مارس 30، 2010

أهي ابتدت تندع :)

Rain يمكن الكتابة عن حياتي الشخصية بالعامية في المدونة واحدة من الأشياء اللي عمرها ما خطرت على بالي, لكن بما إني ساكن لوحدي, ومش معايا حد أقوله إني فرحان, وبما إن الفرد لازم يعبر عن مشاعيره, فأنا قلت أكتب النهاردة عن بعض الحاجات اللي مش عارف لها سبب, لكن عارف كويس قوي إنها فرحتني.

بعد التدوينة قبل الأخيرة (بعنوان "أنا أتغير, من فضلكم ساعدوني") حصلت حاجات غريبة قوي في حياتي, مش عارف إن كانت ذات صلة بالتغييرات اللي أنا عملتها بالفعل ولا لأ. أنا أخدت بعض القرارات بعد ما كتبت التدوينة دي وقلت لنفسي لازم أنفذها. منها إني لازم أقلع عن أي سلوك سيء قلت عليه في التدوينة, ومنها إني لقيت نفسي مركز على النتيجة مش على العملية, فقررت إني أركز أكتر على اللي باعمله دلوقتي مش اللي أنا عاوز أعمله, لأني بطبيعتي شخص غير واقعي وحالم بشكل يغيظ. المهم إني وأنا في القطر فتحت المصحف وكان ليا فترة كبيرة ما قريتش قرآن. من يوم ما بابا اتوفى وأنا مش بأقرا قرآن نهائي غير في الصلاة, أنا حلمت بواحد قبلها بليلة بيقولي المصحف اللي انت سبته يوم الدفن لسة موجود عندي أنا شايلهولك, ولما صحيت ركبت القطر وخدت معايا مصحفي, ومش عارف ليه اخترت سورة لقمان, وقررت أعمل بنصايح لقمان لابنه.

وأنا في القطر قلت لنفسي إني لازم أقرا القرآن بشكل تطبيقي ناقد, وبدأت بالفعل وكان ورايا شخص بيتكلم في التليفون طول الطريق وكان نفسي أقوم أضربه. بصيت من شباك القطر لقيت جبل وسحاب وحسيت إني مش عايش لأني مش بادي نفسي فرصة تتأمل برة مني, المهم إني قبل ما أوصل سوهاج بساعة تقريباً بصيت على الشخص اللي بيتكلم في التليفون واكتشفت إني أعرفه, هو مش صديق ولا زميل لكني أعرفه وهو يعرفني. سلم عليا وقعدت جنبه وقعد يحكي ويقول حاجات خارج سياق حديثنا. لقيته بيقولي من غير مناسبة إن الرزق منه ما هو مقدر وما هو مكتوب وإني أريح نفسي من الجري, وبعدين طلع لي مقال لإبراهيم عيسى مالهوش علاقة بالرزق خالص, المقال كان عن الحكم على الناس من خلال بعض أفعالهم, أو بعض صفات فيهم, سأل إبراهيم عيسى سؤال بريء, "لو جات لك أم عندها نص عيالها صم والنص عمي وعندها زهري وحامل تقولها تجهض الجنين؟” أنا قلت طبعا, راح قال “الجنين ده كان بيتهوفن". قال كمان إن روزفيلت كان سكير وبتاع نسوان وكلام كتير قوي بس كان رئيس جيد ولو بصيت على ماضيه عمرك ما كنت انتخبته رئيس. فأنا قلت لنفسي إن كلام إبراهيم لا يعتد بيه, لأن لو العملية كده يبقى مش فيه معايير للحكم على الأشخاص ولا لاتخاذ قرارات, بس قلت أنا مش هاحكم على نفسي غير باللي باعمله دلوقتي.

المهم بقى فيه حاجات كتير قوي حصلت بعد أما نزلت من القطر, جاني إحساس غريب بإني بقيت محظوظ, وإن كل حاجة سهلة, ومن ساعتها وأنا بتحصل في حياتي حاجات كتير مفرحة.

يعني أنا كنت مفلس خالص, لقيتهم في نادي الأدب صرفولي خمسة وعشرين جنيه بحالهم, وفلوس النادي دي بتفرحني قوي, لأنها جات من حاجة ممتعة, وباحس إني لازم أصرفها ف حاجة ممتعة, وده هو اللي حصل (حتى اسألوا أحمد الشمسي ههههههههه), المهم بقى إن فيه حاجات كتير قوي حصلت فرحتني منها إن هدير أختي طلعت الأولى, وأنا بقيت حاسس نفسي أيوها مش أخوها ففرحت جدا, ومنها إن فيه واحد اتصل بيا وقال لي انت ليك عندي وظيفة (مع إني مش عاوز أشتغل, لكن أنا باحب أروح المقابلات وباحب الناس تسأل عليا), ومنها إني كنت ناوي أجيب ساعة فلقيت شخص عزيز عليا قوي بيديني نفس الساعة اللي فكرت أشتريها. ربنا كمان رزقني بمبلغ كبير جدا ومن حيث لا أحتسب, بس المبلغ الكبير ده ما كانش له أثر فرحة الخمسة وعشرين جنيه, أنا اكتشفت إن الفلوس بتفرحنا على حسب الطريقة اللي جات بيها والحاجات اللي هانصرفها فيها, يعني لما يجيلك مبلغ كبير وتحوشه مش هاتبقى سعيد, وإن كنت هاتحس بأمان أكبر.

بس أنا فرحان قوي بالساعة وبنجاح هدير حبيبتي, وعندي إحساس بالتفاؤل كبير. مش عاوز أربط ده بالتغييرات اللي عملتها عشان ما يبانش من الكلام إني باقول على نفسي راجل بركة أو ولي أو درويش, لكن فعلا فيه حاجات كتير قوي اتيسرت وحاجات كتير جدا ربنا رزقني بيها في الكام يوم اللي فاتوا. أنا ليه باقول الكلام ده؟ عشان أقولكم على السر. أو اللي يمكن يكون سر. بيتهيألي إن فرحتي سرها حاجة واحدة. إني بادعي ربنا دايما وباقول يا رب فرحتي عليك.. انتم كمان ادعوا بالدعوة دي. أي حاجة مالكمش فيها يد, ولا تقدروا تعملوا فيها حاجة ما تفكروش فيها, سيبوها على الله, بس تكونوا عملتوا اللي عليكم الأول وبعدها ادعوا وقولوا يا رب فرحتنا عليك.. قولوها من قلبكم وسيبكم من الهم.. قولوها دلوقتي.. مش سامع يعني :)

:)

هناك 30 تعليقًا:

Unknown يقول...

يارب فرحتى عليك

محمد بحر يقول...

السلام عليكم

يارب فرحتى عليك
انت اسعدتنى جدا بالكلام ده
لكن انت فين دلوقت انا احترت فى سوهاج ولا القاهرة ولا اسكندرية
وكمان تعالى هنا انت ربنا كرمك بخمسة وعشرين جنيه مرة واحده وتروح تحتفل بيها مع الشمسى بس خلى لبالك انا بكتب ده عليك وهخبر الشلة نفر نفر ومش حسيب حقى ياعمرو فاهم مش حسيب حقى
انا كده هعمل اعتصام على باب المدونة واضراب عام (ماعدا الاكل والشرب والنوم)لحد مايرجعلى حقى فى العزومات اللى راحت عليا دى

أسما يقول...

:)

يا رب يزيدك و يفرحك كمان و كمان قادر يا كريم... قول آمييييييييييييين
:)
و ادعيلي معاك و انت فرحان شالله يخليك
:)

بالمناسبة... الف مبروك لهدير هي تالتة، مش كدة؟ قل لها تشد حيلها عشان نبقي زمايل
:)

Heba Gamal Emara يقول...

يا رب فرحتي عليك :)

بعد إذنك ا. عمرو : كنت عايزه اسأل حضرتك أنا دلوقتي لما اكتب تدوينه ف البلوج و عايزاها تنزل دايركت علي فيس بوك بعنوان و شكل للمدونه _ أعمل إيه ؟؟
أفيدونا أفادكم الله :)

أسما يقول...

علي فكرة حلو الكوتيشان بتاع الجيبسي اللي انت حاطه ده، انت جبته منين؟

أسما يقول...

لا، كدة بقي انا هابتدي اشك في المدونة... عدد التعليقات اللي بتظر لي في الصفحة الرئيسية اكبر من اللي موجودة فعلا عالبلوج... انتي بتخبي التعليقات مني يا عمور؟

D:
خمسة جد، شوف الموضوع ده، لان حتي تعليقاتي ساعات مش بتظهر
:(

أسما يقول...

تظهر*
انت* مش انتي
(وش مكسووووف)
:)

ponpona يقول...

يسعد أيامك كلها يا عمرو ويروق بالك :)

حلو الكوتيشان بتاع الجيبسي ده .. حلو خالص ;)

ponpona يقول...

أيزولد
اطلعي فوق فيس بوك عند أحمد وانتي تلاقي الكوتيشان :) :)

غير معرف يقول...

يا رب فرحتي عليك يا رب ؛ وربنا يسعدك ويفرح قلبك كمان وكمان آمين.
ديدي

عمرو يقول...

محمد يا بحر
أنا ف اسكندرية, وقول للشلة أنا مش بيهمني :)

إيزولد
شكرا, ربنا معاكي يا رب, والله يبارك فيكي. مش عارف حكاية التعليقات دي بس ما حدش اشتكى منها غيرك, ممكن يكون حاجة عندك ف جهازك. الكوتيشان من أغنية جيبسي لشاكيرا, رشحهالي الشمسي امبارح وعجبتني



هبة جمال عمارة
فيه أبليكيشان بتعمل ده يا خبة على فيسبوك اسمها نتبلوج


بنبونة
ربنا يكرمك ويسعدك انتي كمان :)

عمرو يقول...

ديدي
ربنا يسعدك.. شكرا على متابعتك :)

غير معرف يقول...

كتير حبيت اللوحة ...وفعلا احيانا بنفرح من اشيا كتير صغيرة وكمان بنفس الوقت بنزعل من اشيا كتير تافهة...في لانهاية الدرس صح ...هو بس الاتكال على الله اللي بيساعدنا وبيدعمنا معنويا...انو نكون عارفين انو بس الله ممكن يتحكم بكل امورنا وخصوصياتنا ...هادا بحد ذاته شي رائع...لانو ربنا بيحبنا حتى اكتر من اهلنا...هو اللي خلقتنا....يعني ما رح يعطينا الا الخير ....الرحمة بتجي بس من عندو...يارب ارحمنا ............
اسمى - منمنمات نادرة :)
شكرا...أمتعتنا .................


ممممم واللهجة العامية ....حلوة.....تصعبت شوي ....بس مشي الحال.....موفق

عمرو يقول...

أسماء صباح
أخبارك؟ أشكرك جدا على القراءة لأني عارف انك تعبتي كثيرا لفهم عاميتي, ربنا يفرحك انتي كمان :)

Heba Gamal Emara يقول...

Ok
Thx

أحمد الشمسي يقول...

ربنا يفرحك كمان وكمان يا عمور
انت تستاهل

أحمد الشمسي يقول...

وعلى فكرة انت معاك حق تفرح بالمبلغ الهايف بتاع قصر الثقافة
البيتزا بتاعتهم كان طعمها أحلى من اي بيتزا تانية كلتها على حسابك، أو على حسابي كمان
:)

علياء يقول...

ربنا يفرحك علطول يا عمرو :)

ويفرحنا كلنا يارب .. أنا والله دايماً أدعي وأقول يارب تدخل الفرحة لقلبي ولقلوبنا جميعاً.. الفرحة اللي هي من القلب دي يا عمرو.. عارفها :) اللي حسيتها لما أخدت الخمسة وعشرين جنيه وأكلت البيتزا دي :) :)

ربنا يسعدك وميروووووك لهدير

محمد بحر يقول...

السلام عليكم

حكاية التعليقات دى كمان حصلت معايا انا امبارح كنت كاتب التعليق تانى واحد ومظهرش اى حاجه غير تعليقين مع انه كان كاتب تلاته

ومش بيهمك بقى اوكى جنت على نفسها براقش وكمان بيتزا يا دكتور احمد دى الحكاية كبرت قوى

محمد بحر يقول...

وصح نسيت اقولك الأغنية اللى فى الاقتباس بتاعت محمد فؤاد مش محمد منير

لذا لزم التنويه

وشكرا

Romancia يقول...

يارب فرحتى عليك

ميرسى بجد على البوست الى مليان بالامل دة

واللى انت فيه دة لانك غيرت نظرتك تغير يعنى نظرة مختلفه ولانك غيرت نظرتك حسيت ان كل حاجة بتجيلك
مش بيقولك اضحك للدنيا تضحكلك
اديك ضحكت


كمان تفائلو خيرا تجدوه

يارب دايما فرحتنا عليك

تسلم ايدك على البوست الجميل دة
ومبروك لهدير

noon kiko يقول...

يعنى دعانا كله ليك ف الايام اللى فاتت مالوش نصيب ف الخمسه وعشرين جنيه
عااااااااااااااااا
:(
طيب انا مش مسامحه بقا وعايزه دعواتى
ماليش دعوه
وهرسملك بفلوس
بس هه
هههههههههههههههههههه
طبعا انا مبسوطه اوى لانى بقرا الكلام ده
ومبسوطه اكتر انك بقيت كويس الحمد لله
والله ده بركة دعواتنا
بس ايه
مفيش حتى كلمة شكر لينا
هههههههههه
يالا
كأنها كانت زكاه عن صحتنا
:)

عطش الصبار يقول...

يارب فرحتنا كلنا عليك يارب فرحه كل الشباب عليك يارب فرحه الوطن عليك
عارف يا عمرو كل الحاجات دى كانت موجوده لكن ما كنتش واخد بالك منها
واعتقد انك سافرت كتيير فى القطار لكن اول مره تبص على الطبيعه تبص خارج ذاتك كما تقول
مبروك التغيير ومبروك كل حاجه حلوه فى حياتك

عمرو يقول...

هبة عمارة
أي خدمة
:)

أحمد
انت عيان؟ تصدق قلقتني عليك؟ إيه يا ابني فين الماضة بتاعتك؟!!! لا بجد طيب انت كويس
:)


علياء
آمين
:)
المرة الجاية هابقى أسيبلك شريحة بحالها من البيتزا بتاعتي عشان كلامك الحلو ده :)

بحر
أنا أصلي ليا واحد صاحبي بقى مسئول قطاع جنوب الصعيد وما عزمش على حاجة, وطبقا لقوانين شلة شلح فالدفع بيبقى الأول فالأول :)
وبعدين يعني لما أطلع من جيبي خمسة وعشرين جنيه مش مشكلة لكن شوف انت هاتطلع كام :)

وبعدين ايش فهمك انت في الفرق بين محمد منير ومحمد فؤاد ههههههههه
:)


رومانسية
أهلا بيكي, خطوة عزيزة, انتي بتعرفي ترسمي؟ طيب ترسميلي مجانا بقى عشان واحدة من الناس عاوزة تاخد فلوس :)
أنا كمان فرحت قوي لما قريت تعليقك على فكرة :)


واحدة من الناس
يا بنتي أنا خلاص مش عاوزك ترسميلي رومانسية هاترسملي :)
بالنسبة للخمسة وعشرين جنيه فخلاص بقى راحوا لكن أول ما يدوني تاني هاعزمك على بيبسي تمام كده ؟
:)
ادعيلي بقى كمان شوية يجعدلك ف صحتك وعفيتك يا رب
:)


عطش الصبار
انتي أحلى حد بيزورني وأحلى حاجة حصلت لي من خمس دقايق هههههههه
إيه رأيك أديني بعاكسك أهو :) أخبار روز إيه وابنك اللي ف أمريكا, هو اسمه إيه؟ طيب هو بيعرف يلعب شطرنج؟ على العموم لو بيعرف قوليله إني أحسن واحد يلعب شطرنج ومستعد أتحداه :)

آيــة يقول...

انا بتهيألي بقالي مدة بقول يارب فرحتي عليك
و غالبا عشان كده ربنا بعتني دلوقتي مدونتك اسمع ايجور كروتوي الاول ، و بعدين اقرا البوست ده .. عشان يفرحني
:))

شكرا يا عمرو بجد
ربنا يغير أيامك من حلو لأحلى
:))))

آيــة يقول...
أزال المؤلف هذا التعليق.
آيــة يقول...
أزال المؤلف هذا التعليق.
سواحة يقول...

يارب فرحتى عليك
راضينى بيها لما تقدرهالى
و صبرنى لما تأخرهالى

تــسنيـم يقول...

هو انا مشوفتش البوست ده ليه قبل كده..؟

كنت فين؟


بس عارف.. يمكن جه في وقته


فرحتي عليك يا رب

موناليزا يقول...

عايزة أقول لك اني أنا وبدور علق قصة"جدتي اسمها السر" عشان اربط بينها وبين النص الجديد اللي هو "السر"

اتكعبلت في البوست ده ومكنتش شفتو قبل كده

المهم عايزة اقول لك في المختصر المفيد يعني ومن الآخر

حلوة الدعوة بتاعتك دي حلوة قوي كمان

انت انسان يا عمرو

ربنا ميخيبش ظني ان شاء الله فيك

وعايزة اقول كمان

"ياااااااااااااااارب فرحتي عليك"

اللهم آمين