مايو 28، 2009

شقاوة

laughter_by_lauafer

الحكايات اللي جاية دي بافتكرها عشان أضحك. أي حد يقرا لازم يسيب حكاية بتضحكه في التعليقات. د احنا هانضحك ضُحك (بضم الضاض)

الواد محمد عارف لما كنا في الثانوية العسكرية, كان كل ما يشوفني يمسك الباريه بتاعي (غطاء الرأس العسكري عشان اللي ما رحتش الجيش من الآنسات) يخطفه ويعمل نفسه بينف فيه بس إيه لازم يقرف أهلي يعمل إزاي خخخخخخخخه وبعدين يعمل صوت قال إيه بينف في الباريه. في يوم من الأيام أنا كان عندي حساسية جيوب أنفية وحشة قوي ودكتور عبد المتين موسى اللي بقى بعد كده رئيس الجامعة قاللي انت هوبلس كيس واداني علاج قوي جدا كان ريحته مقرفة على الآخر. لما محمد عارف جه يعمل نفس الحركة, قمت لا إرادياً مسكت البروفل بتاعه ونفيت فيه بكل ما عندي.. مش عايز أقولكم شكل النفة يااعععع, عبارة عن شكل غير منتظم خد نص مساحة البروفل, طلع محمد يجري على الحنفية يغسل البروفل. بعد أسبوع جاني قاللي دي نفة ولا مية نار. كان لابس البروفل بعد ما مامته غسلته ومكان النفة ابيض. مش باقولكم الدوا كان قوي.

الأستاذ شيخون مدرس الاقتصاد, قالنا نكتب السؤال بالأُحمر والإجابة بالأزرج (مع ضم الألف في اللونين.. هو بيقولها كده) لما عدى على عمرو صلاح وشاف كشكوله قاله "جوم يا تور.. مش كاتب ليه السؤال بالأحمر والإجابة بالأزرج" عمرو صلاح وشه جاب ألوان وقلوا "يا أستاذ أصلي ما باعرفش أكتب بالأحمر".. أستاذ شيخون سكت كده وقاله بزعيق جامد "هو الجلم الأحمر عايزله كاتالوج عشان تكتب بيه.. تصدج لولا إني فطران كويس كان زماني وجعت من طولي"

لما علاء رشاد ضربني في بطني.. جريت وراه وزنقته في الحيطة وكان فيه طماطماية محمضة قوي على الترابيزة اللي جنبي أخدتها وعوصت بيها وشه كله وغسلت له بيها شعره.. ودخلت الطماطم في مراخيره وودانه. قام هو طلع يجري ورايا ومسح وشه في هدومي. لما دخلنا الفصل الأستاذ خالد طه حسين كان شامم ريحة طماطم معفنة. قعد يشم في الطلبة واحد واحد. وبعدين طلعنا إحنا الاتنين وقالنا استحموا وتعالوا احضروا حصتي.

كنت أنا ومحمد صبري وأسامة شوقي ومحمد عبد النعيم مثلث.. آسف مربع الخراب في فصل تالتة تالت للفائقين. كنا أفشل فائقين في المدرسة. كان لما الدرس يبدأ. واحد فينا يقول بصوت واطي قوي "باكا باكا باكا باكا بومبارو.." وبالباقي يرد بصوت واطي قوي " باكا باكا باكا باكا بومبيرو.." المدرس اللي بيكتب على السبورة في خمس دقايق يلاقي الفصل كله بيعمل بإيديه حركات هيستيرية وبيغني بصوت عالي "باكا بومباور باكا بومبيرو.. رحت الدرس وجيت م الدرس.. خدت الدرس نسيت الدرس" وهكذا.

وأنا بالعب في الفسحاية.. جم ولدين بمطاوي عايزين يلعبوا بالكورة بتاعتي. أسيبهم؟ رحت متخانق معاهم وأنا أساسا مش باعرف أضرب نملة.. طفل صغير من الجيران قال لماما.. ماما بقى بألف راجل, لمت ستات العمارة كلهم ونزلولي الملعب. لما الولدين شافوا جيش الستات دول طلعوا يجروا.. بس أنا اتكسفت قوي.

لما الواد مؤمن علي الغلس ضربني رحت ضربته.. جري ورايا (وأنا مش سريع خالص) فقررت إني أموته. جريت على عامود مسلح في الطرقة بكل ما عندي وقبل العمود رحت بحركة رياضية مش عارف عملتها إزاي انحرفت. هو بقى لبس في سن العامود المسلح.. وجات الإسعاف خدته وكانت حكاية. بس كل أما أشوفه دلوقتي وأشوف الغرز اللي في قورته يصعب علي العامود قوي. هههههههه

هناك 19 تعليقًا:

nor يقول...

الله يحظك.... الله يقرفك

ايه القخ العجيب.. انت هتهرتل.. بس ظريف

المفروض تشكرني اليومين دول... المعجبين بيك انحصروا حالص وبقوا مقصرين معاك طحن يعني

المفروض تفتكرني كل يوم في الفجر اذا كنت بتصللي يعني بدعوتين حلويينمن اللي بالي بالك ....

بس تعرف انت لازم تاخد "motilium" عشان اسهال الكتابة اللي عندك يتنظم حبتين

______________________________

nor يقول...

بس البلوج الحزيني اللي فات بتاع النصائح حسسني انك داخل كده "ربنا يجعله خير" داخل في انفصام محترم ياترى التقلبات والشكلبات اللي انت عاملها في دماغك وكتابتك دي ليها علاقه بالموضوع.... فوووووق

وبلاش تكلم الواد الغلس اللي بيصحيك كل يوم بدري كتير.. اصله حقيقة واد معفن وانا من زمان بقول عليه محراب شر

يلا كده...
وافتكروا افضالنا عليكوا اللي مغرقاااكم

قللي من كنت هسيبه يحظى برقم 2 في الردو مفيش حد غيري طبعاً

ياسلام علي وعلى افضالي

micheal يقول...

ههههههههههههه..يخرب عقلك يا مجرم..وبعدين ايه لزمة البوست ده يعني
بتفكرني بالازاز اللي أنا لبست فيه
:))
تحياتي

عمرو يقول...

نور
أنا محتاج أتكلم معاك.. باتصل بيك على الموبايل التلات خطوط مقفولين
لو سمحت كلمني ضروري أنا راحع القاهرة بكرة

شكرا على التعليقات دي كلها.. انت فعلا تستاهل دعوة في الفجر. بس أنا مش داخل على حالة ولا حاجة أنا طالع منها
:)
لو سمحت كلمني في أسرع فرصة, لازم أشوفك قبل ما أسافر انت واحشني جدا

عمرو يقول...

مايكل
أهلا أهلا يا باشا
على فكرة والله فرحت لما شفت تعليقك. أنا كمان لبست في القزاز قبل كده بس مناخيري ما اتكسرتش
:)

enjy يقول...

حلوة فكرة البوست دة..كل واحد يقول موقف يضحك..بيفكرنى بجلسات العلاج الجماعى..وانا اعز العلاج اوى فهحاول افتكر حاجات تضحك واحكيها..
اممممممممم
اممممممممممممم
اممممممممممممممممممم
امبارح فى اللجنة البت اسراء صاحبتى قاعدة جنبى فى البنش والمراقبة قاعدة فى قفاها على طول واسراء بتسالنى فى سؤال وانا عادى برد عليها وهى مش سامعة اقولها تانى وهى مش سامعة اقولها تالت برضو مش سامعة قلتلها متقرفيناش وفتحت الورقة وقلتلها انقلى لقيت صوتها على اوى اوى وقالتلى خط امك وحشششششششششششش ....طبعا انا تنحت والمراقبة بصت لنا شذرا روحنا بكل بساطة انا وهى هع هع هع كفك يا معلم..

مرة واحنا فى ابتدائى كنت فى مدرسة خاصة بقى من بتاعة ولاد الناس دى والميس كانت بتشرح الفرق بين الكيس والعلبة بس بالانجليزى وبتسال ايه اللى بيتحط فى الكيس وايه فى العلبة؟؟ راح معتز قام قالها السجاير بتتحط فى العلبة والهيروين بيتحط فى الكيس..طبعا مس نجوى كان هيجيلها ازمة قلبية..

مرة كنت فى درس علم النفس ومستر محمد كان بيدينى كوباية مياه فانا بمنتهى الغلاسة قلتله يو آر سو كايند تهريج يعنى راح قالى كايند يعنى نوع ويعنى كريم شفتى انا شاطر فى الانجليزى ازاى..روحت بكل وقاحة قلتله يااااااااولد لا صايع..طبعا بعدها اكتشفت انى قلت كدة للمدرس وقعدت اعتذر اسبوع وكل ما انا اعتذر هو يفطس من الضحك..

مرة كنت قاعدة على سلم الكلية انا والبت رضوى وبعدين دكتور عادل البصباص جه يقولنا بمنتهى السماجة مش هتحضروا المحاضرة يا بنات؟؟ قلناله لا النا لالا يللا قوموا قلناله اصلنا صايمين قالنا المغرب ادن المهم معرفناش نفك منه روحنا قمنا فرضوى كانت ضاربة بوز تمام فبيقولى هى مالها مكشرة ليه راحت قالت له عشان شوفتك الراجل فكر نفسه سمع غلط فقالى هى قالت ايه روحت ببراءة شديدة قلتله مقالتش حاجة انتى قلتى حاجة يا رضوى؟؟ قالتلى لا انتى سمعتى حاجة؟؟ قلتلها لا خالص وبصينا للدكتور وقلناله هو حضرتك لسة صايم وللا ايه؟؟

كفاية كدة بقى نلتقى بعد الفاصل..على فكرة انا بقيت مدمنة ومبعرفش افوت يوم من غير مقرا التدوينة بتاعتك..ربنا يخليك للغلابة

سلام

Fkrny يقول...

جميل يا باشا والله
عجبتنى الفكرة
وبالتوفيق

Isolde يقول...

عمرو، واضح ان البوست يهللك من الضحك. بس انا صحتي مش تمام و قاعدة بالعافية ف مش عارفة اركز. اول ما ابقي احسن هاجي و اعلق... ما تزعلش اني ما كتبتش بوستات جديدة. وعد اول ما اقدر اكتب هاكتب علي طووووووووول

تسافر بالسلامة
:)

عمرو يقول...

شكرا يا إنجي
طبعا انتي المدونة الوحيدة اللي التزمت بشرط البوست. أنا ضحكت قوي على حكاية الهيروين دي. تخيلي أول مرة آخد بالي إنه بيتشال في كياس
:)

دايما رافعة معنوياتي يا إنجي هافكر الليلة دي في بوست مفتكس

عمرو يقول...

يا فكرني
أولا أهلا بيك أو بيكي
ثانيا أنا مش فاهم بصراحة قلت أشوف مدونتك لقيتها مش مدونة لقيت منتدى.. هو إيه الحكاية بالظبط؟

عمرو يقول...

أهلا يا إيزولد
أنا كده هاقلق عليكي.. مالك يا بنتي؟ انتي رحتي راقبتي النهاردة في امتحانات الكادر ورجعتي مرهقة؟ ولا انتي زعلانة. مش مشكلة دلوقتي حكاية البوستات دي ما ترهقيش نفسك. بالنسبة لقراية البوست فأنا ممكن أقراهولك على إذاعة نجوم بخ بخ (ده اسم البوست اللي جاي)
:)
ألف سلامة عليكي يا إيزو بس أنا لو أعرف بيتك كنت جيت ومعايا اتنين كيلو خيار واتنين كيلو فلفل (بيقولوا البتنجان غالي اليومين دول)
أنا مسافر بكرة. لو عايزة حاجة قولي
باي

تــسنيـم يقول...

هو المفروض أحكي موقف حصلي...


:)

طيب لما كنت صغيرة بتاع 4 سنين كنت قردة وشقية مووووت فنزلت ألعب في الشارع ( كانت لسه الدنيا أمــان والناس تعرف بعضها وبيخلوا بالهم في المحلات من عيال الناس) المهم كان فيه ست جارة جدتي في الدور الأرضي بنتها جاية هيا وعيالها يزوروها وبعدين انا غلست على ابنهم الصغير وغيظته جامد وطلعتولي لساني فالواد صعيدي مسك زي خرطوم وطالع يجري ورايا يضربني بيه قمت جيت أجري اتزحلقت على الأسفلت راسي جت في الرصيف ومازالت الغرز الثلاث عند منبت شعري تنبئ الكل عن حجم شقواتي


أه نسيت أقولك إني اتهمت الواد إن هو اللي زقني

D:

عمرو يقول...

تسنيم
متشكر قوي على الموقف ده.. بس انتي يتخاف منك بقى. انتي طلعتي شرانية قوي.. طيب يعني لما تقوليلي إن الولد كان صعيدي تقصدي إيه؟ انتي بتخوفيني.. بتقوليلي خاف على نفسك؟
لا يا بابا مش كل الصعايدة يتضحك عليهم.. وبعدين احنا هنا أغلبية أنا وأحمد وإيزولد ونور.. أيون أنا مش لوحدي.. أنا معايا رجالة تاكل الزلط
:)

تــسنيـم يقول...

لا والله مش قصدي خالص :)

أنا اقصد إنه مفيش تفاهم ده كان بيجري ورايا بخرطوم ومكانش هيرحمني :)

و واله مخدتش بالي إنك صعيدي خالص وأنا بحكي الحكاية دي :)

عمرو يقول...

ما يهمكيش يا تسنيم
أنا صعيدي هجين أساسا

على فكرة علاء رشاد اللي ضربته بالطماطم عندكم في بورسعيد. بس أعتقد انه انضم للإخوان أو حاجة زي كده.

سلامي إلى كل أهل بورسعيد وإلى حبيب قلبي علاء

آية مش هنا يقول...

هههههههههههههه

دلوقتي نحمد ربنا جدا و نبوس ايدينا وش و ضهر اننا مش بنلعب و لا بنهزر مع صبيان ، و ان لعب البنات مفيهوش و لا لقرف و لا العنف و لا العدوانية دي ..

ممممممممم
موقف يا آية موقف ...
مممم
من كام شهر كده كنت نازلة رايحة الكلية ، و كانت طلعالي حباية كبيرة في شفتي الفوقانية ، شبه الزلومة كده بالضبط ، و انا ماشية كان ماشي قدامي طفل عنده بتاع عشر سنين كده و مبحلق في و عمال يبصلي جامد كده ، لما قرب مني شوية لاقيته بيمسك طرف شفته و عمال يشدها لقدام و يلعبلي حواجبه يغيظني ، رحت انا مطلعاله طرف لساني ، و عملاله حركة العيال دي اللي بيعملوها بشفايفهم و خدودهم لبعض و هم متخاصمين ، كان ساعتهاهو بقى جنبي ، راح ماسك خيط نازل من شنطتي و هيشدها ، معرفش ازاي لقيتني ماسكاه من تيشيرته من ورا ( من قفاه يعني) و فتحنا احنا الاتنين في ضحك هيستيري ، قالي خلاص يا أبلة و الله اصل زلومتك بتضحك اوي ... لولا اني خدت بالي وقتها ان في تلاتة رجالة و اتنين ستات في الشارع بيتفرجوا علينا و هلكانين من الضحك .. كنت ضربته..
سيبته بقى و انا متغاظة ، و قعدت اقوله يارب تطلعلك زلومة يارب تطلعلك زلومة ..

و ده يعلمنا اننا مننزلش من البيت و عندنا حبة في شفايفنا حتى لو كان عندنا امتحان زي اللي كنت رايحاله ..

تــسنيـم يقول...

أنا فاكرة اليوم ده يا يوتا علشان بعتيلي مسج يومها تشتكيلي من الزلومة بس محكيتيليش ع الموقف ده



:)

عمرو يقول...

آية طيب اللي مش بتطلعله زلومة ممكن يطلع برة البيت؟
حلوة الحكاية قوي
:)

عمرو يقول...

تسنيم هو آية اسمها يوتا؟ اسم غريب قوي
:)