يمكن الكتابة عن حياتي الشخصية بالعامية في المدونة واحدة من الأشياء اللي عمرها ما خطرت على بالي, لكن بما إني ساكن لوحدي, ومش معايا حد أقوله إني فرحان, وبما إن الفرد لازم يعبر عن مشاعيره, فأنا قلت أكتب النهاردة عن بعض الحاجات اللي مش عارف لها سبب, لكن عارف كويس قوي إنها فرحتني.
بعد التدوينة قبل الأخيرة (بعنوان "أنا أتغير, من فضلكم ساعدوني") حصلت حاجات غريبة قوي في حياتي, مش عارف إن كانت ذات صلة بالتغييرات اللي أنا عملتها بالفعل ولا لأ. أنا أخدت بعض القرارات بعد ما كتبت التدوينة دي وقلت لنفسي لازم أنفذها. منها إني لازم أقلع عن أي سلوك سيء قلت عليه في التدوينة, ومنها إني لقيت نفسي مركز على النتيجة مش على العملية, فقررت إني أركز أكتر على اللي باعمله دلوقتي مش اللي أنا عاوز أعمله, لأني بطبيعتي شخص غير واقعي وحالم بشكل يغيظ. المهم إني وأنا في القطر فتحت المصحف وكان ليا فترة كبيرة ما قريتش قرآن. من يوم ما بابا اتوفى وأنا مش بأقرا قرآن نهائي غير في الصلاة, أنا حلمت بواحد قبلها بليلة بيقولي المصحف اللي انت سبته يوم الدفن لسة موجود عندي أنا شايلهولك, ولما صحيت ركبت القطر وخدت معايا مصحفي, ومش عارف ليه اخترت سورة لقمان, وقررت أعمل بنصايح لقمان لابنه.
وأنا في القطر قلت لنفسي إني لازم أقرا القرآن بشكل تطبيقي ناقد, وبدأت بالفعل وكان ورايا شخص بيتكلم في التليفون طول الطريق وكان نفسي أقوم أضربه. بصيت من شباك القطر لقيت جبل وسحاب وحسيت إني مش عايش لأني مش بادي نفسي فرصة تتأمل برة مني, المهم إني قبل ما أوصل سوهاج بساعة تقريباً بصيت على الشخص اللي بيتكلم في التليفون واكتشفت إني أعرفه, هو مش صديق ولا زميل لكني أعرفه وهو يعرفني. سلم عليا وقعدت جنبه وقعد يحكي ويقول حاجات خارج سياق حديثنا. لقيته بيقولي من غير مناسبة إن الرزق منه ما هو مقدر وما هو مكتوب وإني أريح نفسي من الجري, وبعدين طلع لي مقال لإبراهيم عيسى مالهوش علاقة بالرزق خالص, المقال كان عن الحكم على الناس من خلال بعض أفعالهم, أو بعض صفات فيهم, سأل إبراهيم عيسى سؤال بريء, "لو جات لك أم عندها نص عيالها صم والنص عمي وعندها زهري وحامل تقولها تجهض الجنين؟” أنا قلت طبعا, راح قال “الجنين ده كان بيتهوفن". قال كمان إن روزفيلت كان سكير وبتاع نسوان وكلام كتير قوي بس كان رئيس جيد ولو بصيت على ماضيه عمرك ما كنت انتخبته رئيس. فأنا قلت لنفسي إن كلام إبراهيم لا يعتد بيه, لأن لو العملية كده يبقى مش فيه معايير للحكم على الأشخاص ولا لاتخاذ قرارات, بس قلت أنا مش هاحكم على نفسي غير باللي باعمله دلوقتي.
المهم بقى فيه حاجات كتير قوي حصلت بعد أما نزلت من القطر, جاني إحساس غريب بإني بقيت محظوظ, وإن كل حاجة سهلة, ومن ساعتها وأنا بتحصل في حياتي حاجات كتير مفرحة.
يعني أنا كنت مفلس خالص, لقيتهم في نادي الأدب صرفولي خمسة وعشرين جنيه بحالهم, وفلوس النادي دي بتفرحني قوي, لأنها جات من حاجة ممتعة, وباحس إني لازم أصرفها ف حاجة ممتعة, وده هو اللي حصل (حتى اسألوا أحمد الشمسي ههههههههه), المهم بقى إن فيه حاجات كتير قوي حصلت فرحتني منها إن هدير أختي طلعت الأولى, وأنا بقيت حاسس نفسي أيوها مش أخوها ففرحت جدا, ومنها إن فيه واحد اتصل بيا وقال لي انت ليك عندي وظيفة (مع إني مش عاوز أشتغل, لكن أنا باحب أروح المقابلات وباحب الناس تسأل عليا), ومنها إني كنت ناوي أجيب ساعة فلقيت شخص عزيز عليا قوي بيديني نفس الساعة اللي فكرت أشتريها. ربنا كمان رزقني بمبلغ كبير جدا ومن حيث لا أحتسب, بس المبلغ الكبير ده ما كانش له أثر فرحة الخمسة وعشرين جنيه, أنا اكتشفت إن الفلوس بتفرحنا على حسب الطريقة اللي جات بيها والحاجات اللي هانصرفها فيها, يعني لما يجيلك مبلغ كبير وتحوشه مش هاتبقى سعيد, وإن كنت هاتحس بأمان أكبر.
بس أنا فرحان قوي بالساعة وبنجاح هدير حبيبتي, وعندي إحساس بالتفاؤل كبير. مش عاوز أربط ده بالتغييرات اللي عملتها عشان ما يبانش من الكلام إني باقول على نفسي راجل بركة أو ولي أو درويش, لكن فعلا فيه حاجات كتير قوي اتيسرت وحاجات كتير جدا ربنا رزقني بيها في الكام يوم اللي فاتوا. أنا ليه باقول الكلام ده؟ عشان أقولكم على السر. أو اللي يمكن يكون سر. بيتهيألي إن فرحتي سرها حاجة واحدة. إني بادعي ربنا دايما وباقول يا رب فرحتي عليك.. انتم كمان ادعوا بالدعوة دي. أي حاجة مالكمش فيها يد, ولا تقدروا تعملوا فيها حاجة ما تفكروش فيها, سيبوها على الله, بس تكونوا عملتوا اللي عليكم الأول وبعدها ادعوا وقولوا يا رب فرحتنا عليك.. قولوها من قلبكم وسيبكم من الهم.. قولوها دلوقتي.. مش سامع يعني :)
:)