نوفمبر 16، 2009

كويز

To_Question_by_todo_el_mundo

زهرة ورطتني في الكويز ده. ياللا بقى ربنا يسامحها.

- من أنت؟

ايييييييييييييه... طيب انتم فاضيين؟ أصل الإجابة على السؤال ده هاتبقى طويلة حبتين(أصل أنا متواضع حبتين ههههه). بداية أنا أحسن واحد يجاوب كويزات هع هع هع.. (سمعنا صلاة النبي بقى عشان الحسد). يعني مش بنخاف من الأسئلة, يعني اللي ف قلبنا على لسانا ومش بنحذف حاجة. وأنا صاحب المدونة دي يعني الفرح فرحنا واللي يضرب نار في فرحنا ما نحبوش واللي يقول بقين حلوين نحيوه. ولما تقرا المدونة هاتعرف إن أنا الذي نظر الأعمى.. يعني مدون وأديب كفاءة ومنطقة. أي والله.

إجابة أخرى: أنا العلم فرحان وبيرفرف من حبة هوا, واقف على حافة الغرور ونصه مدفون في التراب.. وأنا أحياناً مفرش سرير فرحان برحلة خلوية, وطول الطريق عمال يتصور جمال المكان اللي رايحه واللي هايقوله ويعمله, ولما يروح المكان المقصود يفرشوه الناس ويقعدوا عليه فما يشوفش أي حاجة ويتدعك بين الرجلين وتقع عليه بقايا الأكل. ومن قسم الأقمشة إلى قسم المأكولات.. أنا قمع أيس كريم بيبسط ناس كتير وهو بيسيح على شكل دموع بيضا بتخرج من أصل تكوينه.

- وما الذى تفعله هنا؟

ناقص تقولي ومن هم شركاءك في التنظيم!! إيه الكويز قليل الذوق ده.. وانت مال [تيييييييييييت]؟ أنا واقف ف نت الحكومة. ثم مين قال إني هنا؟ أنا هناك أساساً.

- إسرائيل تقصف كل جنوب ممكن بحثا عنك ، أي شمال تقصد؟

شمال إسرائيل طبعاً.. عشان أفضل أجري وبيوت الإسرائيليين تتقصف من حواليا.. هع هع هع.

- أنت مكلف بحذف حرف من حروف اللغة العربية .. أيها ستختار ولماذا؟

أحذف الراء والسين عشان الناس اللي عندهم لدغة لما يندهوني ما يقولوش يا "عمي" بدل من عمرو, وعشان ما يتكثفوش لما أتريق عليهم...

- لو قدر لك أن تدخل السجن فما هي القضية التي تتمنى أن تدخل بها إليه؟

يا ساتر يا رب. سجن!!! لازم يعني؟ بس آخد الفاموليا معايا. وتبقى القضية اختلاس وغسيل أموال, أهو برضه الكام سنة سجن يجيبوا تمنهم وأضمن مستقبل الأولاد. ويا ريت برضه المدام تبقى مختلسة كبيرة, أهو بدل من قعدتها معايا في الزنزانة بلا شغلة ولا مشغلة هههههههه.

- نحن لا نعيش حياتنا بل نتعلم فيها كيف نعيش. ما تعليقك؟

لو كان الموضوع كده يبقى اللي في مصر كلهم ربنا يرحمهم لأن التعليم عندنا أقل تقدما من صناعة الصواريخ عند الإغريق.

- على مفترق طريق لافتتان ، اليمنى تقول ( إلى حلمك) واليسرى تقول : (إلى ما لم يحلم به البشر) ، أي الطرق ستسلك؟

إلى حلمي طبعاً, وأغير اليافطة وأكتب “المتجه إلى حلم عمرو السيد يصعد الكوبري” هع هع هع.

- بجملة واحدة فقط أكتب تعريفاً لكل كلمة من الكلمات التالية:

- الوطن: جميزة ع الترعة في بلدنا بينام فيها كل طيور أبو قردان.

- الأم: مدرستون.

- الليل: عينين حبيبتي, وضحكة صافية طالعة من قلبها.

- الحب: يجوز.. مع إنه مرهق قوي يعني.

- أمريكا:I don't speak English

- المرأة: حيوان خرافي نسمع عنه في الحواديت نمنا وصحينا الصبح لقيناه مالي الشوارع.

- الرجل: سمكة زينة لا تؤكل.

- الصمت: إيعا إيعا عشان بيخلي صوتي عامل زي صوت الضفادع.

- الانترنت: وحوي, وحوي, وحوي.

- أختر منصباً واتخذ قرارا؟

المنصب: مأذون شرعي

القرار: أجوز كل البنانيت الوحشين, وأقعد بقى أنقي بين البنانيت الحلوين, هع هع هع.

-قيس، عنترة، جميل…. الذين يقولون شعرا….. وليلى وعبلة وعزة ”صموت”لماذا هذا التغييب للمرأة؟

ده مش تغيب, ما هو بعد ما المسرحية تخلص ليلى وعبلة وعزة بيجيبوا السنجوتشات وحلة المحشي اللي قعدوا يعملوها ويلفوا فيها طول الليل عشان قيس وعنتر وجميل ياكلوا ويعرفوا يكتبوا شعر.. هههههههههه

- إلى أين تمضي كلمات الحب بعد أن نقولها?

الطاقة لا تفنى ولا تستحدث من عدم. مؤكد موجودة بس بصورة تانية.

- هل تجد علاقة بشكل أو بآخر بين المرأة وقطاع الطرق؟

الاتنين بياخدوا فلوسنا.

-هذا فراق بيني وبينك .. متى ولمن تقولها ؟

أقولها دلوقتي للي صمم الكويز ده.

-كيف هو غداً ؟

زي النهاردة وامبارح بس الفرق إنه هايبقى بشكل مختلف يعني على رأي الجماعة الأجانب Old wine in new bottles.

- تمرر التاج لمين؟

مش هاعمل الحركة العفشة دي ف حد.

هناك 35 تعليقًا:

اقصوصه يقول...

ما شا الله

التيجان منتشره فكل مكان

شو الموضوع

هي الدنيا بتمطر تيجان والا ايه

لووووووووووول

Heba Gamal Emara يقول...

:):)

غير معرف يقول...

بصرحة يا عمرو كنت هاموت من الضوحك مبروك عليك تاج الجزيرة السلطانية ههههههههههههههههه

قطتى

غير معرف يقول...

المرأة: حيوان خرافي نسمع عنه في الحواديت نمنا وصحينا الصبح لقيناه مالي الشوارع.

ياه يا عمرو؟؟؟؟؟؟
اتغيرت كتير من بعد ماسبت الشركة وقعدت جمب البحر:)
فين أيام الرومانسية؟؟؟؟!!! يبقى أكيد أنا كنت ملهمك الرومانسي :):):)
أحمد شكل

واحده من الناس يقول...

هههههههههههههههه
اى خدعه
لازم كده كل حين ومين نغير يا استاذى ونفقعك كويز من دول
ومتقلقش كل ما يجينى حاجه زى كده هبعتهالك
ههههههههههههه
ثم المرأه حيوان خرافى
:(
طيب قول كائن كانت تبقا مبلوعه
اشهدوا يا بناويت يا اللى هنا الاستاذ عمرو بيقول عليكو حيوانات
ههههههههههه
حلوه عليكو دى
تحس انى مش من ضمن البناويت
هههههههههههههه
انا امى دايما تقول انا مخلفه غفر
ههههههههههههههه
المهم بقا الكويز هنا تحفههههههه
وجميل جدا وبصراحه
هع هع هع هع
فرحانه فيك
ويابنات كل اللى عنده كويز زى ده يبعته للبرنس عمرو واما نشوف بقا يا استاذى مين الحيوان الخرافى
:(
عااااااااااااااااااااااااااا

enjy يقول...

تصدق ضحكت؟؟ اى والله

يللا يا عم ميرسيخ على شوية الضوحك دول

سلام مربع لانى مستنزفة ومش قادرة اتكلم اشاسا

ponpona يقول...

عمرو السيد ... أحب اقولك انك لميت عليا البيت والجيران وجيران الجيران والشارع كله من هيسترية الضحك اللي عندي دي ، هما هنا في البيت فاقدين فيا الأمل من زماااان علي اساس ان البت مابقاش فيها دماغ بس كانوا لسه بيدورو ع الأمل ده لكن انت كده بقي خلتهم يبطلو يدورو عليه من اساسه


"مدون وأديب كفاءة ومنطقة. أي والله"
انت بتقعد فين ياعمرو بعد مابتسيب المدونه ؟ وماتقوليش القهوه اللي علي اول الشارع .. دي قهوه محترمه وانا عارفاها .. ها ؟ قولي بقي بتروح فين .. وشوشني بس وانا مش هاقول لحد

هع هع هع .. يخرب بيت عقلك يا عمرو

علياء يقول...

حيوان خرافي؟!!! يا نهار أزرق
لو سمحت وسع كده شوية يا عمرو....

زهــــــــــرة: عندك حق .. أنا شاهدة انه عمرو بيقول علينا حيوانات
ههههههههههههههه
لازم يبقى فيه مظاهرة هناااااا :(
والموافق يتفضل برفع يده..
لكن والله ضحكتنا قوي يا عمرو :) .. الله يسامحك بقى ويغفر لك الخطأ الفادح اللي قلته في حقنا ده.. ههههههه

عمرو يقول...

أقصوصة
شحالك؟ شلونك؟ شو مسوية؟ شخبارك؟ عساكي طيبة عساكي بخير.. خيتي لا تآخذيني ابغى أعرف إن كان جوابي على سؤالك "منو عمرو السيد؟" وصلك ولا لأ؟ بس ما شا الله عليكي تعليقك على هالموضوع أسعدني كتير كتير
:)

عمرو يقول...

أيها السادة أنتم الآن في مدونة عمرو السيد.. بيت العروبة النابض
:)

عمرو يقول...

هبة
يعني أفهم إيه أنا من الاسمايليز دي؟
:(

عمرو يقول...

قطتي
بعد الشر عليكي. بس لو مصرة يبقى اعمليها بعيد عن هنا ههههههههههههه

عمرو يقول...

أحمد يا شكل
يا ابني الانسان بيلجأ للرومانسية هروبا من الواقع. أنا لما كنت قاعد وشي في خلقتك كان لازم أهرب طبعا
ههههههههههه

عمرو يقول...

زهرة
انتي عايزة تقلبي الناس عليا؟ دي مؤامرة.. لما نقول إن الإنسان حيوان مبكر تبقى شتيمة؟
حاجة غريبة والله

عمرو يقول...

إنجي
ألف سلامة عليكي

عمرو يقول...

بنبونة
أنا باروح أقعد على قهوة في المنيل. هههههههههههههه

عمرو يقول...

علياء
انتي عايزة تقلبي نظام الحكم؟ مظاهرة يا علياء على أخوكي في الترجمة.. مش كان العشم خالص على فكرة

محمد بحر يقول...

إيه الحلاوة دى طول عمرك متواضع ياعمرو بس شكلى مش هفرح بيك بعد تعريفك للمرأة طب دارى شوية لحد ما أفرح بيك وتتجوز وعرف براحتك بعد كدة

عمرو يقول...

بحر
عامل إيه في الغربة يا ولدي؟
أنا على فكر يا بحابيرو ما اترفضش واللي ما تتجوزنيش يبقى ضيعت على نفسها ميزات كتير هع هع هع

Isolde يقول...

امممممممم.... امممممممم كمان مرة
و الله بعد ما سيادتك عرفت المراة علي انها حيوان و خرافي و صحيت لاقيته مالي البلد، اشك يا عمرو افندي في اني هازور مدونتك دي تاني... علي جنب شوية لو سمحت

يا بنااااااات! مقاطعة، قاطعوا منتجات، قصدي تدوينات عمرو السيد

واحده من الناس يقول...

انا مش جايه اعمل فتنه لا سمح الله ان بس بهدى النفوس
واحنا لازمن وحتمن ناخد موقف جاد من اتهامنا باننا حيوان خرافى..
مش كده يابنات؟
طبعا مش حلوه خاااااااااالص ف حقنا
وشكلنا كده بقا وحش اوىىىىىىىىى
ثم معلش يا استاذى
هو حضرتك بعد اللقب الجميل اللى لقبتنا بيه هتفكر تتجوز حيوانه خرافيه
ههههههههههههههههه
ده حتى يبقا مش لطيف
:)

عمرو يقول...

إيزولد
ما تقدريش

عمرو يقول...

يا زهرة
ده شر لابد منه على رأي إيزولد

جمال عمارة يقول...

"مدون وأديب كفاءة ومنطقة. أي والله"

“المتجه إلى حلم عمرو السيد يصعد الكوبري"

"مش هاعمل الحركة العفشة دي ف حد."

أضحكتني والله يا ولدي..

الله "يحظك" يا عمرو..

عمرو يقول...

أستاذ جمال
لا تتخيل مدى سعادتي بإني أضحكتك, أي والله.
:):):):):):):):):):):):):):):):):):):):):):):):):):):):):):):):):):)

Heba Gamal Emara يقول...

لا يا مستر عمرو مش تزعل
انا قصدى أقول من الإسمايلز دى انى ضحكت رغم هجومك الفادح على المرأة فى هذا الكويز
بس حبيت اقول رأيى بكلمات قليلة (لإننى لاحظت مؤخرا ان التعليقات الكبيرة مش بتجيب نتيجه وبص كده فى البوستات اللى فاتوا)

وكمان خير الكلام ما قل ودل

جارة القمر يقول...

انا جييييييييييييييت

بجد المدونة هنا وحشتنى جدااااا ... ازيك يا عمرو عامل ايه و ايه اخبارك ؟؟

بجد انت كارثة يا عمرو انا مت من الضحك و الله ... لا بس اجابات جاااامدة

بالنوسبة للمرأة اللى هى حيوان خرافى فانا من موقعى هذا بضم صوتى لصوت اخواتى فى النضال و بنقوووول لازمن تغير التعبير دا

Isolde يقول...

تؤ تؤ تؤ... انت خدت علي اوي علي فكرة، احنا لازمن نشوفوا حل للموضوع ده
اوفففففففففففففف

mano يقول...

انا بقى ماما بتقللى انتى جاتلك هستيريا الكادر الكادر الكادر على وزن العنب العنب العنب هههههههههههه وقاعده تتفرجى للامتحان وتضحكى هههههههههههه بجد ضحكت لاول مره من الصبح بالتوفيق دايما يا عمرو

عمرو يقول...

هبة جمال عمارة
لو لاحظتي هاتلاقي إني كتير ما كنتش بارد على التعليقات في الأيام الأخيرة لأني فعلا ما كانش عندي طاقة نفسية لده
عموما انتي عارفة إن ده مش موقف شخصي منك
:)

عمرو يقول...

جارة القمر
عاملة إيه يا ترى؟ أنا مش هاغير رؤيتي حول المرأة غير لما تيجي واحدة وتغيرهالي
ههههههه

عمرو يقول...

إيزولد
لازمن نشوفوا حل؟ انتي عايزة تعملي نفسك اسكندرانية.. ده احنا دافنينه سوا
ههههههه
:)

عمرو يقول...

مانو
يا رب على طول ضحكانة وسعيدة
(حلوة ضحكانة دي صح؟)
زورونا تجدوا ما يسركم
:)

غير معرف يقول...

انت دائما تعبر عن نبض وقلب الرجال

عمرو يقول...

انت مين؟