ديسمبر 20، 2009

من الفولكلور السوهاجي التونسي المشترك :)

_

إحنا التونسية..
توينا اندلينا.
لا معانا بندج,
ولا سلاح فـ ادينا
لو حكمونا
ع البلد سدينا

هذه أغنية كان يرددها الأطفال في القرية التي أنتمي إليها (تونس) منذ أكثر من خمسين عاماً, ويظهر فيها واضحاً الاعتزاز القروي بالنسل والنسب والأصل دون وجود مبررات منطقية لذلك. لقد لاحظت هذا حتى على زملائي القرويين الذين درسوا معنا في الجامعة, فأغلبهم لديه قدراً من الاعتزاز بالنفس قد يبلغ التعالي والغرور, رغم أن المستوى المادي لهؤلاء متوسط أو متدني بعض الشيء. وأنا لا أرصد هذا كصفة إيجابية أو سلبية أنا فقط لاحظته وأردت أن أشارككم فيه.

شرح معاني المفردات ومواطن الجمال :)

"توينا اندلينا" أي نزلنا للتو, كما لو أن أهل تونس كانوا يسكنون القمر ثم إذا هم يهبطون (اندلينا أي نزلنا) على الأرض.

"بندج" جمع بندقية ومن الواضح من خلال الصورة أن أهل تونس يعرفون كيف يديرون حال بلد بأكملها وبلا أي طريقة واضحة.

في الأفراح تظهر في القرية بعض الأغاني التي قد يكون لها مضامين جنسية أحياناً أو لا أخلاقية بعض الشيء مثال هذا الأغنية التالية:

زعلان ليه تعالى لما أقولك..
زعلان ليه تعالى لما أقولك..
انت كيلو لحمة وأنا كيلو لحمة
ناكل لما نشبع والعضم لامك

هذه الأغنية التي تبرز معنى شاذاً على مجتمع القرية تقولها النسوة بما فيهن الأم في سعادة بالغة, المقاطع التالية من الأغنية تستبدل اللحم باللب فيصبح القشر لامك وهكذا..

الملاحظ أن أغلب أغاني الأفراح في قريتنا تعتمد على استبدال كلمة في المقطع الأساسي بكلمة أخرى ليتكون مقطع جديد, مثلاً يقولون:

وأنا جلت لامي (أي قلت لأمي)
الهاي الهاي (لا معنى لهذه الصيحة)
لتجوزيني
الهاي الهاي
واحدة تخينة
الهاي الهاي
وعفصتني

المقطع التالي يمكنكم أن تخمنوه:

وأنا جلت لامي
الهاي الهاي
لتجوزيني
الهاي الهاي
واحدة رفيعة
الهاي الهاي
وشوكتني

ويستمر الإبدال والاستبدال كي تنبني مقاطع الأغنية. يلاحظ أيضاً على الأغاني الشعبية الفلكولورية استخدام صيحات لا معنى لها مثل:

سك سك يا وحش
سك سك يا عفش
سك سك ع اللمونة
وبحبك يا ابن المجنونة
سك سك

هذه هي الأغاني التي تغنى بالقرية, في الأحياء الفقيرة بالمدينة تغنى أغنيات أخرى مثل التالية:

أنا عايزة الميكانيكي يجي يصلح الماتور

أنا عايزة الميكانيكي يجي يصلح الماتور

حط إيده يا

على شعري يا

خفت أقوله لأ

ليبوظ الماتور

وتستمر الأغنية في التأكيد على بعض الإشارات الجنسية إلى أن يتم الميكانيكي إصلاح "الماتور" طبعا بعدما يتم تدمير ما تبقى من صبر لدى السامع :)

بالطبع يوجد في التراث الشعبي الصعيدي الكثير من المواويل والأشعار والأغاني الهادفة, والتي غنى منها منير وغنت منها دنيا مسعود الكثير.. لكنني أردت هنا أن ألقي الضوء على منطقة لا يراها الكثيرون.

هناك 15 تعليقًا:

أسما يقول...

امممممم... سك سك؟ هي حصلت؟ يا سنة سوخة يا جدعاااان... الكلام ده في مدونتك يا عمرو؟ تؤ تؤ تؤ... احنا لازمن نقيم عليه الحد و نشمع المدونة بالشمع الاحمر... سك سك؟ يا نهار مش فايت يا جدع...

احم احم... جد بقي، انا، و اعوذ بالله من قولة انا، بما اني صعيدية و باحضر الافراح دي و بما اني عندي تاء مربوطة و باقعد مع " الحريم" فانا باسمع اكتر من كدة، و كل اغاني الافراح الشعبية، علي رأي واحدة صاحبتي، "أليلة الادب" ، الاغاني، مش صاحبتي... بس ده تراث و رغم الصراحة اللي فيه، الا انه ليه طعم، و زي اي تراث لازمن يحترم، و بعدين اللي اعرفه ان الفلاحين مصااااايب و منفتحين اكتر من اهل المدينة، اي و الله... بس هي الاغاني دي لما بتتقال في مجلس كله بنات في بنات مش بيبقي في مشكلة خالص، بالعكس، احنا بنقعد للعروسة بالمرصاد و نقفلها علي كل كلمة و ننكشها... و انا بقي متعتي هي اني اشوف واحدة صاحبتي يوم حنتهاو هي مزنوقة كدة و وشها احمر من الكسوف، بتبقي قمر، و بجد بجد بحس اني ربّيت و اني اديت رسالتي، هع هع هع...
D:
انا وعدت عيشة(عائشة) ، و دي فلاحة من المنشاة بحبها جدا جدا، جت غنت في حنة نهي صاحبتي، اني ادعيها في حنتي عشان تغنيلي... " و يا ابو اللبايش يا جصب... عندينا فرح و اتنصب.... و جلت تعالي بص تعالي بص، تسلم عيون اللي خطب..." بحب الاغنية دي اوي... بس تفتكر ربنا هيخلص مني اللي عملته في نهي ليلتها
:(

ponpona يقول...

هههههههه
هههههههههههه

انا كنت لسه باقول يا هادي لاقيتك بتقول توينا اندلينا فوتها وقولت هافهم م اللي بعديه لاقيت اللي بعديه بندج !!!

طيب البوست دا عجبني قوي وخلي صباحي حلو
ايه رأيك بقي تشرب معايا شاي بالنعاع؟

صباحك سكر يا عمرو
:))

ponpona يقول...

هههههههه
هههههههههههه

انا كنت لسه باقول يا هادي لاقيتك بتقول توينا اندلينا فوتها وقولت هافهم م اللي بعديه لاقيت اللي بعديه بندج !!!

طيب البوست دا عجبني قوي , وخلي صباحي حلو
ايه رأيك تشرب معايا شاي بالنعاع؟

صباحك سكر يا عمرو
:))

علياء يقول...

أحلى حاجة عملتها يا عمرو انك ترجمت المفردات ومواطن الجمال :)
بس حقيقي تراث جميل.. والأجمل انك نقلته لنا..

أيزولد..
حلوة قوي الاغنية اللي غنيتيها دي..
عقبال ما عيشة تغنيها لك يا رب :)

أحمد الشمسي يقول...

كد برضه يا عمرو تفضح السر السوهاجي؟
:)
عموما وانا صغير زمان سمعت حاجات كده في قعدة الستات في الأفراح...
بس بصراحة النشيد التونسي ده ما سمعتش زيه أبدا... قال توينا اندلينا قال

علياء يقول...

طيب بما انك عرفت عنوان المدونة لوحدك يا عمرو :) يبقى اسمح لي أعمل إعلان عندك بقى، أحسن كده حالنا هيقف ههههه
عنوان مدونتي هو

shining-hope.blogspot.com

زورونا تجدوا كل ما هو جديد..

(جاية عليك بغرامة المدونة دي يا عمرو أنا عارفة.. بس خلي قلبك كبير كده.. احنا اولاد كار واحد برضه :) :) )

غير معرف يقول...

هههههههههههههههههههههههههههههه

بجد جميله اوي يا مسترو عمرو

لكن انا من سوهاج بس اول مرة اسمع

الاغاني دي
ههههههههههههههههههههههه

"مروة سلام"

جمال عمارة يقول...

عمرو..

ههههههههه

تدوينة جميلة..

على فكرة.. الأغاني "الفاضحة" دي مش فلكلور صعيدي بس.. دا فلكلور مصري صميم..

فالأفراح الشعبية في القاهرة "مسخرة" وبيتقال فيها كلام مكشوف للغاية.. ولكنه رغم كده بيعدي في الفرح ومحدش بيتعرض.. "خللي الناس تفرح"..

بس سردك للموضوع لذيذ فعلاً..

ponpona يقول...

.

.


.



.


.



.




.



.





.



:(

علياء يقول...

عمرو.. ابقى عدي على مدونتي..
فيه ناس بيشركوا فيك هناك والله :)

أي خدمة D:

عمرو يقول...

فيه إيه يا بنبونة كفا الله الشر؟

أسما يقول...

هو انا ينفع ما اكتبش بوست انهاردة... ماليش نفس
:(

mano يقول...

ده ايه الابداع الفلكلورى ده احنا بقى عندنا فلكلور من نوع اخر فلكلور يجنن هههههههههههه

غير معرف يقول...

حلوه اوى اوى اوى

بس ممكن اطلب منك طلب

تقولى بقيت اغنيه عايزه الميكانيكى يجى يصلح الماتور .. هكون شاكر لحضرتك جداااااااااا :)

عمرو يقول...

غير معرف

يا ريت كان ينفع :)