مايو 27، 2009

أن تعيش لتتقوقز

dfdg

قبل أي كلام البوست ده مهدى إلى إنجي أجدد زائرة عندنا في المدونة, عشان الموضوع ليه علاقة بعلم النفس وكمان عشان تعرف إن خطوتها عزيزة. لكن قبل إنجي الصراحة (والأمانة لله والمصحف والمصحف والمصحف يا دكتورة إنجي) البوست ده في الأساس مهدى لإيزولد لرغبتها الشديدة في قراءة تدويناتي العبقرية (يا مدون يا جامد) , وإلحاحها الشديد علي إني أكتب كل يوم.

:)

أنا نفسي أتقوقز قوقزة علمية ومش لاقي حد أتفك معاه. فاعذروني بقى.. يؤسفني إني أبلغكم إن الكلام اللي جاي مقوقز خالص. فيرجى إن اللي مش بيحب القوقزة يركن على جنب.

هاتكلم النهاردة عن نظرية مش جديدة في علم النفس. هي نظرية التصورات الشخصية. النظرية دي ببساطة بتقول إن ما فيش حاجة اسمها مرض نفسي, وإن المرض ما هو إلا تأويل ثبت في دماغنا لأحداث مرت بينا وتم تأكيده. والتأويل ده غلط. عشان الكلام ده ما يقوقزش زيادة عن اللزوم هاضرب مثال (هادشدشه)

مثلاً لما واحد يبقى بيعاني من فوبيا, فهو بيخاف خوف مرضي من حاجة ما بتخوفش عشان في خبرته القديمة تأويلات لأحداث حصلت له أكدت على النتيجة دي, فهو خايف ومش هاينتهي الخوف غير لما يحدث إبطال أو دحض وتكذيب للتأويل اللي مش صح. أصل اللي اتلسع من الشوربة ينفخ في إيه.. في اللموناتة. ما هو اتلسع في حاجة صفرا فقعدنا نقوله اللموناتة صفرا بس ساقعة, وهو خايف برضه. أعرف ناس كده. ربنا يهدي.

المهم. يبقى الواحد قدامه خير ويشوفه شر. ليه؟ عشان اللي فات من خبراته بيتم اسقاطه على اللي جاي. فتتأثر قراراته بأحداثه الماضية ويفضل حابس نفسه في دايرة مغلقة وما يعرفش ياخد قرار.

النظرية دي عملها كيلي (الاسم ده اسم نسائي لكن اللي عمل النظرية راجل.. أو هو يدعي ذلك) في التسعينات على ما أعتقد. لكن أهم ما فيها هو حكاية اتخاذ القرار.

تعالوا نقول إن فيه واحد عايز يشتري لا مؤاخذة يعني "جزمة", شوز عشان الناس اللي مشاعرهم مرهفة. عشان ياخد القرار هايدخل الأول في نوع من الحيرة والحيطة والحذر. هايقول أشتري الجزمة ولا لأ؟ أنا معايا فلوس كفاية؟ مش يمكن ده يبقى تبذير؟ أسئلة كتير, بعدها يدخل الفرد في مرحلة جديدة لأنه بيحدد أهم الأسئلة ويبتدي يشوف إجاباتها إيه. الأسئلة المؤثرة على الشرا قوي. زي حكاية الفلوس دي. وبعدين يبتدي ياخد القرار.

المرحلة الأولى اسمها الحيطة, كلنا بنمر بيها, لكن فيه نوع من الناس بتسأل أسئلة وبتبقى عارفة إن الإجابة وحشة ومع ذلك بياخدوا القرار فالناس دي بتحطم نفسها (أنا منهم ولا فخر). وفيه ناس تانية (ودول أنا شفت منهم كتير) بيلفوا في دايرة الأسئلة, بيسألوا نفسهم ويخافوا يجاوبوا نفس الإجابة اللي تسببت في خبرة غير سارة قبل كده, فيلفوا حوالين نفسهم. طيب إيه الي تسبب في الخبرة الأولى غير السارة؟ غلطة تانية عملوها وهي تقليص فترة الحيطة والتسرع في عمل الأسئلة والإجابة عليها. يعني هم أخدوا قرار غلط لأنهم لم يحتاطوا بالشكل الكافي, وبعدها بدؤوا يلفوا في دايرة الحيطة اللي أهملوها قبل كده. أنا مش عارف إزاي ممكن يطلعوا بس ممكن تدوروا معايا. النموذج اللي فات كان اسمه سي بي سي عشان لو حد عايز يقرا عنه, ويدور.

أفوتكم بعافية بقى لاحسن عايز أنام. أنا خلاص اتقوقزت وطلعت اللي في نفسي.

تصبحوا على خير

:)

هناك 9 تعليقات:

عمرو يقول...

أنا حاسس نفسي عامل زي واحد بيبيع درة مشوية في نهار رمضان.. كل شوية أفتح المدونة وأقول لا لسة ما فيش حد علق
عموما مش لاقي غير إني أقول

المشوي.. طازة يا درة. يا كرييييييييم
(:

Unknown يقول...

ايه التقوقز الجامد دة يا عمونا؟؟
يالهوى يالهوى يا نهار يا ولااااد اسمى طلع عندك يا اوستااااااذ..ميرسى ميرسى والله انت راجل ذوق ذوق وبتعرف تحتفى بضيوفك كويس بس مش للدرجة دى يا عم دة انا اتكسفت جامد والله يعنى احتمال يكون وشى احمر وقلبى دق دقتين زيادة ودى مبتحصلش كتير..لا مبتحصلش كتير ايه دى ما بتحصلش خالص لا مؤاخذة..بس متقولش لحد بقى انى مبتكسفش وكدة عشان دى سمعة ناس برضيك وللا اييييييييه؟؟

نيجى بقى للكلام المقوقز..النظرية دى تشبه فى جوهرها نظرية تانية اعتقد من رايي الشخصى انها اهم فرع من فروع علم النفس الحديث واكثرها تاثيرا وثراءا وقابلية للتطبيق..النظرية المعرفية بتاعة عمنا الكبير بك..ايون هو اسمه بك هتعترض؟؟
المهم النظرية المعرفية دى بتقول باختصار مخل يعنى ان المرض النفسى هو تشوه معرفى جوة دماغ البنى ادم..يعنى زى ما انت قلت كدة فى مثال الفوبيا بالظبط هو معارفه المتخزنة فى مخه عن المرجيح انها خبرة سيئة فيصاب بالاكرو فوبيا مثلا..و التشوه المعرفى دة سبب لتلات ارباع الامراض النفسية مثلا انا خبرتى عن الزواج سيئة لان ابويا وامى قتلوا بعض فتلاقينى بكره الجواز والرجالة والستات وشايفة انها خطوة غير آدمية واكون مقتنعة بكدة جدا ودماغى صرمة قديمة مش عايزة تتزحزح ولكن الاصل ان العيب فى معارفى الشخصية لكن قانون الاشياء بيقول غير كدة..

التشوه المعرفى كمان هو اللى بيحدد اتجاهاتنا ناحية اشياء معينة سواء اتجاهات سلبية او ايجابية زى ما انت ذكرت فى مثال الشوربة والليموناتة كدة لو هو اتجاهه وحش ناحية الشوربة والتشوه المعرفى واخد معاه منحنى عالى هتلاقيه بيكره اى حاجة لونها اصفر حتى الحلبة..وهكذا بقى طول ما الفرح شغال..

انا مبسوطة بمدونتك اوى جدا خالص على فكرة انا لفتها كدة وقريت حاجات كتيييير اوى وعجبتنى قصصك اوى وحتى المواضيع الشخصية مكتوبة بحميمية خلتنى حاسة انى اعرفك من زمان..كمان اخدت بالى انك وايزولد واحمد الشمسى ثلاثى مرح..ربنا يكرمك

سلام

عمرو يقول...

بصي بقى يا دكتورة إنجي

لازم وحتما ولابد إنك أي حاجة قريتيها تعلقي عليها. ده قانون هنا. بس للأسف مش لاقينله عقوبة للي يخالفه. فعموما لو ما علقتيش مش هاتتعاقبي بس أنا هازعل.
يرضيكي؟

سرك في بير, أو سرك في أربع خمس بيار هما زوار المدونة.. أوعى يا أحمد ولا انتي يا إيزو ولا انتي يا تاسو ولا أي حد من بقيت الزوار يقول لحد إن إنجي مابتتكسفش.. دي بنت ناس واحنا لازم نداري عليها. ما تقلقيش يا إنجي ده احنا هانريحوكي (يرفق مع الجملة السابقة نظرة ريا وحزقة سكينة)

أشكرك يا إنجي لا داعي للتصفيق يا بنتي.. (قال يا أووستاذ قال) أنا والله فرحان إن فيه حد ممكن يقرا القوقزةويرد علي بقوقزة زيها.
شكرا على نظرية بك المعرفية. أنا كنت قريت عنها قبل كده (انتي عارفاني بقى موسوعة وعارف كل حاجة.. عفريت يا اخواتي), بس لما اتكلمتي انتي حسيت بالتشابه الكبير ده بينه وبين كيلي

يا سلام.. أشبعت رغبة لدي في التقوقز
يا بنتي أكرمك الله.. أهو الواحد دلوقتي يقدر يقابل وجه كريم وهو مش نفسه في حاجة
:)
أنا وأحمد اصحاب عمر, وأنا وأحمد وإيزولد أحسن مدونين في سوهاج والصعيد والقرى والنجوع المجاورة
أحمد خفيف الظل, وإيزولد رهييييبة, مش عايز أقولك بقى, ممكن تهلكك من الضحك, أما أنا بقى فثقيييل قوي, بس عبقري زي ما انتي شايفة
:)

أسما يقول...

لا إله لا الله... يا ساتر يا رب... ايه يا جماعة اللي بيحصلي ده... انا دوخت و جالي كرشة نفس لما قريت. حرام عليك، ده انا ماما نفسها تفرح بيا. ليه تعمل في كدة و انا ف عز شبابي.

الجملة بتاعة اللموناتة هي اجدع جملة ف البوست ده، عشان انا باموووووووت ف اللموناتة الساقعة :)

و الله الواحد صعبان عليه يقول الكلمتين دول، امري لله... البوست ده كفااااااءة، رغم انه متقوقز اوي، بس واضح ان مفيش علاج للحالة دي يا ابني، اصلها زي فصيلة الدم، ما بتتغيّرش

حاجة كمان قبل ما انسي، ما تحلفش بالمصحف تاني عشان حرام" من حلف بغير الله فقد اشرك" لو عملت كدة تاني هاحطلك شطة ف بقك، اللهم بلغت.

(زغراني بيسلم عليك)

علي فكرة كمان، انا ممنووووون ;)

عمرو يقول...

أنا مش باحلف يا إيزو بالمصحف أبداً بس كنت باتقمص شخصية العيال الصغيرين اللي بيحاولوا يترجوا الناس يدوهم فلوس
:)

يا ريت تسلميلي على زغراني وبربوشة ومنشكح وتقوليلهم إنهم واحشيني قوي

nor يقول...

تعليق هامشي : الفصيلة بتتغير
آاااه والله .... تصدقوا
تقوقزوا على خير

آيــة يقول...

و الله العظيم انا قريت اول واحدة البوست ده ، و كان التعليق في دماغي و هكتبه ، و قمت اطفي على الاكل ، و انشغلت ، و لما رجعت كان التعليق هرب مني .. :(

انت متعرفش فعلا اني علم نفس ؟؟ و ان سنة التمهيدي اللي خلصتها المفروض دي ، كانت بتاعت شعبة علاج نفسي ؟؟

انت محظوظ يا عمرو على فكرة .. مدون متقوقز في مدونة متقوقزة ..بيزوره اتنين علم نفس .. هيص يا عم :)

فكرة كيلي اللي كنت بتتكلم فيها فعلا قريبة اوي من أفكار آرون بيك و جوديث بيك في النظريةالمعرفية ..
لو ربنا كرمني بمشرف طيب ، يبقى هتكون رسالتي في التشوهات العرفية ، و الدكتوراه باذن الرحمن في علاجها ..

اهم حاجة في التشوهات المعرفية دي عارف ايه ..
حاجتين ..
الاولى انك تتعرف على المعتقدات اللي وراها .. و التانية ان ترصد الكلام اللي بتقوله لنفسك يأكد لك أفكارك المتقوقزة و يزيد من تقوقزك ..

اهم حاجة اني كده ضمنت اني ممكن الاقي حد يقرا رسالتي القوقازية اللي هتعب فيها و يتحرق دمي (بعد الشر علي )...
:))

عمرو يقول...

أهلا نور
عليك اعتذار واجب لواحدة من أفضل المدونات على وجه الأرض, وانت عارفها كويس
:)

عمرو يقول...

ألف سلامة على دمك يا آية
شيء يشرفني طبعاً إني أقرا رسالتك. بس الحقيني قبل ما أبطل قوقزة
:)