الحدوتة دي للبنات الوحشين, البنات الحلوين يقروا بس ما يضحكوش ;)

كان يا ما كان, وما يحلا الكلام إلا بذكر النبي عليه الصلاة والسلام..

كان فيه نقطة مية صغيرة قوي في بحر كبير كبير مليان أسرار. كانت النقطة دي شقية جداً وصغيرة في السن خالص. كانت كل يوم تشوف النقط الكبيرة وهما راجعين وش الصبح لابسين مايوهات وبيضحكوا مع بعض وتقول لجوزها.. (إيه؟ مستغربين؟ أيوة جوزها, ما هي نقط المية مش عندهم مشكلة في السن زي عندنا, ولا حتى بتفرق بين فقير أو غني أو أبيض أو اسود..أي حد بيتجوز أي حد يحبه يعني) المهم بقى هي كانت كل يوم تقول لجوزها "إحنا ليه عايشين تحت قوي كده, وف مكان زحمة جداً, ومش بنقضي ليه أي وقت فوق زي النقط التانية؟ أنا هاطلع أقعد فوق أنا كمان" دايماً جوزها كان يوعدها بإنه هاياخدها في يوم لفوق لكن عمره ما وفى بوعده. نقطتنا كانت شقية جداً, وعلى الرغم من إنه قال لها ما تروحش لوحدها إلا إنها ما سمعتش كلام جوزو.

ف يوم اتسحبت بالراحة وخدت مايوه من واحدة جارتها.. لبسته وفضلت تزق في بقية نقط المية اللي في البحر لغاية ما وصلت فوق, كانت منبهرة بمنظر السما والشمس, فردت نفسها على وش المية وقعدت تغني, بس الشمس كانت حامية جداً جداً. شوية ولقت جسمها كله بيوجعها وبيتفتت ويتحول لبخار. فضلت تقول "أي أي" وتطلع لفوق لفوق.

في السحاب قابلت بخار نقطة مية عجوزة, قالت لها حكايتها فردت النقطة العجوزة وقالت لها "يا عبيطة المفروض تطلعي فوق المية بالليل عشان تلعبي تحت نور القمر اللي بيشد المية لفوق ويخلي الموج يعلا ويعلا فيبقى اللعب جميل.. مش تطلعي بالنهار" فهمت النقطة غلطها, وقعدت تبكي بس كان خلاص فات الأوان, هي كده مش هاتشوف جوزو تاني, لأنها ممكن ببساطة تتحول تاني لمية تنزل مع المطر وتشربها شجرة وتتحبس جواها, أو تدور بيها الدنيا وتنزل في نهر بيزقي غيط برسيم وياكلها حمار ولا أي حيوان تاني ومش لازم نكمل بقية اللي هايحصل عشان القرف ههههههه.

المهم بقى هي قعدت تفكر وتعيط, أصلها كانت بتحب جوزو قوي ودلوقتي خلاص مش هاتعرف تشوفه تاني. وإذ فجأتن وهي بتعيط تلاقي جوزو داخل السحابة وعمال بيدور عليها, قالت له: "انت مجنون؟ إيه اللي جابك ورايا؟ ممكن دلوقتي احنا الاتنين نزقي غيط برسيم وياكلنا الحمار و......" قبل ما تكمل كان جوزها اتأسف لأنه مش نفذ وعوده, فسكتت هي لحظة واتأسفت لأنها مش سمعت الكلام, هو سامحها وهي سامحته, وإذ فجأتن مطرت السحابة فوق محيط واسع مليان بالأسرار.

الإهداء لإيزولد (بس ده مش معناه إنها من البنات الوحشين هههههه).. وعدت ووفيت :)