أن تعيش لتتقوقز

قبل أي كلام البوست ده مهدى إلى إنجي أجدد زائرة عندنا في المدونة, عشان الموضوع ليه علاقة بعلم النفس وكمان عشان تعرف إن خطوتها عزيزة. لكن قبل إنجي الصراحة (والأمانة لله والمصحف والمصحف والمصحف يا دكتورة إنجي) البوست ده في الأساس مهدى لإيزولد لرغبتها الشديدة في قراءة تدويناتي العبقرية (يا مدون يا جامد) , وإلحاحها الشديد علي إني أكتب كل يوم.

:)

أنا نفسي أتقوقز قوقزة علمية ومش لاقي حد أتفك معاه. فاعذروني بقى.. يؤسفني إني أبلغكم إن الكلام اللي جاي مقوقز خالص. فيرجى إن اللي مش بيحب القوقزة يركن على جنب.

هاتكلم النهاردة عن نظرية مش جديدة في علم النفس. هي نظرية التصورات الشخصية. النظرية دي ببساطة بتقول إن ما فيش حاجة اسمها مرض نفسي, وإن المرض ما هو إلا تأويل ثبت في دماغنا لأحداث مرت بينا وتم تأكيده. والتأويل ده غلط. عشان الكلام ده ما يقوقزش زيادة عن اللزوم هاضرب مثال (هادشدشه)

مثلاً لما واحد يبقى بيعاني من فوبيا, فهو بيخاف خوف مرضي من حاجة ما بتخوفش عشان في خبرته القديمة تأويلات لأحداث حصلت له أكدت على النتيجة دي, فهو خايف ومش هاينتهي الخوف غير لما يحدث إبطال أو دحض وتكذيب للتأويل اللي مش صح. أصل اللي اتلسع من الشوربة ينفخ في إيه.. في اللموناتة. ما هو اتلسع في حاجة صفرا فقعدنا نقوله اللموناتة صفرا بس ساقعة, وهو خايف برضه. أعرف ناس كده. ربنا يهدي.

المهم. يبقى الواحد قدامه خير ويشوفه شر. ليه؟ عشان اللي فات من خبراته بيتم اسقاطه على اللي جاي. فتتأثر قراراته بأحداثه الماضية ويفضل حابس نفسه في دايرة مغلقة وما يعرفش ياخد قرار.

النظرية دي عملها كيلي (الاسم ده اسم نسائي لكن اللي عمل النظرية راجل.. أو هو يدعي ذلك) في التسعينات على ما أعتقد. لكن أهم ما فيها هو حكاية اتخاذ القرار.

تعالوا نقول إن فيه واحد عايز يشتري لا مؤاخذة يعني "جزمة", شوز عشان الناس اللي مشاعرهم مرهفة. عشان ياخد القرار هايدخل الأول في نوع من الحيرة والحيطة والحذر. هايقول أشتري الجزمة ولا لأ؟ أنا معايا فلوس كفاية؟ مش يمكن ده يبقى تبذير؟ أسئلة كتير, بعدها يدخل الفرد في مرحلة جديدة لأنه بيحدد أهم الأسئلة ويبتدي يشوف إجاباتها إيه. الأسئلة المؤثرة على الشرا قوي. زي حكاية الفلوس دي. وبعدين يبتدي ياخد القرار.

المرحلة الأولى اسمها الحيطة, كلنا بنمر بيها, لكن فيه نوع من الناس بتسأل أسئلة وبتبقى عارفة إن الإجابة وحشة ومع ذلك بياخدوا القرار فالناس دي بتحطم نفسها (أنا منهم ولا فخر). وفيه ناس تانية (ودول أنا شفت منهم كتير) بيلفوا في دايرة الأسئلة, بيسألوا نفسهم ويخافوا يجاوبوا نفس الإجابة اللي تسببت في خبرة غير سارة قبل كده, فيلفوا حوالين نفسهم. طيب إيه الي تسبب في الخبرة الأولى غير السارة؟ غلطة تانية عملوها وهي تقليص فترة الحيطة والتسرع في عمل الأسئلة والإجابة عليها. يعني هم أخدوا قرار غلط لأنهم لم يحتاطوا بالشكل الكافي, وبعدها بدؤوا يلفوا في دايرة الحيطة اللي أهملوها قبل كده. أنا مش عارف إزاي ممكن يطلعوا بس ممكن تدوروا معايا. النموذج اللي فات كان اسمه سي بي سي عشان لو حد عايز يقرا عنه, ويدور.

أفوتكم بعافية بقى لاحسن عايز أنام. أنا خلاص اتقوقزت وطلعت اللي في نفسي.

تصبحوا على خير

:)