أغسطس 04، 2010

على ما تفرج 2

karo-compos كررررررررر (صوت شيشة طويل ومنغم يخرج من فمك هذه المرة)

*****

الانتقال إلى الطخ طييط (تنفيذ الخطة) الخاص بمشروعك سيجعلك تواجه الكثير من الشخصيات التي قد تعوقك عن الوصول للنجاح. الآن أنت تشرب الشيشة مع السمسار على نفس المقهى وهي استراتيجية جيدة للوصول لهدفك (ولخسارة صحتك في نفس الوقت!) تسمى هذه الاستراتيجية في كتب الأعمال Mirror & Mimic وفيها ينبغي عليك أن تقوم بأفعال موازية لما يفعله الطرف الآخر حتى تقترب منه نفسيا وتستطيع أن تحصل على ما تريده.

لابد أن تشعر السمسار بأن مهنته شاقة ومتعبة, وأنه يستحق المال الذي يتقاضاه وأكثر مقابل كل هذا العناء, عندها فقط سينفتح قلبه لك, وصدقني ستجد في قلب السمسار الكثير من الهدايا, فبعدما ستحصل على العقار ستحتاج إلى الكثير من الخدمات التي يستطيع هو أن يوفرها لك في لمحة عين. صدقني ستحتاج إليه خاصة إن لم تكن من أبناء المنطقة.

*****

- اتفضل يا بيه, شفت سعادتك؟ أحلامك أوامر.. زي ما انت طلبت بالظبط.

- (تفكر أنها تختلف كثيرا عن طلبك) بكام دي في الشهر يا حاج سمير؟

- تلات آلاف ونص لكن عشان خاطرك انت أنا هافاصل مع صاحب البيت. ممكن توصل تلاتة.

*****

في أغلب الأحوال يكون السعر المتفق عليه مع صاحب الشقة ثلاثة آلاف. السمسار همزة وصل بين طرفين وهو يقبض من كليهما ولن يضحي بأحدهما من أجل الآخر, ثق تماما أنه تحدث مع صاحب المنزل وأخبره بأن الشقة "ما تسواش حتى ألفين لكن ربنا يسهل".

إذا استطعت أن تصل إلى صاحب البيت من وراء السمسار فافعل, ناقشه في السعر فقد تصل إلى سعر أقل بكثير, تذكر أن السمسار يأخذ نقودا عن كل جنيه تدفعه (منك ومن صاحب المنزل) وليس لديه مصلحة في أن يتم العقد بسعر أقل, بعدما تنهي العقد ادفع للرجل نقوده.

قبل أن تتم الصفقة مع صاحب العين تأكد من خلو العين من أي "خوازيق".

فحينما يقول صاحب العقار إن "الشقة بس محتاجة وش نضافة" هذا يعني أن تفتح الشباك وترى انعكاس الضوء على الحوائط الذي سيكشف لك إن كان بها الكثير من المطبات التي تحتاج إلى معجون أم أنها بالفعل تحتاج إلى "وش نضافة". إذا لم تتأكد من هذا فقد تتعرض إلى فترة طويلة من العمل مع النقاشين والمبيضين وستحتاج أنت إلى "وش نضافة" كل ربع ساعة تقريباً.

حينما تدخل إلى العقار تأكد من أن كل المفاتيح و"فيش" الكهرباء تعمل. إذا كان العقار قديما فاسأل صاحب الشقة إن كانت الكهرباء "لطش" أم "بمواسير". في حالة أنها لطش فاهرب بجلدك على الفور, ذلك أن أدنى "قفلة" كهربائية ستعرضك لتكسير الحوائط من أجل استبدال السلك المدفون بها ومن ثم دفع المزيد من المال في أعمال النقاشة والبياض.

في حالة أن التشطيبات لم تنته داخل العين فلا تمضي عقد الإيجار ولا تدفع أي مليم قبل انتهائها, فبمجرد إمضاء العقد ودفع النقود سيتراخى صاحب العقار في التشطيبات وأغلب الظن أنه سيسلمك العين دون اكتمال التشطيبات...

*****

- سعيد باشا, أخبارك؟

- ازيك يا أستاذ عبد الفتاح.. إيه أخبار التشطيب؟

- لا مؤاخذة يا سعيد بيه, أصل أمي في السويس تعبت واضطريت أنزل لها, وكان عندي حتة أرض ف مطروح طلع عليها العرب وخدوها واضطريت أسافر وكانت بهدلة.

- يااااه, وايه كمان؟

- أبداً ده غير ان حضرتك عارف إن الشقة كلفت عليا كتير وبصراحة أنا راجل عندي ربو ومش باقدر أقف مع العمال.

(صوت يشبه صوت الشيشة طويل وغير منغم على الإطلاق)

هناك 14 تعليقًا:

ponpona يقول...

ويلكم باك
عارف يا عمرو ..انت تفضل تكتب في سلسلة التدوينات دي تفضل تكتب لحد ماترجع بجد تتدون كل يوم عشان أدخل أنا هنا كل يوم و الاقي بوست جديد :)

سؤال نونو بقى
يعني إيه الكهربا لطش ؟

و إيه كمان ؟ إيه كمان ؟
آه .. فكرة حلوة انك تخلي كل التدوينات بصورة واحدة .. أيوة أيوة انت عبقري واحنا عارفين :) :)

وش مبسوط بجد

عمرو يقول...

بنبونة
بما إنك الوحيدة اللي علقتي فكل أسئلتك مجابة
:)
لطش يعني مش محفورلها, يعني من غير مواسير, يعني بيمدوا السلك جوة الحيطة ويدفنوه من غير ماسورة

:)

وش مبسوط لأنك مبسوطة

ponpona يقول...

:) :)

محمد بحر يقول...

السلام عليكم

بقيت خبرة كبيرة يا عمرو انا اول مرة أعرف حكاية لطش دى وقال عامل نفسى أبوة العريف عجبانى المعلومات اللى كل يوم باكتسبها من البوست

Heba Gamal Emara يقول...

ف الخمسين سنة اللى كان بابا بيجدد فيهم الشقة اتعلمت حاجات كتير من المبيضين والكهربائيين والذى منه

لكن " لطش " دى ... كلمة جديدة .... من اللذيذ وضعها ف القاموس :):))

تــسنيـم يقول...

على فكرة أنا متابعة و مستمتعة جداااا


:)


أسلوبك - زي ما إنت عارف- أكثر من رائع، و بتعرف تعمل من موقف عادي .. نص أدبي..


منتظرة باقي الحلقااات

عمرو يقول...

بحر
زورونا تجدوا ما يسركم

هبة عمارة
ههههههههه ضحكتيني. انتم فعلا قعدتم فترة طويلة بتوضبوا الشقة
:)


تسنيم
ده أنا قلت انك زعلانة مني :)
طيب كويس انك قلتي لي إنك متابعة
:)

أسما يقول...

النت عندي "لطش" و اليو إس بي طلعت تيييييييت... بس جبت راوتر و الخدمة هتشتغل في خلال 10 ايام، و من غير سمسار

:)

هاتابع علي قد ما اقدر لحد ما النت يدخل بيتنا تاني، بعدها بقي هآجي اعمل دوشة كل يوم... استمررررررررر

سلام مؤقتا
:)

سواحة يقول...

ا انت طلعت خبير تاجير شقق :-)
و الله فى بلدنا حيث لا يوجد ضمان و لا الضامن مش ربنا :-(
فالواحد ياجر اقل مدة و باقل قيمة لحين التاكد من مشاكل و خبايا الملكية
و ده فى كل الخدمات مش بس الشقق

فى حلقات اخرى ؟ و رمضان حتعملنا فوازير على المواضيع ديه و لا نظامك ايه ؟؟

عمرو يقول...

إيزولد
أنا قلت برضه ما يمنعكيش عن القراية إلا الشديد القوي. الحمد لله إنها جات على النت. وبعدين على فكرة النت في مصر كلها لطش :) تعرفي أنا النهاردة قريت إعلان في الولايات المتدة عن شركة بتقدم خدمة النت وبتدي الراوتر هدية وبخمسة وعشرين دولار في الشهر الواحد ميجا, يعني النت عندنا في مصر أغلى من النت في الولايات المتحدة وأقل كفاءة.
:(

منتظر الدوشة
لا أسكت الله لك حساً D:




واندا
فيه حلقات أخرى طبعا, ولو عاوزة أي شقة في مصر انتي تؤمري, بس انتي شاوري, عندي حتة بحرية شرقية غربية إنما إيه..


من عاشر القوم
:)

ponpona يقول...

ايه دا بقى ؟
مش قلت هاتحط كل يوم بوست ؟
طيب هو فين ؟ تكونشي بتحط بوستات انفيزابل او ترانسبيرانت

مليكة الطهر يقول...

السلام عليكم

ربما مما فاتنى هنا وجدته بالعوده

والمتابعه وقراءة ما فات

أتابع عن كثب وفخورة بابن بلدى
أه بجد مبروك على جايزة الساقيه
جت متأخره

لكن ملحوقه ف جايزة الدوله ونوبل إن شاء الله


D;

سواحة يقول...

صحيح متاخرة :-)
بس عقبال ما فوقت حبتين و فكونى من الساقية المصرية يوم للراحة

كل سنة و انت طيب
مختفى ليه ؟
الصيام مفيهوش ابداع ؟؟

mano يقول...

ههههههههههههههه لالالالا انا خلاص بقى عندى يقين يا عمرو ان انت شوفت كتير مع السماسره يا ابنى شكلك شفت ماّسى الله يكون فى عونك بس برده انا حاسه ان الموقع اللى انت وصلتله فى الاخر مش بطال على البحر واخر شياكه تمام يعنى ما شاء الله