مايو 29، 2009

الأميرة والضفدع

The_Princess_And_The_Frog_by_cemac الحكاية دي للبنات الحلوين. الولاد الوحشين الكلبين اللي مش بيحبوا الحكايات مش يقروا عشان مش عايز تعليقات كده وكده. واللي هايقرا ويعلق تعليق وحش.. هاندهله ماما وانتو عارفين من البوست اللي فات ماما ممكن تعمل إيه.. المهم الحكاية بقى.

كان يا ما كان يا سعد يا إكرام, وما يحلى الكلام إلا بذكر النبي عليه الصلاة والسلام..

قولوا.. أيون, عليه الصلاة والسلام.

حكايتنا النهاردة عن أميرة وضفدع. بس على عكس كل الحكايات.. الضفدع في الحكاية دي ماكانش مسحور ولا حاجة. يعني ما كانش فيه ساحرة شريرة بتحب الأمير الوسيم وعايزاه يحبها, فلما ما رضيش يبادلها نفس الشعور سخطته ضفدع. لا, الحكاية دي مختلفة. الضفدع اللي بنتكلم عنه كان ضفدع من الأساس, من يوم ما خرج من البيضة .. ربنا خلقه كده.

في يوم من ذات الأيام الضفدع واقف على ورقة شجر على شكل قلب في البحيرة اللي قدام شباك الأميرة وبيغني

- عاكة. عكاكة.. عاكة. عككككاكة (ودي معناها "أنا بحبك.. أنا أنا أحببببك" بس بالضفاديعي)

المهم الأميرة قالت "يااااااااع إيه الصوت الوحش ده".. فلما فتحت الشباك ولقيته واقف قالت له:

- إيه ده يا ضفدع.. انت صوتك وحش قوي. مش تغني تاني لو سمحت.

الضفدع اتكسف قوي, لدرجة إنه اتقلب من على ورقة الشجر وبقى تحتها, ورفع راسه والورقة عليها بكسوف. فالأميرة قالت له:

- بس تعرف, انت ضفدع مميز (سبيشال يعني) وحجمك كبيييير خالص خالص. انت ضفدع ملكي, انت من النهاردة بقيت الضفدع الخاص للأميرة.

طبعا هو ما كانش يحلم. الضفدع الملكي للأميرة مرة واحدة. فرح قوي, وبقى كل يوم يجي يشوف الأميرة ويعرف أخبارها.. بس يظهر إنه مع الأيام نسي إنه ضفدع وإنها أميرة وافتكر نفسه أمير مسحور بصحيح هايتحول لما الأميرة تبوسه. وفي اليوم الموعود وقف قدام شباك الأميرة ولما طلعت قالها.

- عاكة عكاكة. (أنا باحبك)

الأميرة ما فهمتش. قام قالها الكلام تاني, قالتله.

- انت مالك النهاردة يا ضفاديعو. لونك مخطوف كده وكأن فيه حد هايموتك.

الضفدع قال:

- عاكة عكاكة. عاكة عاكة (أنا باحبك وعايز أتجوزك)

لما الأميرة ما فهمتش, راح الضفدع نفخ جلده وعمل كويرة كبيرة تحت بقه.. وقعد يعمل ذبذبات في المية. ودي بقى حاجة بتقول الحدق يفهم. والأميرة كانت حدقة قالت له:

- إيه ده يا ضفدع. مش معقولة جرءتك دي. انت عايز تتجوزني؟

سكتت الأميرة. كانت بتقول في عقل بالها, هو شكله مسحور ولما يتباس ممكن يطلع أمير طيب. بس ما هو ممكن الأمير في الحكاية دي يطلع شرير. أبوسه ولا لأ؟

قالت الأميرة:

- خلاص يا ضفاديعو انت صعبت علي. تعالى أبوسك عشان تتحول وأمري لله.. ولا أقولك لا دي حكاية مقرفة قوي حكاية البوس دي.. يااااااااااع. مش ممكن أبعتلك واحدة من الخدم تبوسك مكاني؟ يا مرجانة.. مرجانة.

الضفدع زعل قوي. هو كان عارف إنه مش مسحور. فراح مدي ضهره للأميرة وعام بعيد بعيد بعيد.

الأميرة ما اتجوزتش على فكرة وما حدش عارف ليه. أما الضفدع فبعد ما حب الأميرة ما عرفش يستسيغ فكرة إنه يتجوز من إناث الضفاديع. وكل يوم في البحيرة البعيدة قوي بيقف على ورقة شجر على شكل قلب ويفضل يغني

- عاكة. عكاكة.. عاكة. عككككاكة (ودي معناها "أنا بحبك.. أنا أنا أحببببك" بس بالضفاديعي)

تمت الترجمة من الضفاديعية إلى العربية في معامل عمرو السيد القاهرة (مترجم جامد والله وعارف كل اللغات)

:)

هناك 30 تعليقًا:

أسما يقول...

:)

دي تصبيرة لحد ما ارجع من الجامعة

تــسنيـم يقول...

تحفة.. بس تفتكر ما اتجوزتش علشان عملها عمـــل

;)

عمرو يقول...

أهلا يا إيزو
كويس انك بخير والله أنا كنت قلقان عليكي وكنت ناوي أخلي لون المدونة رمادي لغاية ما تظهري تاني.
ألف حمد الله على سلامتك
مستني تعليق مفصل
:)

عمرو يقول...

والله يا تسنيم دي حاجة ما حدش يعرفها. احتمال تكون الأميرة بتحب الضفدع بس الخوف مخليها مش عارفة تاخد قرار
يا الله دع الخلق للخالق
تسنيم استمري.. يا بنتي انتي على أعتاب الفوز بجائزة أفضل قارئة للمدونة

:)

آيــة يقول...

:) :)

أنا هنا على فكرة .. باجي و بقرا على طول و الله .. بس هجراني مهارة التعليق بقالها مدة ..

على فكرة الأميرة هي اللي غلطانة جدا و وحشة كمان .. ليه تعشم الضفدع المسكين ، اللي هو عارف كويس اوي أنه ضفدع ، و تقربه ليها و تخليه ضفدع ملكي ، يشوفها و تشوفه كل يوم ، و لما أمله يكبر تروح مبينة خوفها و كمان قرفها كده ..

:) :)

اروح اعلق ع اللي فاتني بقى :)

Unknown يقول...

بص هو ممكن تكون بتحبه اصلا بس عندها مشاكل نفساوية يعنى....هو كمان عنده مشاكل لانه معرفش يتخطى حبه ليها..

والله الضفاديع دول حاجة مقرفة يعنى ليهم حاجات كدة تعقد يا جدع..وبعدين عارف؟؟ هو لو كان قالها من الاخر بحبك بحبك بدل عكاعكاعكا دى كانت فهمت على طول وكان كبر فى نظرها لكن هو قعد يلمح كدة ويهيس وميقولش كلام مش يتفهم فهى قالت كرامتها بقى وبتاع وحركات وكدة..فاهمنى؟؟

عموما موتتنى من الضحك الحتة بتاعة ترجمة الضفاديعى بمعامل عمرو عزت.احد احلامى كان انى امتلك معمل ترجمة واترجم الافلام بقى وكدة..يااااااااه شوية افلام بقى من اللى هى الجامدة دى واترجم صح بقى مش الهبل بتاع التلافزيون المصرى..ايون مهو الحلم دة كان من ايام التلافزيون كان الدش لسة منتشرش يعنى..

ايه لازمة الرغى دة؟؟؟ حاجة غريبة يا جدع....ميرسى على الجرعة اصلى خلاص بقيت مدمنة..اخدت الحقنة وارتحححححححححححححححححححححت

سلام

Unknown يقول...

هو مين عمرو عزت اللى انا بقول عليه فى التعليق دة؟؟؟؟
غريبة انا اصلا معرفش حد اسمه عمرو فما بالك بعمرو عزت بقى....
لا بجد بجد مين عمرو عزت؟؟

عمرو يقول...

آية
أولا أنا مستشكر جدا على كم التعليقات ده كله
أنا برضه ما نستكيش بس كل ما أفتح مدونتك أقرا ومش عارف أعلق
يعني بصرة
عموما انتي ليكي علي تعليق
أنا رديت على كل تعيقاتك عندي على فكرة
بصي بقى تغلطي في الأميرة يبقى هاحطك في اللاك ليست. الأميرة وحشة؟ طيب يا آية أنا مخامصك بس
هي ما عشمتهوش ولا حاجة. في عقل مين إن الأميرة تتجوز ضفدع يعني؟ تيجي في بال مين. حتى الضفدع ما لامهاش
:)
أروح أعلق عل الشاي
;)

عمرو يقول...

أهلا إنجي
والله يا بنتي على طول رافعة معنوياتي وأنا هاديكي جائزة رفع المعنويات من الدرجة الأولى.. استمري
هي فعلا يظهر عندها مشاكل نفساوية.. وهو كمان
ههههههه حكاية معقدة يا شيخة والله

أنا عمرو السيد على فكرة.. مخامصك انتي التانية, مين عمرو عزت ده. انت تعرفي مدونين غيري
:(

عمرو يقول...

إيزو
على فكرة لسة مستني
انت بقيتي وحشة قوي على فكرة
هيه

Unknown يقول...

عمرو باشا مستنية تعليقك على البوست بتاعى الجديد

بجد مستعجلة اعرف رايك فى اسلوبى القصصى
لا حلوة اسلوبى القصصى دى تصدق؟؟

أسما يقول...

"عاكة. عكاكة.. عاكة. عككككاكة"

دي احلي افتكاسة شفتها. بس تعرف انت هلكتني علي نفسي من الضحك انهاردة الصبح، و رحت الجامعة( ربنا يجعل كلامنا خفيف عليها) و انا منشكحة خالص، و دي ما بتحصلش يعني. الف شكر

اما بقي عن الاميرة و الضفدع... مش عارفة، انا مبسوطة اوي بالحكاية و "الانقلاب" اللي انت عملته فيها. بس يمكن هي ما قدرتش تتجوز بعد ما اتعودت عالحب الضفاديعي... اصل يا ابني البني آدمين حبهم يااااااع اوي، مضروب، مش اصلي. سيبك انت، الضفاديعي يكسب
:)

عمرو يقول...

أنا علقت خلاص يا إنجي
تسلم إيدك يا مبدعة
:)

عمرو يقول...

فعلا يا إيزولد الضفاديعي يكسب
:)

Che يقول...

ايه يا نجم ملقتش كلمه تعبر عن الحب اوحش شويه من كلمه عاكه .. ده كده الاميرة حقها تندهله مرجانه تبوسه و كويس انها مندهتش لمسرور
بس سيبك جامده القصه .. فكرتنى ايام ماكنا بنلعب دور الضفادع مع ان اللى بنحبهم ماكانوش اميرات ولا حاجه ....هيــــــــــــــه دنيا .. ايه يا سيدى احمد

عمرو يقول...

تصور كلامك صح يا تشي. أنا أول مرة آخد بالي. صحيح من حق الأميرة تنده مسرور هههه
عموما تتعوض في الحدوتة اللي جاية
انت كمان كنت ضفدع. ربنا يكرمك وتلاقي أميرة
:)
أنا فرحان قوي انك شرفتني
لكن انت ليه حاطط وش جيفارا؟ ويعني إيه تشي؟ معلش أصلي أنا فهمي ومعلوماتي على أدي. وأدي ده كبير قوي خالص (على رأي إنجي)
:)

Che يقول...

عمرو باشا
انا هارد على الاسئله بس يمكن من غير ترتيب
انا اسمى عمرو برضه على فكرة ... و تشى ده كنيه عن جيفارا .. ارنستو تشى جيفارا .. و تشى دى كلمه معناها الدارج الجدع ... ههههه
و انا حاطط صورة جيفارا عشان انا بحب الراجل ده فعلا ... يعنى لما تفكر فى التمرد .. فى عدم التقليديه فى الثورة ( اى كان معنى الثورة اللى انت تقصدها ، بس خلى بالك من امن الدوله ) هتلاقى اول صوره و يمكن الصورة الوحيده اللى تنط فى دماغك هى صورة جيفارا ... يمكن عشان انا متمرد بطبعى ( اة ببرجى عشان انا جوزاء ) .. هههه
ايه الرغى الكتير ده كله
انا اتشرفت انى جيت مدونتك يا باشا

عمرو يقول...

أهلا يا جدع (تشي سابقاً)
أنا والله مبسوط ان اسمك عمرو مع إني في الحالات اللي زي دي مش بابقى مبسوط. مش باحب يبقى في أكتر من عمرو في نفس المجال. لكن مش عارف ليه أنا فرحان إن اسمك عمرو
:)
طبعا جيفارا رمز للثورة وإن تغذى فكره على الكتابات الماركسية. أنا ما كنتش أعرف إن اسمه التاني تشي. لكنه رجل يحترم لأشياء كثيرة, من أهمها إنه لم يمكث في كوبا بعد انتصار الثوار وسافر العالم كي يبحث عن ثورات جديدة

تعجبني كلمة قالها يوماً "اذا لم تحترق انت وانا فمن سينير الطريق"
ربنا ينور الطريق من عنده من غير ما نتحرق
قول آمين

Che يقول...

ههههههه .... جامده جدا اهلا يا جدع دى
انا بعد اذنك هاقرا البوستات القديمه بتاعتك و يمكن اعلق عليها ... بس يا ريت ماتتخنقش و تقول بعد العيد مابيتفتلش كحك
سلام من الجدع ( تشى سابقا ) الى عمرو باشا

عمرو يقول...

يا ابني ده أحد أهم قواعد المدونة هنا, إن اللي يقرا القديم لازم يعلق.
والله فرحتني
:)
أسعد الله يومك يا جدع

عطش الصبار يقول...

مراره روح
واللهى الاميره دى ماعندهاش اخلاق الاميرات سايباه كل يوم يغنى ليها لحد صوته ما بقى زى اصوات بنسمعها على الفضائيات وبعدين اتخلت عنه
كان ممكن تجيبله مهندس صوت يظبط النغمه
عموما الترجمه الضفاديعى جديده
وفيه كتير محتاجين للترجمه دى
تقبل تحياتى

عمرو يقول...

لااا يا عطش الصبار
أولا أهلا بيكي
ثانيا.. أنا مش أسمح إن حد يهين الأميرة. فأنا الحارس الخاص والشخصي ليها (أنا مسرور) ههه

أهلا بيكي تاني.. شرفتيني والله
:)

Unknown يقول...

حرام عليييييييييك الجرعة يا عم انت..لالالا عيب والله العظيم دة انا عندى امتحان الصبح واعراض الانسحاب ابتدت تظهر عليا...انا متضايقة جدا اوى خالص يعنى ومينفعش كدة عايزة الجرعة حرام عليك..قرش الكابتشينو فييييييييييين

عمرو يقول...

أنا آسف يا إنجي
عمو بتاع الأفكار مش جه النهاردة. لكن أنا ححاول أوصل أجيب منه فكرتين عتاقي كده النهاردة
:)

أسما يقول...

I'm fond of Che too, thought u know his name is Che, i was shocked u didn't know it, yeeeeeeeeeee!
Any way, there's a famous saying 4 him that i love: " Nothing is worth living for except the thing that u wud die for" Ay 7'edma
:)

عمرو يقول...

إيزولد
إيه الثقافة دي كلها. طيب أنا مش كنت عارف والله أعمل إيه في نفسي
:)

micheal يقول...

عاكككككككككككككككككك
عاككككككككككككككككككك
ضحكة ضفاديعي
:)))
جميلة بجد ويا بخت من وفق ضفدعين في الحلال
:)))

عمرو يقول...

هههههههه
يا ابن الإيه
عامل إيه يا ابني وأخبار أم نبيل؟
ما تحرمناش م زياراتك
:)
عاكككككككككككككككككك

أسما يقول...

تصدق بالله، انا هنا ف مرة كنت باعمل شوبينج عااادي، و بعدين لقيت دبوس علي شكل ضفدع بيضحك و مكتوب تحت منه
frog
فما قدرتش اقاوم الصراحة و جبته، انا مش عارفة ليه، انا اصلا مش هاستعمله، بس هو معايا...
المهم، انا دلوقتي هاناااااام، الحدوتة جابت مفعول... بكرة اشوف باسم و بسمة... هااااااومممم

نايتي نايتي
:)

عمرو يقول...

إيزولد
تعرفي لما باقرا البوستد ده باحس إني فرحان مش عارف ليه..
ذاكري المدونة كويس عشان الامتحانات قربت
:)