انا هروح اقرا بلوج تانى وهسيبهالك..بس..هه ومخامصاك خالص

عمرو يقول...

أهلا زهرة
الصمت كثيراً ما يكون أبلغ من الكلام وقد قلت كثيرا بصمتي. عموما ما تزعليش يا ستي. هاجيبلك شيكولاتة.. انتي ما بتجيش غير بالشيكولاتة؟ ههه
اقؤي بقى القصة الجديدة وعلقي
:)

noon kiko يقول...

رغم انى مخاصماك خصام جامد..بس طبعا انت بتكتب عن حاجات والله كنت بكتبها فى يومياتى..وطبعا ده اغراء ليا بالتعليق..رغم انى كنت عايزه امتنع عن التعليق..لوى دراع عشان آخد الشيكولاته..بس تقول ايه؟قلبى طيب..والقصه جامده..وبتفكرنى بالمكتبه الخضراههههههههههه

جمال عمارة يقول...

أنا طبعاً لازم أقول كلام حلو.. لإني لو قلت أي كلمة كده ولا كده قراءك ماشاء الله ها يقطعوني.. :)
لا بس بجد يا عمرو المدونة رائعة والمقالة دمها خفيف.. والإنتاج ما شاء الله غزير..
ها أبقى آجي لك كل شوية..

عمرو يقول...

زهرة
إيه حكاية المكتبة الخضرا دي؟
طبعا ما تقدريش ما تعلقيش (عارف إني مغرور)
:)

عمرو يقول...

أهلا أهلا أهلا يا باشا
لا لا لا
أنا مدونتي شرفت
استنى أندهلك المدونين حبيابي.. ولا انت مستعجل.
شاي يا ابني للاستاذ جمال.. ولا نجيب حاجة ساقعة؟
والله يا باشا دي خطوة عزيزة جدا, ولو إنها متأخرة حبتين
تقدر يا فندم تقول اللي انت عايزه الزوار عندنا أليفين ومش بيعضوا. ده أنا عندي حبة مدونين بيزوروني إنما إيه.. حاجة كده زي العسل.
انت تشرفنا على طول.
اتفضل يا باشا
وسع يا ابني للباشا
وسع
مع السلامة
في سلامة الله
:)

noon kiko يقول...

متعرفش المكتبه الخضرا..دى اكبر مكتبة قصص اطفال..اللى انا طبعا اكبر طفله فيهم..ههههههههه
وايه الغرور ده ولا دى ثقه بالنفس..انا طبعا هقرا واكيد هعلق..واول ماهتيجى حضرتك الورشه انا واثقه هتدفننى ف بير السلم هناك ههههههههههههه