أكتوبر 02، 2009

خدمة وحوي

DGDSG

الرزية.. منتج جديد تروج له شركات المحمول في دولة فساتونيا, وتقول إنه صباع سيجعلك تدخل على الإنترنت في أي وقت وأي مكان.

المواطن صابر عبد الصبور أبو صابر فساتوني محب للتقنيات الجديدة.. قرأ عن الرزية في الجريدة التي اشتراها كي يسلي صيامه, فذهب من فوره لشركة ابتسارات (هذا ليس اسمها الأصلي بالطبع, هو فقط يدلعها بهذا الاسم فابتسارات نسبة للمبتسرين أي الأطفال الجدد, وهذه الشركة هي أحدث الشركات وآخر العنقود وموطن الأمل).. كان شكل الرزية مضحكاً ومدهشاً في ذات الوقت, فهي صباع طويل يذكرك بتلك الإشارة غير المهذبة في الأفلام الأمريكية. نفض صابر عن نفسه تلك التداعيات و"استمتع" بالمنتج ليوم كامل.

في الصباح كانت الصدمة كبيرة عليه, فقد دفع 200 أهيف فساتوني كي يحصل على الرزية. الإعلان الذي في الجريدة يقول أنهم خفضوا سعرها اليوم لـ99 أهيف, مما يعني أنهم سكوه على قفاه في نصف المبلغ على الأقل.

- الحرامية أولاد (التييييت). لو بس أتلايم على واحد فيهم. أنا يسكوني على قفايا في ميت أهيف. آآآآآآآآآآه.

بدت بعض أعراض الغيظ على المواطن صابر, فقد احمر وجهه احمراراً يميل إلى السواد, وتشققت عيناه بشرايين منتفخة. مد يده يتناول علاج الضغط, ووضع الصباع في جهاز الكمبيوتر الخاص به. ثم كانت الصدمة الأكبر, فالصباع توقف عن العمل. بأصابع مرتعشة, مد صابر يده ووضعها على قلبه وأمسك بيده الأخرى سماعة الهاتف كي يتصل بخدمة العملاء:

- صباح الخير أهلا بيك في ابتسارات أحمد في خدمة حضرتك يا فندم..

- أهلا أحمد.. أنا 01515151511, ممكن أعرف الخدمة اتوقفت عني ليه؟

- حاضر.. لحظات وهابقى مع حضرتك يا فندم.

بعد ربع ساعة

- شكرا لانتظار حضرتك معانا.. حضرتك فعلا مشترك عندنا

- لا والله يا شيخ؟ ما كنتش أعرف. الخط اتوقف ليييييييييه؟ (بغيظ واضح)

- الخط اتوقف عشان حضرتك خلصت الباقة.

- نعم؟ ليه يعني؟ ده أنا كل اللي عملته إني دخلت على موقعين تلاتة, إزاي يعني خلصت؟

- حضرتك لو عايز تجدد الباقة تشحن بأربعين أهيف وهاتلاقي الخدمة اشتغلت تاني يا فندم.

- اللهم طولك يا روح.. يا ابني باقولك ما استعملتش الباقة أساساً. بأقولك إيه.. شوفلي حد كبير أكلمه.

- حضرتك لو عايز تتظلم, اتوجه لفرع الشركة واكتب شكوى.

- بأقولك هاتلي حد كبير يا شاطر.

- أنا آسف يا فندم هو ده السيستم عندنا.

- بس انت ما تعرفش بقى السيستم عندنا إيه.. قول وحوي.

- نعم.. إيه يا فندم؟

- قول وحوي.

- وحوي

- وحوي يا حبيبي

- كل سنة وحضرتك طيب. أي استفسار تاني يا أستاذ صابر. إحنا في خدمة حضرتك يا فندم.

(تشك) أغلق صابر الهاتف, وجرجر قدميه نحو السرير كي يتمدد عليه. كان لسانه قد تدلى وتهدلت شفاتيره, بينما أحس بكلاب تنبح في رأسه. تمدد لفترة ثم قرر أن يدفع وأمره لله.

بعد الشحن لم يستخدم صابر الصباع. كان فقط يدخل على المواقع المجانية, وحين يضطر إلى الدخول على المواقع الإخبارية كان يضغط على سر إيقاف التحميل بسرعة فتتوقف الصفحة عن الظهور ولا يبدو منها سوى عناوين الموضوعات.. على العموم هو لم يكن يرغب سوى في مطالعة عناوين الأخبار. المشكلة أنه بعد ساعتين من الشحن توقف الصباع مرة أخرى..

- صباح الخير أهلا بيك في ابتسارات.. أحمد في خدمة حضرتك يا فندم..

- أهلا أحمد.. أنا 01515151511, ممكن أعرف الخدمة اتوقفت عني ليه؟

- حاضر.. لحظات وهابقى مع حضرتك يا فندم.

بعد نصف ساعة

- شكرا لانتظار حضرتك معانا.. حضرتك فعلا مشترك عندنا

- لا والله يا شيخ؟ ما كنتش أعرف. الخط اتوقف ليييييييييه؟

- هو واضح قدامي يا فندم إن فيه مشكلة في العنوان.

- وبعدين.

- بس يا فندم

- قول وحوي

- نعم يا فندم

- بأقولك قول وحوي

- كل سنة وحضرتك طيب يا فندم

- قول وحوي

- وحوي يا فندم

- وحوي يا حبيبي..

- أي استفسار تاني يا أستاذ صابر. إحنا في خدمة حضرتك يا فندم.

- آه فيه استفسار تاني.. هو انتم مش شركة محمول برضه؟

- تمام يا فندم

- يعني عندكم محاميل كتير.. طيب مش كنتم اتصلتوا بيا بدل ما تقطعوا الخدمة عني وأنا دافع فلوس.

- أنا آسف يا فندم هو ده السيستم عندنا.

- بس انتم ما تعرفوش السيستم بتاعي.. وحوي وحوي وحوي

(تشك)..

النت بالقطارة, كان هذا شعار صابر للمرحلة التالية. نت المواقع المجانية فقط. نت بلا تصفح ولا فيديو ولا داونلود.

"فليكن" هكذا قالت زوجة صابر وهي تدلك له صدره بعد الذبحة التي أصابته. قال الطبيب إن عليه أن يأخذ الأمور ببساطة وأن يتركهم ينهبوا أهله دون أن يعكر دمه. وكان رد صابر بكلمة واحدة ترتبط بالشهر الكريم. حيث بدا واضحاً أنه يستخدم هذه الكلمة بدلاً من كلمات أخرى بذيئة يستخدمها في غير الشهر المبارك. عندما أفاق صابر من المرض أدخل الصباع في الكمبيوتر وقرر أن يستمتع بماله ولو للحظات. ثم فوجأ بماذا؟ تخمينك صحيح.. انقطاع الخدمة.

- صباح الخير أهلا بيك في ابتسارات..

- صباع الزفت.. صباع الرزية والهباب. أظن ما هاتقولي ان اسمك أحمد.. أهلا يا خويا.. تشرفنا يا خفيف.

- سامح مع حضرتك يا فندم.

- لا يا شيخ.. اطلع من دول يا أحمد... اطلع من دول.. العصافير اللي دقيتهالي طارت.

- لا مؤاخذة يا فندم؟

- وحوي يا أحمد.. وحوي وحوي وحوي وحوي وحوي يا أحمد.

- كل سنة وانت طيب يا فندم. أتشرف باسم حضرتك.

- يعني مش عارفني يا سي أحمد؟ أنا 01515151511

- أهلا أستاذ صابر.. تحت أمرك يا فندم.

- تحت أمري؟ ده أنا اللي خدام السيادة. الخدمة.. الهباب.. الرزية اتقطعت ليه؟

- حضرتك خلصت الكريديت بتاعك, والباقة وكل حاجة.

- ده امتى ده؟ أنا كنت في المستشفى.

- يا فندم أصل أي موقع بتدخل عليه بياخد ميجابيتس كتير.. كتير قوي

- انت فاكرني إيه يا عم أحمد.. ده أنا كنت على النت قبل ما بابا انت يقول لماما انت تييييييييييت تييييييييت. ده أنا كنت باستخدم النت أيام ما كان بكروت يا تتتتتتتتتتيييييييييييت.

(تشك) رعشة كبيرة تنتشر في جسد صابر, مع ارتفاع ملحوظ في درجة الحرارة واسوداد في الوجه, واهتزاز كبير في الصدر.

نظر صابر في المرآة, وقد أحس بأنه على وشك الموت. سيكون الرجل الأول الذي يقتل عن بعد. سيكون الضحية الأولى لخدمة العملاء وشركة ابتسارات والرزية.

كان أول عهد صابر بخدمة العملاء مع شركة أم نبيل التي كادت تقتله لولا أنه حافظ على صحته ورمى شريحتهم واستخدم بدلاً منها شريحة فؤادفون. صحيح أن الخدمة في فؤادفون ليست جيدة, لكنهم يعرفون كيف يتعاملون مع البشر.

تررررررررررررن ترررررررررررن

- أيوة

- صباح الخير سوسو نبيل من شركة فؤادفون مع حضرتك يا فاندم. (هكذا قالتها بدلع زائد)

- أنا دفعت الفاتورة على فكرة.

- لا يا فندم أنا مش باتصل عشان كده. أنا بس عايزة أعرف رأي حضرتك في الخدمة. أصل حضرتك عميل فؤادفون المميز.

- الخدمة حلوة قوي يا سوسو.. يعني المكالمات ما بتتقطعش, والشبكة مش مشغولة خالص, وسامعة الصوت ده: تششششششششششششششش تششششششششششششش. ما بقاش بيطلع خلاص.

(كه كه كه تضحك ضحكة ذات مفعول أقوى من مفعول فتاة إعلانات ميلودي.. تلك الفتاة التي ينبغي أن يأخذوها في إعلانات الجيلي)

- يعني كله كويس؟

- قوليلي يا سوسو.. انتي تحديتي الملل قبل كده؟

- نعم؟

- لا أبداً.. ممكن أطلب طلب.

- اتفضل يا فندم إحنا..

- عارف عارف في خدمتي وكده يعني. بصي أنا هاقول حاجة وانتي تردي على طول. ماشي؟

- تمام

- وحوي

(كه كه كه تضحك ضحكة ميلودية أخرى)

- وحوي يا... (كه كه كه ) يا حبيييييبي

(تشك)

----------------------------------------------------------------------------------

شوية جد:

يتم التضييق علينا في بلادنا في الاتصالات وفي خدمة الدخول على الإنترنت من قبل شركات تستغلنا وتمتص دمانا ولا تعطينا خدمة جيدة. هذا بالطبع لأنهم دفعوا للحكومة مبالغ طائلة استحقوا بها ميزة استعباد الشعب, ولهؤلاء جميعاً أقول كلمة واحدة. أعتقد أنكم تعرفونها الآن.

هناك 40 تعليقًا:

غير معرف يقول...

هييييييييييييييييه
أول تعليق
ياه من زمان مش علقت اول واحده
الف سلامه يا عمرو
احنا قلقنا عليك والله
قلت فرجت وبعدين مش لاقيناك
حمد الله علي السلامه :)
هقرأ البوست وأرجع اعلق
فاطمه

غير معرف يقول...

ههههههههههههههههههههه
جميل البوست جدا :)
بس فعلا عندك حق شركات الاتصالات بقت بتستهبل جدا في النت والمكالمات وكلو
يعني مثلا انا فؤدافون وبدخل علي النت من الموبايل ليا 3 ميجا بايت لو زودت ياخد اكتر من جنية
ممكن بقي اكون استخدمت واحد ميجا بس واكون لسه شاحنة من مفيش الاقي طنط سوسو فؤدافون تقولي > لقد أوشك رصيدكم علي النفاذ يرجي اعاده شحت البطاقه <
حاجه تحرق الدم و سرقه علنية بجد و الناس عادي كل حاجه بقت عادي مبقتش بتستغرب.
يلا نستحمل بقي اصل هنعمل اية !
البوست لذيذ جدا يا عمرو :)
فاطمة

Unknown يقول...

ههههههههههههه
هههههههههههههههههه
ههههههههههههههههههههههه
ههههههههههههههههههههههههههه
ههههههههههههههههههههههههههههههه
هههههههههههههههههههههههههههههههههه


لا معلش شوية كمان معلش معلش عشان اضحك براحتى..وسع شوية كدة يا عمرو لو سمحت

هههههههههههه
ههههههههههههههه
هههههههههههههههههههه
ههههههههههههههههههههههههه
ههههههههههههههههههههههههههههه
ههههههههههههههههههههههههههههههههه

عمرو يقول...

أهلا فاطمة
وحشني تعليقاتك ووحشتني المدونة وكل الزوار
عاملة إيه؟ يا رب على طول بخير
هي فعلا سرقة عيني عينك يا فاطمة
:)

عمرو يقول...

إنجي
خدي راحتك.. ده احنا هانضحك ضوحك
:)

جارة القمر يقول...

هههههههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههه

يانهارى عليييييييييييييييك بجد انت مش ممكن يا عمرو و الله

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

انا ميته من الضحك و ربنا
يا بنى اشترك فى اى شركة نت احسن و خلص نفسك بقى

noon kiko يقول...

ههههههههههههههه
وكمان
ههههههههههههههههه
استاذى انت فظيع
ههههههههه
مالكش حل
طبعا حضرتك عارف ده كويس
وانا طبعا اخجلت تواضعك اللى مش موجود اصلا
الخ الخ الخ
الكلام ده فطسنى من الضحك
وبحمد ربى انى مش بتعامل مع ابتسارات خالص رغم كل مغرياتها الحاليه
ورغم ان الا لاف بل الملايين شغالين بيها حاليا
وبحمد ربى كمان على ان النت عندى بأكسيز
اينعم بييجى اوقات واوقات لا
بس على الاقل بعمل داونلود من غير حدود
وبتصفح براحتى ف الوقت اللى فيه النت موجود
بغيظ حضرتك صح
ههههههههه
طيب هو ف مصر مفيش شركة انترنت تديلك اشتراك؟
او سيبر قريب يديلك وصله بدل العذاب ده؟
ممكن يكلفك الاول حوالى تلتميت ربعمية جنيه بس احسن من تعذيب الشحن ده
انا بعد اللى قريته ده هروح اشكر مايكل صاحب وصلة النت الى عندى والله هو اصلا تعب معايا..كل يومين ييجى يشوف النت فصل ليه..ويركب فوق سطح السطح بتاعنا وتصدق والله ولا بياخد ولا مليم..رغم اننا عرفناه قريب..ده غير شحطتته على الشاحن بتاع الاكسيز يوم ماجات الكهربا عاليه وحرقته
بجد انا عرفت قيمة مايكل النهارده بعد اللى انت عانيته مع احمد
هههههههههههههههه
كان الله ف عونك
هههههههههههههههههههه

noon kiko يقول...

على فكره نسيت اقول لحضرتك
الف الف الف سلامه عليك
عرفت انك تعبان من البوست اللى فات
الف سلامه
وياريت لو كانت خنازيرى تسيب المدونه فورا
ههههههههههههه
وتتوجه لاقرب حجر صحى

بعد الشر عنك
امال مين هيخلينا نيجى هنا ونقرا تانى
ربنا يديلك الصحه ويكتر بوستاتك
:)

ponpona يقول...

إزيكو ياولاد ، ممكن بس توسعولي كده جنبكم ...
هههههههههههههه
ههههههههههههههههههه
ههههههههههههههههههههه

يخرب بيت عقلك يا عمرو ... وحوي !!!
ابتسارات و أحمد و أنا 01515151511 وتييييييييييت


الولاد اللي لسه ماجوش ... تعالو تعالو في هنا يجي خمس ست سبع تمن ... قول عشر أماكن فاضين جنبنا
:)


شويه جد بقي:
عمرو : سلامتك ألف سلامه ان شالله أحمد يارب ;)
فاطمه: وحشتيني يابنتي فينك ، أنا قاهريه علي فكره بس أصلي كنت قابلت ديدي عند زهره وكنت باحسب انها هي اللي من الاسمعليه

غير معرف يقول...

كل الناس تدخل تقولي عود أحمد
عشان النت رجع من كام يوم
وافتكر يا عمرو إني قلتلك إن كل حاجة في مصر لازم يكون فيها إنة
ولازم تشوف الناس إللي جربت قبلك عشان تعرفها
بس انت اتسرعت كعادتك واشتركت في النت من غير ماتعرف الإنة
أحمد شكل

عمرو يقول...

جارة القمر
يا أنا يا هما. أنا إن شاء الله هاخليهم يبيعوا بطاطس
:)

عمرو يقول...

أهلا زهرة
لازم طبعا تصلي ركعتين شكر.. مش كل الناس عندهم مايكل
:)
مش ينفع إني أشترك في نت ثابت لأني أنا نفسي متحرك
:)

عمرو يقول...

بنبونة
حلوة صورة البروفايل الجديدة.. أنا كويس جدا دلوقتي.. مش عارف الحالة دي استمرت لمدة ساعتين بس نمت وصحيت الصبح كويس
:)

علياء يقول...

حمداً لله على سلامتكم :).. وبلاش سيرة الأنفلونزا دي أحسن الناس تبطل تدخل المدونة :)
لذيذ الموضوع وظريفة قوي طريقة عرضك ليه يا عمرو.. بجد جميل جداااا
والله النت ده تاعب الناس قوي,, ما بقيناش نعرف نعيش من غيره :( .. لو توقف شوية تبقى مشكلة..

عمرو يقول...

أحمد شكل
تعرف؟ أنا اتسرعت مرة واحدة في حياتي.. لا مرتين
الأولى لما صاحبتك والتانية لما عرفتك طريق المدونة
ههههههههه
أهلا بيك يا أحمد
:)

عمرو يقول...

أهلا علياء
والله المشكلة إنه بقى شيء أساسي مش هامشي.. بقى زي المية والكهربا. إدعيلي ربنا يتوب علينا
:)

ponpona يقول...

أنا مبسوطه مبسوطه يعني
مبسوطه أوي مبسوطه جدا
مبسوطه خالص خالص

عندي كمية انبساط مش عارف هاطلعه علي مين

بس خلاص !!

أنا مبسوووووووووووط
:)

أسما يقول...
أزال المؤلف هذا التعليق.
عمرو يقول...

بنبونة
يا رب تبقي مبسوطة على طول
:)

nor يقول...

وحوي ياعمرو

nor يقول...

وحوي ياعمرو

عمرو يقول...

وحوي يا حبيبي
:)

ponpona يقول...

عمووور
إزيك عامل إيه ؟ كويس ؟ طيب الحمد لله

حزر فزر كده أنا عملت ايه ؟ هي أكيد مصيبه
بس خمن كده ممكن تطلع ايه؟ ممكن تطلع إيه ؟ إيه ؟

عمرو ..
مبدئيا ميرسي ليك ... ميرسي كبيره آآآآآد كدهو
وميرسي لكل الناس الحلوين اللي أنا عرفتهم هنا

الشمسي
أيزولد
انجي
نور / زهره
جارة القمر
ديدي
فاطمه
هبه
علياء

عمرو بص بقي عندي ناس حلوين إزاي

أنا عملت إيه بقي ؟ حاجه بسيطه قوي

أنا عملت مدونه !!!!!!

http://shewaytwara2.blogspot.com/

في هناك حفله ومشاريب وجاتوه وانتو أكيد المعازيم يعني

ربي يحميكوا كلكو ويخليكو ليا
أنا هاجيلكو واحد واحد بس استنو عليا
:)

تــسنيـم يقول...

يا نهارك أبيض


وحوي يا عمــرو؟؟ دي هتنتشر بسرعة البرق زي ما أوبجيكشن انتشرت و إحنا في ثانوي.. بس وحوي أشيك تصدق :))


قضيها نت من ع الموبايل يا عمرو و محدش هيسرقك.. ابتسارات حلوة ع الموبايل فؤش فوون سرقة علني .. أم نبيل نوكونيكشن على طووووووووول

ارمي اللاب توب بقى و قضيها موبيل :)

عمرو يقول...

تسنيم
للأسف أنا كائن موطنه الأصلي الانترنت.. يعني حكاية الموبايل دي مش هاتاكل معايا
:(

Unknown يقول...

يارب تنجح يا تتح

ايييييييييييييييييه النظام؟؟

مفيش بوست جديد يلوح فى الافق؟؟؟

أنسانة-شوية وشوية يقول...

وحوى يا عمرو

فكرتنى لما اتمطعت وانا مسافرة المصيف وقررت اشترى صباع فؤادفون ويابنى نص ساعة وحياتك مكملتش ولقته بيقولي لقد نفذ رصيدكم بصراحة انا تفيت عليه بالعربي (بصقت عليه) مقدرتش ااقول وحوى لانى كنت مش صايمة ومقدرتش استحمل ، واول ما رجعت رمتها في الدرج ولا كأنى اتضحك عليا خااااااااااااااالص ومحدش يعرف حاجة عن الموضوع ده غير.........
وخلاص وحوى يا عمرو وعوداً احمد

غير معرف يقول...

ههههههههههههه
كنت عندى اكتئاب قبل لما اقرلء البوست بس قلبى تعب من الضحك بس عودا احمد نورت يا ريس


قطتى

عمرو يقول...

إنجي
أنا نزلت بوست خلاص.. طبعا انتي عارفة إيه اللي حصل وخلاني ما أجيش المدونة. حزري فزري؟ أيوة قطعوا عني الخدمة عاااااااااااااااااااااااا

عمرو يقول...

كل سنة وانتي طيبة يا إنسانة
على فكرة أنا مش قادر أدخل مدونتك عشان فيه غنية بتتحمل أول ما أدخل وانتي عارفة دي كيلوبايتات كتير
:)

عمرو يقول...

أهلا قطتي
بعد الشر عليكي من الإحباط وكل المشارع السيئة.. ليه يا بنتي كده, انتي عندك كام سنة عشان تحبطي.. طيب باقولك إيه تحبي أقولك نكت؟
:)

Heba Gamal Emara يقول...

بجد تحفه
انا ضحكت ضحك مش ممكن
دوما الى الامام
:)

أسما يقول...

اممممممم، انا عايزة اقول حاجتين:

اولا ممكن يعني لو ما فيهاش غلاسة و رخامة و تباتة مني اعرف الناقد الكبير احمد بيه الشمسي قال، ايه عن البوست ده؟ اصل مش عارف ليه حاسس انه ما عداش البوست علي خير و حاسة اني هاتفق معاه، و الله اعلم... بس لازمن تجاوب علي سؤالي، حسك عينك تطنش

الحاجة التانية بقي، الف شكر علي كلمة وحوي دي، دي ف حد ذاتها اختراع، و فعال بالنسبة لواحدة زيي بقت محتاجة تشتم كتير مؤخرا، ف مصر كنت اما اتغاظ اديها شتايم بالانجليزي براحتي عالآاااااخر، هنا طبعا كله هيكون فاهم و انا ما اتعودتش اتلفظ بالعربي و الحمد لله، الانجليزي بيخليي احس اني باشتم بشياكة هع هع هع ... دلوقتي باعرف اشتم بالاسباني، البركة ف لونا، و بقي عندي وحوي، الله حلوة اوي، و شيك و نبرة الصوت و الطريقة اللي بتتقال بيها هتعلاف اللي قدامك انك تقصد تقوله حاجة من اياهم، بي هو عمره ما هيفهم الا اذا قرا الوست ده هع هع هع

و حلوة اوي و حوي يا حبيبي، انا هاقولها لرئيس القسم كتييييييير هع هع هع

أسما يقول...

آه
علي فكرة، الخدمة هنا ف المحمول نييييييييييلة، اولا عندك ييجي عشرتاشر شركة و كل واحدة سيستم شكل، بس كلهم بيتفقوا علي مبدأ واحد" اتكلم قليل ادفغ كتير" سيادتك لة هتشحن بكارت يبقي هتدفع لو اتصلت او لو استقبلت مكالمة، ايون، لما حد يتصل بيك هتدفع... الخط بقي، احسن طبعا من الكارت، بس برده في ضرايب، يعني انت بتدفع فلوس مكالماتك و عليها ضرايب، و العروض المطروحة و الفلوس المطلوبة بتختلف من شركة ل شركة و انت علي ما تحاول تفهم كل العروض دي يكون اهلك ف مصر احتسبوك عند الله لانهم مش عارفين يوصلولك، يللا، ما حدش بياكلها بالساهل، قطشيعة

عمرو يقول...

أهلا إيزولد
أحمد كان رأيه إن البوست فوكاهي وعجبه.. بس ليه السؤال الغريب ده. وهو بيقول إن البوست مش بيطرح قضية نختلف عليها من الأساس وهو كمان عاجباه وحوي
بس ليه هاتتفقي معاه؟ وفي إيه؟ بلاش ألغاز والنبي عشان اليومين دول أنا مش مركز
ألف مبروك على الأسباني
:)

أسما يقول...

مش الغاز و الله يا ولدي انا بس اللي ما عجبنيش ان الفكرة مفيهاش جديد و كنت باقرا و انا متوقع اللي جاي، بس الجديد اللي اشهدلك بيه هو المصطلحات بتاعة فستوني و وحوي طبعا، دي اخترااااع، بس ام نبيل و فؤادفون و ابتسالات ما عجبونيش خالص عشان واضحين اوي، و القصة تلمح و لا تصرح يا عزيزي، هع هع هع ، و الله و جالك يوم اقوللك فيه الجملة، يا خراااابي يا جدعان، انا مبسوط و الله هع هع هع
و بعدين تعالي هنا، مش مركز ليه ان شاء الله،ها؟ لعل المانع الخير... يا رب تكون بخير

جمال عمارة يقول...

عمرو..

الله.. طب ما انت بتعرف تكتب كوميدي أهه؟ :)

فعلاً جميلة ودمها خفيف..

عمرو يقول...

أهلا إيزولد
على فكرة إنتي مالكيش فيها خالص خالص خالص.. ليه؟ عشان دي مش قصة أساسا, ولا تلميح ولا تصريح, دي تهييسة يا إيزولد مقصود بيها إن الشعب يعيش بس. لكن لا هي قصة ولا تنسب لأي فن أساسا. عموما نقدك ده خلاني أعرف سقف تفكيرك فين. دلوقتي أنا خلاص عرفت إنك مش ليكي فيها خالص
هههههههه
:)

عمرو يقول...

أستاذ جمال
والله يا باشا إحنا لسة بنتعلم.. لكن لو حضرتك شايف إني باعرف أكتب كوميدي يبقى أنا باعرف أكتب كوميدي
:)

أسما يقول...

سقف تكفيري؟! يا نهارك مش فايت، و بعدين طيب ما انت قبل كدة علقتلي علي بوست علي انه قصة و هو مش قصة اساسا، ايه ده هو انت عندك نفس السقف و لا اييييييه؟ هع هع هع