مايو 28، 2009

عايش بروح مستعملة

untitled

النهاردة الفجر وأنا شايل الشنطة الخفيفة اللي ما فيهاش غير اللاب توب وبنطلون واحد وقميص, حسيت إني شايل حمل تقيل, وكنت خايف أخبط على الباب لاحسن ماما أول ما تشوفني تفرح, وبابا لما يشوفني يبتسم. أصلي بازعل قوي لما أشيل الشنطة تاني وألاقي ماما بتبكي وبابا من غير ملامح بيحضني ويقوللي “خلي بالك من نفسك”.

لما نمت على السرير في أوضة أحمد, حسيت نفسي لسة صغير وسمعت ضحكتي أيام زمان.. القعدة كانت ناقصة مصطفى, لو جه كان أكل معانا وكانت فرحتي كملت. لما كلمته قاللي إنه مشغول في المستشفى وبعدها المعمل, وإنه ممكن يقابلني بعد الساعة حداشر, فقلت له لأ مش عايز أشوفك. وقفلت. يعني بعد الغيبة دي أشوفك ساعة واحدة يا مصطفى؟ أنا عايز أشوفك سنة.

لما عديت في الشارع ورفعت إيدي وسلمت على باسم, ما بصش ناحيتي وما ابتسمش. باسم هو بياع الهدايا اللي كنت باشتري من عنده هدية كل أسبوع أو اتنين لخطيبتي قبل ما أفسخ..

لما رحت أدفع فاتورة الموبايل قاللي محمد عارف في موبايل شوب, "يا لهوي كل دي فاتورة".. ما يعرفش إني خلاص مش هاتكلم كتير تاني وإن كل اللي باحبهم أو بيحبوني سكتوا وإني سكت.

جوايا خوف فظيع من إن فودافون تحولني من عميل فودافون وان لعميل عادي.. مش ناقص غيرك يا فودافون توجعيني وتفكريني بإني بقيت لوحدي.

لما دخلت عشان أنام في العصر, كنت متضايق قوي. غمضت عيني وافتكرتها وهي بتلاعب بنت صاحبتها. ضحكة البنت الصغيرة فرحتني. بعدها حطيت إيدي على صدري وتخيلت إني نازل أشتريلها هدية وإن باسم بيبتسم.

لما رحت للأستاذ محمد عبد المطلب. قاللي إن قصصي كلها عايزة تتغير, وحسيت بإحباط شديد وإني لسة مبتدئ. روحت نمت وأنا زعلان إن حتى الأدب أصبح مصدر للألم.

على كافيتيريا بوب.. كنت باضحك بشكل هيستيري, لحد ما واحدة شكلها دخلت. قمت أنا اتغير شكلي وقمت من المكان. وقلت يا ترى عاملة إيه يا فراشتي؟ ليه بتغيبي كده؟

لما ماما جت قعدت جنبي وسألتني ”انت هاتترهبن ولا إيه؟” هزرت معاها وضحكت, ولما زنقت علي في الكلام قلت لها “أنا قلبي وروحي بقوا مستعملين, ما ينفعش أروح أرمي بلايا على بنات الناس... “

ردت علي ببساطة وقالت لي “يبقى نشوفلك بنت بروح مستعملة”.

هناك 11 تعليقًا:

Isolde يقول...

اولا، حمد الله علي السلامة. انا كنت عارفة انك هنا، شكرا انك اكدت لي ده

اقسي تعبير استخدمته يا عمرو" روح مستعملة" من اقل من ساعةكنت باقول لنفسي اني used, second hand
جيت انت و قلت كدة و الليلة ضلّمت... حقيقي مش عارفة اقوللك ايه

عمرو يقول...

يا بنتي ده كلام أدبي بيضحك بيه المبدعين اللي زيي على القراء. روحي مستعملة قال.. فشر
أنا لسة بشوكي.. ههههه ومعايا ضمان.
وبعدين مش أنا اللي زلت البوست ده أخويا التوأم
أنا كنت ناوي أكتب حاجة مبهجة لكن البوست طلع مكتئب

ما تقوليش كده على نفسك يا إيزو.. خدي نفس كده.. قولي ورايا "أنا مش بروح مستعملة. أنا جديدة نوفي" كرريها خمستاشر مرة كده قبل ما تنامي وقوليلي الأخبار
أنا - أقصد أخويا التوأم بيعمل كده

enjy يقول...

عارف ايه الاسوأ؟؟؟
انك متكونش عندك تجارب كاملة اصلا ومع ذلك روحك تكون مستهلكة ومستنزفة..يعنى مع ان قصصك مبتورة لكن فى حاجات تانية مخلياك مستهلك اوى لما حياتك تبقى بايظة واسلوبها فى خلل فى النظام..لما عيشتك تبقى عايزة يتعمل لها فورمات..لما كل دة ميبقالوش علاقة بالحب لكن مشاكلك عميقة اوى وبتوجع..لما تبقى عارف ان حتى لو حصلت معجزة سماوية هتفضل فى ندبة فى روحك مبتروحش..لما تكتشف ان مفيش عمليات تجميل لتاريخ البنى ادم

لما تكتشف كل دة مش هتبقى مبسوط خااااااااااااااالص على فكرة

هو انت عامل ايه دلوقتى؟؟ عجبنى ردك على ايزولد اوى جدا خالص..بس مش هنفذه طبعا يعنى

عمرو يقول...

مش عارف أقولك إيه يا إنجي
يبدو إن باب النجار مخلع.. ده أنا قلت انتي اللي هاتحلي المشاكل النفسية لصاحب المدونة والزوار.. عموما ما يهمكيش استريحي كده على الشيزلونج.. قولي بقى احكي.. امم لا ده موضوع خطير. يلزمك قراية تدوينة من واحد عبقري كل يوم

:)

nor يقول...

أولا يا ياوجع قلبي المتكرر معاك..... كفايه المشرحة مش ناقصة قتلا

ثانيا موضع "روح مستعمله" ده خطير اياك تاخد واحده بروح مستعمله دا غلط بحذرك " أوعى!!!"

بس لو كنت مصر يعني نفسك هفتك خلاص انا عندي واحده برحين " واحدهه جديدة و التانية مستعملة" لزوم الرمرمه ... شوف اذاي انا بفكر فيك على طول مش ناسييك
يلا سمعني نغمه "سيكا" ولطمللي يا جدع

تــسنيـم يقول...

أنا بقى عكس إيزولد خــالص علشان تعبير " أنا روحي ومشاعري used " ده .. تعبير خرافي ، وبستعمله دايما وبقوله لأي حد يحاول يقرب :)

مشــاعر غير قابلة للترميم يا عمــرو


;)


أه نسيت أقولك حاجة... إن الشئون الصغيرة هي أكثر ما يقتل بعد الانفصال بس والله هتاخد وقتها وتعدي


believe me am sure

آية مش هنا يقول...

وجعت قلبي كلمة روح مستعمله ..
تصدق اني كان ممكن اقول على كل كلمة قلتها في البوست ده .... آمين ..
لو من سنة بالضبط
كانت وقتها الناس اكتر ، و الحياة ازحم .. و المبهجات تبدو أكتر ..
و كنت بقول روحي مستعملة و مجهدة و .. وحيدة ..
لما شفت الأسوأ .. و فقت منه ...
بقيت ممتنة اوي للناس الموجودة حتى لو قليلين .. و ممتنة جدا للضحك ، و للحاجات الحنينة الصغيرة ..
حاسة اني جديدة نوفي (على رأيك ) .. و أني لسه فوق في السما بتفرج ع الارض و بشاور عقلي انزل و لا لا ..

حرر نفسك .. و اخلق في صدرك توق لذكريات جديدة يا موهوب :)

و و الله فودافون طيبة جدا ...و بتحب كل عملاء الشبكة ..
و ربنا قريب :)

عمرو يقول...

ما تقوليش كده يا تسنيم هاتترمم بإذن الله. وعلى يدي, كل يوم بوست بهججي ينوسوكي اللي فات واحتمال اللي جاي
:)

عمرو يقول...

يا آية. لو خسرتي كل الفلوس اللي حوشتيها. وفضلتي في علاقة عاطفية انتهت بالانفصال بعد خمس سنين. وحد من أهلك عيي. وبعد عشر سنين اكتشفتي إن المجال اللي انتي شغالة فيه مش مناسب, هاتعرفي أنا ليه باتعرض للإحباط وليه باقول على روحي مستعملة
:(
بعد الشر عليكي يعني

تــسنيـم يقول...

متزعلش مني يا عمرو بس بجد أنا بستفسر مش بلوم.. إيه اللي يخلي اتنين يعرفوا بعض الفترة الطويلة دي وكانوا مرتبطين عن حب والمفروض حفظوا بعض عن ظهر قلب يفترقوا بعد الارتباط الرسمي .. إيه اللي جد عليكم مش إنتو برضوا نفس الاتنين اللي كنتوا مرتبطين بقصة حب قبل الخطوبة والا إتبدلتوا


السؤال بشكل عــام مش قصدي ليك بس بجد بتقهر لما أكتشف إن اتنين كانوا مرتبطين بقصة حب طويلة وبعد توجوها بالخطوبة وإذ فجأتني ينفصلــوا... ليه وإيه السبب؟


أنا أسفة لو أبدوا متطفلة لكن بجد أنا بسأل بوجه عــام مش أقصد شخصك إنت

عمرو يقول...

والله يا تسنيم حكايتي أنا حكاية غريبة جدا
ناس كتير مش بتصدق. وبالتالي فهي ليست قياسية ولا يمكن أخذها كمعيار للوصول إلى أي شيء.
كل اللي أقدر أقوله إني باقدرها وباحترمها وإن الغلط عندي
تحيتي