يونيو 13، 2009

فستان من نور

Honey_and_the_Moon_by_cosmosue فوق بلد الطيبين بمسافة كبيرة كبيرة كبيرة, كان قمر أربعتاشر نايم على سرير من سحاب وبطانية من ليل طويل. كل الناس في الكون بتشتغل تقريبا كل يوم إلا قمر أربعتاشر واخواته. كل واحد منهم كان بيشتغل يوم واحد بس في الشهر. يعني اتناشر يوم في السنة. في ليلة أربعتاشر من شهر من الشهور, قام القمر من على السرير السحاب وبص في المحيط فلقى شكله كويس وجميل, مد إيده وغسل وشه فنور نور كبير كبير كبير..

بكل نشاط طل القمر على بلد الناس الطيبين ومد إيديه بأشعة ملت الأرض فلقى حاجة غريبة لفتت انتباهه. لقى اتنين بنت وولد وافقين كل واحد على سطح عمارة. الولد كان اسمه باسم, والبنت اسمها بسمة. ركز القمر وطرطق ودانه, وسمع كلام باسم لبسمة وكلام بسمة لباسم. عرف القمر إنها بتحبه وإنه بيحبها, كان مبسوط قوي إنه كل ليلة أربعتاشر في السنة بيداري عليهم ويخليهم يشوفوا بعض ويتكلموا ويضحكوا وهو كمان كان سعيد إن فيه قلبين بيحبوا بجد وكان بيتونس بيهم لغاية الفجر. لو بإيده كان ريح اخواته واشتغل هو كل أيام الشهر, عشان بسمة وباسم كل يوم يلاقوا نور يشوفوا بعض عليه بدل ما يبقى حبهم مستني يجي أربعتاشر من الشهر اللي بعده.

كان باسم في آخر كل ليلة يبص للقمر ويقول "يا قمر يا مدور وكبير, يا خفيف وطاير من غيرجناحات, يا قريب يا بعيد.. أنا باحب بسمة وانت عارف, إياك تطلع سرنا وادعيلنا نتجوز بعضنا".

في شهر من الشهور, بص القمر فلقى السطحين فاضيين, قال للهوى يفتح الشبابيك فلقى بسمة بتعيط, ولقى باسم حزين.. حزين.. حزين. القمر كمان ما قدرش ينور زي كل ليلة أربعتاشر. كان ضوءه شاحب, والناس في بلاد الطيبين كانت بتبص وتستعجب. ولما جه الصبح حصلت حاجات غريبة في البلد, الزهور بقت محنية وزعلانة والبالونات اللي على شكل قلب واللي بتتباع في الملاهي ما بقتش تطير.

طول النهار في اليوم ده والبدر مش عارف ينام, لما جات الشمس, غمض عينيه من قوة ضوءها وقالها, "يا شمس ياللي عارفة كل حاجة بتحصل في النهار.. إيه اللي حصل وأنا نايم باختصار؟"

قالت له إن بابا بسمة رفض إن باسم يتجوزها وطرده من البيت وإنه قال لبسمة إنها حتماً ولابد تتجوز تكشيرة النكدي. أصله راجل معاه فلوس كتير وهايعيشها عيشة كويسة.

القمر سمع الكلام ده, وحس بحزن شديد شديد. راح ولف راسه بالفوطة ونام على سرير السحاب. لما غاب عن اخواته في الليالي اللي كلهم مش بيشتغلوا فيها, قال الهلال إنه لازم يزوره, راحله لقاه تعبان خالص, سمع منه الحكاية, وقاله ما تخافش أنا هاتصرف.

الهلال في أول الشهر نزل في المحيط وأخد دش مية مالحة معتبر, فبقى بيلعلط كده من النور, طلع فوق في السما, ومد إيده بشعاع من نور وخبط على شباك باسم. لما باسم فتح اندهش, شاورله الهلال فنط باسم واتشعلق في شعاع النور لحد ما وصل فوق وقعد على ديل الهلال. فوق كان الليل محضرله بدلة سودا إنما إيه, والهلال كمان فصل لبسمة فستان من نور.

باسم صفر صفارة بسمة حافظاها كويس. فتحت الشباك ونطت ولمست الشعاع وطلعت لفوق, السحاب غطى على المدينة والنجوم زغرتت.

تاني يوم كانت الزهور رفعت راسها والبالونات بتطير, وأبو بسمة قاعد على القهوة بيفتخر بجوز بنته اللي عملها فرح فوق السحاب

تمت

هناك 12 تعليقًا:

تــسنيـم يقول...

رسمت كلماتك على وشي تبسيمة " على رأي عمنا صلاح جاهين" وفكرت.. لو حل أي مشكلة في الدنيا يبقى بالسهولة دي


:))

عمرو يقول...

صباح الخير يا تسنيم..
يا رب على طول كده متبسمة. على الأقل في الحكايات والحواديت ممكن الحل يبقى بسيط.
:)

آية مش هنا يقول...

الله .. الله يا عمرو بجد
حلوة اوووووي

مش بس تبسيمة زي بتاعت تاسو .. لا حاجة أكبر .. من جوه كده ، مش عارفة اسمها ايه و الله ...

كنت داخلة النهاردة اقولك انت بتعشمنا و تربطنا بالمكان تكتب كل شوية و بعدين تنقطع ..ده غدر على فكرة
متبقاش تغيب بقى ..

القصة حلوة بجد اوي ... بس ممكن نفكرلها في عنوان تاني ؟؟؟

عمرو يقول...

أنا مبسوط خالص إنها عجبتك يا آية.
أنا مش باغيب.. أنا باتقل بس. عشان أوحشكم.
بس العنوان ظريف, ودي مش قصة دي حدوتة للبنات الحلوين. ومش عارف بس لازم أنوه إن الولاد الوحشين مش يقروا
:)
طيب اقترحي علي عناوين, احتمال نلاقي حاجة أحسن
:)
أسعدك الله كما أسعدتيني بتعليقكك

Isolde يقول...

:)

عمرو يقول...

إيزولد
؛)

nor يقول...

ايه ده !!؟؟
انت جرى لمخك حاجة ولا ايه
انت اليومين دول بتكتب قصة للي تحت سن
KG1
آااااااااااه وانا بقول اليومين الواد بقت ردااات فعله طفوليه حبنين
أممممم والدردوشة والبشبوشة

لابد أن تقوم بثلاث أمور هامة

1- اعتراف ان دي قصص لمن تحت سن رياض الأطفال " كده ممكن أفهم".

اذا لم يكن ذلك فعليك
- التغطي جيدا ليلاً وبذات يوم 14 في الشهر لحسن يجي شعاع النور يعمل فيك البدع وانت عارفه مابيرحمش
- التوجه فورا لاقرب مركز صحي للكشف عن أنفلونزا الكتاكيت

وانا اقول مش عايزني اجيله ليه؟؟!!
اتاريه خايف ابلغ عن الكتاكيت اللي مربيها في البيت

واديني بقللك مش هارحمك وانزل عليك رغم انفك.

وبعدين ياعمرو نرجو عمل قصص للكبار ارجع لرشدك

عمرو يقول...

أنا نزلت لك قصة للكبار اقرا وعلق يا نور.. ومين قال مش عايزك تجيني. أنا مستنيك على نار
:)

جارة القمر يقول...

حلوووة اووووى بجد

العنوان شدنى جدا و كمان الحدوتة
صحيح خيالية و مثالية اوى لكن اهو حاجه نحس انها لسه موجودة حتى لو فى الاحلام

تعبيراتك تخليك بجد تتخيل المنظر ... مش انت اللى كاتبها ولا انا فهمت غلط ؟

زهره ربيعيه يقول...

حلوه خالص خالص اوى جدا موت يعنى مش قادره اقولك اد ايه
وكنت هزعل لو باسم مش اتجوز بسمه
انا غمضت عنيا شويه صغننه وانا بقرا القصه وشفت باسم وشفت بسمه..وكمان القمر وهو زعلان..وكان نفسى اروح لبابا بسمه واقوله ليه ياعمو تعمل ف بنتك كده..
انا طبعا كنت بدور على حواديتك بعد ما قريت ابو مراخير طويله..اه انا كده هنام وانا مبسوطه اوى..انا بفكر انسخ كل حواديتك واحطها ف كتاب واقراه كل ليله براحتى...اممممممممممممم فكره بردو

Isolde يقول...

يا ابني البنت اللي في الصورة دي مش لايقة عالحدوتة، شكلها شرير... ميت مرة اقوللك يعني، اوففففففففففففف

عمرو يقول...

إيزولد
طيب هاتي صورتك وانتي لابسة فستان أبيض وأنا أنزلها في البوست
;)