خايف أنام
إمبارح هفتني نفسي أكتب شعر. فقمت كتبت الكام بيت دول. دي أول تجربة لي في العامية. اللي هايقول وحشين ممكن يحبطني ويخسر البلد موهبة فذة في القوقزة العامية :)
القصيدة بقى:
الجرح سايل فوق دموعي
بيتكوي
وأنا مستوي
خايف أنام
لا الظابط الواقف على كتفي اليمين
يهجم على القلب الضعيف
وأنا قلبي غاوي ومغتوي
مذنب خطير
قرفانة مني المرتبة
بتقلي فارق.. حل عني
أو جرب الليلة
تبات واقف
أو جرب الليلة
تغرق بالدموع خشب السرير
مسروقة مني ضحكتي
واللمبة فوق متشقلبة
خارج لسانها ومتلوي
بتقوللي شايف
الضلمة في النور مكئبة
الجرح سايل فوق دموعي
بيتكوي
وأنا مستوي
خايف أنام
هناك 14 تعليقًا:
وبتتهمني أنا بالقوقزة
:))
لو دخلت هنا تاني لقيت فيه شبح قوقزة هقاطع المدونة دي
اتفقنا؟
يا اخوانا انتوا فاهمين القوقزة غلط... القوقزة يعني الكلام الكبير الكبير اوي و مكلكع كدة. لكن اقر و اعترف، القوقزة مع عمرو اخدت معني القوقزة ف الزعل، الكآبة... عمرو، انت زعلك من النوع المتقوقز اويييييييييي
كفاية هزار بقي، يللا نهرّجD:
القصيدة عبقرية، مفتكسة... و عجبني الجزء بتاع المرتبة و اللمبة... كفاااااءة. اما الكام بيت الاولانيين فصعبين علي اوي، اصل نسبة القوقزة فيهم عالية حبتين
استمر استمر، ييجي منك :)
تسنيم
دي قصيدة.. وأنا أديب كبير زي ما انتي شايفة يعني ممكن أطلع كلام متقوقز وأنا فرحان. دي لعبتي يا بنتي
:)
ما تقدريش تقطعي المدونة.. يا بابا أنا عندي زوار ياكلو الزلط.. يعني عندك إيزولد وإنجي وآية وأحمد ونور وتشي.. دلو يقطعوا مدونتك فتافيت.
:)
إيولد
ربنا يريح قلبك يا بنتي, ويبعد عنك ولاد الحرام. ويقعدلك ف صحتك وعفيتك. ما تشوفيش حاجة وحشة ولا بلية..
والله تعليقك فرحني. أول تعليق يحسسني كده إني أنفع شاعر
هاستمر.. وهاتقوقز بس اللي يستحمل
هههه
:)
يا بني انا القصيدة عجبتني جدا والله بس خفت أقولك كده فتتحفنا بقصيدة مقوقزة تانية واحنا مش حمل القوقزة دي
اضحك وعديها وماله
ولا شئ بيفضل على حاله
صباحك بهججة
ما تجريش ناعم يا تسنيم..
بعد ما طلعت من لسانك وقلتي إنك هاتقطعي مدونتي جاية دلوقتي تقولي القصيدة حلوة؟
القصيدة حلوة...
وفعلا المقطع اللي بيبدأ ب "قرفانة مني المرتبة" وما يتممه على رأي أشرف عبد المنعم جميل.
شكرا يا بو حميد
بالإضافة إلى إنها موزونة.
;)
ايه الكلام الفارغ دة؟؟؟
اجى امتى يعنى؟؟؟ لا مؤاخذة مينفعش كدة انا باجى الاقيكوا قاعدين وقاريين ومعلقين وشاربين الشاى وبتتقوقزوا مع بعض وانا ايييييييييه محدش يستنانى لحد ما اقول رايي العبقرى عشان تتقوقزوا وانتوا ضميركوا مستريح؟؟؟
يللا ما علينا..سورى يا عمرو اصلى كنت عيانة ومريضة ومجتش بدرى عشان كدة..كح كح كح..لا انا مش بردانة دة انا بستهبل بس..ما علينا..
حلوة اوى القصيدة دى ..مفيهاش حزن بس فيها شجن..يعنى اعتقد كل اللى هيقراها هتلمس جواه حاجة كدة مش هيبقى عارف ايه هى..
بص الكلام موزون والمعانى سهلة ورقيقة وشفافة..بس وجعتلى قلبى اوى يا عمرو والله فعلا بتكهرب كدة..الحتة بتاعة المرتبة واللمبة مبتكرة بشدة..حلوة حلوة يعنى بجد والله..بس هو مش غريب شوية ان الجرح هو اللى يسيل على الدمع؟؟ مش المفروض الدمع يسيل على الجرح يكويه وللا دى قوقزة من الجامدة اللى انا مفهمش فيها؟؟ طب مونكن تشرحلى معلش اختك عيانة ومن حقى افهم يا الا انت حرررررر بقى ...
فوتك بعافية
أهلا إنجي
أولا أنا مش عارف حتى لو عيانة ده مش سبب يخلي التدوينة بتاعتي تقعد 4 ساعات بدون ولا تعليق.
ثانيا: ألف سلامة عليكي ويا ريت تقوليلنا في البيت عشان نجيلك ونجيب اتنين كيلو فلفل وبطيخة.
:)
شكرا شكرا على الكلام اللطيف ده. طبعا أنا عارف إني عبقري وقصيدتي رهيبة. بس من بقك ليها طعم مختلف
الطبيعي إن الدموع تسيل على الجرح. لكن الجرح ده سبب الكثير من الدموع لحد ما بقى عايم فيها. يعني الصورة عايزة تقول إن الجرح مؤلم بشدة وبيسبب بكاء شديد خالص لدرجة إنه بيعوم في الدموع دي
أي خدمة..
وألف سلامة عليكي
:)
يا سلااااااااااام اى والنبى العلم نورون برضك يا استاذ عمرو يا اخويا...
تصدق حلوة حكاية الجرح عايم فى قلب الدمع دى مبتكرة يعنى..لالا حلوة حلوة يعنى..وفعلا طلعت قوقزة من الشديدة يعنى مش اى كلام..
والنبى العلام دة بينفع برضك..اه اومال ايه انت واحد معاك شهادات وماجيستير وكدة..هو العلام ببلاش؟؟؟اهو بينفع فى القوقزة اهو...يا سلام يا ولاد....
الله يسلمك عمرو باشا انا فعلا تعبانة وعيانة جامد يعنى والاكادة ان محدش عارف عندى ايه والضاكتور المتعلم برضك مش عارف..ايه الخيبة دى يخوووويا..يللا اما اروح اجيب التحليل واروح الاشتشارة ينكن الضاكتور يتنصح كدة ويفهم عندى ايه..
ايه اللوكلوك دة؟؟ معلش اصلى كنت عايزة ارغى شوية كدة
فوتك بعافية
ألف سلامة عليكي يا إنجي
بصي انتي تروحي تجيبي قطرة وبرهم من بتوع الحساسية. أنا عارف دي حساسية بتطلع للحريم والرجالة في الامتحانات. وسيبك من الضاكاتير والاشتشارات ووجع القلب.
أنا مش عايا ماجيستير ولا حاجة على فكرة.
المهم نورتيني
مهرجان النشر الجماعى الاول
تقيم التكعيبة للتنمية الفنية و الثقافية مهرجان سنوي للنشر الجماعي للقصة و القصة القصيرة و الشعر بالعامية و الفصحى، سيكون موسمه الأول هو عام 2009.
و مفهوم النشر الجماعي هو مجموعة قصصية أو مجموعة شعرية لأكثر من مؤلف بين ضفتي كتاب واحد يجمع تلك الأعمال التي سيتم اختيارها عن طريق لجنة تحكيم في كل مجال على حدا، و يتم تحديد أعضاء اللجنة لكل دورة مهرجان.
و يصدر بتلك الأعمال مطبوع/ كتابين أحدهما للقصة و الآخر للشعر سيتم نشره في عامه الأول بالتعاون مع دار دَون، و يتم توزيعه و بيعه في الأسواق
لمساعدة الكتاب أصحاب العمل الواحد و كذا الكتاب الجدد الذين لم تتكون لديهم مجموعة قصصية أو شعرية بعد، في نشر أعمالهم المميزة بدون مقابل مادى
و ترسل الأعمال مرفق بها اسم الكاتب، عنوانه,رقم تليفونه,ايميله، وظيفته، سنه، سابقة نشره للعمل المقدم من عدمه او فوز العمل فى اى مسابقات ادبية
و ذلك في رسالة إلكترونية معنونه باسم المجال الذي يريد المشاركة في مسابقته مرفق بالرسالة العمل بصيغة وورد، و يفضل أن تكون تلك الأعمال مسجلة باسم أصحابها لكنه ليس شرطا لقبول العمل
ترسل الاعمال على ايميل
nashrgama3y@gmail.com
لمزيد من المعلومات حول المهرجان
http://eltak3eiba.blogspot.com
او
http://www.facebook.com/group.php?gid=94334335985#/group.php?gid=94334335985
مزيد من المعلومات حول التكعيبة
http://www.facebook.com/groups.php?ref=sb#/group.php?gid=29491316206
ملاحظات :
الاعمال المشاركة بالمهرجان هى فقط التى ترسل عبر الايميل او تسلم باليد
مسموح بالاشتراك بأكثر من عمل فى اى مجال
اخر موعد لتلقى الاعمال 15-7-2009
مع تمنياتنا للجميع بفرصة عادلة فى النشر
احمد حسن
0193953620
( رقم محمول داخل جمهورية مصر العربية )
اضحك اضحك اضحك اضحك اضحك
ليه تتضايق وتزعل وتغضب
افرح دايما واضحك والعب
دى جزء من اغنية اطفال قديمه من فيلم عربى...عايزاك تضحك..انت بتكتب حلو ف كل حالاتك متقوقز رومانسى متبهجج
كل شى منك حلو
إرسال تعليق